ཆོས་འབྱོར་རྒྱ་མཚོ། 2024-01-15
ངོ་མཚར་དཔལ་གྱིས་བསྐྲུན་པའི་ཆུ་གཏེར་རྒྱས།།
རང་བྱུང་ས་འཛིན་སྣོད་ལས་འཕྱོ་བའི་གར།།
ལེགས་བྲིས་པིར་གྱིས་བྲིས་པ་བརྒྱ་ཕྲག་ལས།།
དཔག་ཡས་མཛེས་པའི་དཔལ་འཛིན་རྫ་ཆུ་གྲགས།།
ངོ་མཚར་པ་ཏྲའི་སྤུན་ལ་འཁུམས་པའི་དགྲ།
དུས་གསུམ་ཚིག་གིས་བརྗོད་དུ་མི་དམིགས་ཀྱང་།།
འདི་ན་སྙན་ངག་སྨྲ་ལ་རབ་དགའ་བའི།།
ཚེམས་ཕྲེང་མུ་ཏིག་རྒོད་ཀྱི་ཚིག་ལ་སྐྱེས།།
ལྕུག་ཕྲན་ལག་ལྡང་སྦྲེལ་བའི་འགྲམ་ངོགས་ན།།
ཤེལ་དཀར་ཟླ་བའི་དཔལ་བཞིན་དཀར་བའི་ཆབ།།
མདང་སུམ་གློ་བུར་ཁྲོས་ཏེ་ས་འཛིན་ལྟར།།
རྔམ་ནག་འཇིགས་རུང་ཐལ་ཆེན་རྒྱས་ལྟར་འཕྱོ།།
ཡུན་རིང་ངལ་བའི་མཛད་པ་བླངས་པའི་མཐར།།
བཟོད་མེད་དཀའ་བས་བསྐྲུན་པའི་རྡོ་ཟབ་དེ།།
འདུ་བྱེད་རིག་པའི་མེ་ལོང་གསལ་བའི་ངོར།།
ཤར་བའི་མོད་ལ་གཏམ་རྒྱུད་སྤྲིན་བཞིན་གཏིབས།།
སྲ་བརྟན་འགྱུར་མེད་གཤིས་སུ་གྲུབ་པ་ཅན།།
བརྣག་དཀའི་ལྷག་བསམ་འཛིན་པའི་སྟག་ཤར་འགས།།
ཟབ་འཇིངས་གངྒའི་ཀློང་ལ་བསྒྲུན་བཟོད་པའི།།
རྔམ་ནག་ཆུ་ཆེན་འདི་ཡི་ཁ་ལོ་བསྒྱུར།།
སྤྱི་གཙུག་སྐྲ་ལོ་འཕྱང་རིལ་གདེངས་ཀ་རུ།།
འདོད་འབྱུང་ནོར་བུ་ཇི་བཞིན་གཉེར་མཁས་པའི།།
མི་རྒན་ཞལ་རས་མི་སྡུག་གཉེར་མ་ཅན།།
བུ་ཡུག་གྲང་ངར་བདོ་བའི་གནས་འདིར་འཛུམ།།
སྒ་བསྟད་ཁལ་བཀལ་རི་ལུང་བརྒྱ་ཕྲག་ལ།།
སྤོས་ནས་སྡོད་པའི་གདོང་དམར་རྨུ་རྒོད་ཀྱི།།
སྐྱིད་འཕེལ་གཡང་གི་ལས་ལ་མི་འབད་པར།།
ཡ་མ་བརླ་ཡི་ལས་སུ་རྒྱུགས་ལ་སྐྱོ།།
མཐའ་བྲལ་ནམ་མཁའི་མཚོ་རུ་འཕུར་ལྡིང་གི།།
སྒྱུ་རྩལ་མཛད་ལ་མཁའ་ལྡིང་འཕྱ་བའི་བྱ།།
ཟས་སུ་མི་ཤ་རོལ་བའི་རྒོད་པོ་དེ།།
བསིལ་ལྡན་རྫ་ཆུའི་དབུས་ཀྱི་མཁའ་རུ་ལྡིང་།།
མྱུར་མགྱོགས་རླུང་གི་ཤུགས་ལ་ངལ་སྟེར་ཞིང་།།
དཔག་ཚད་གནས་ལ་ཞབས་སེན་ལན་གྲངས་བརྒྱར།།
བཞག་པའི་མྱུར་ལྡན་ལྷ་ལ་སོམ་ཉིའི་ཆ།།
གྲངས་མེད་སྦྱིན་པའི་གྱི་ལིང་རྟ་ཕོ་རྒོད།།
འབྲོག་མོའི་ཕྱག་གིས་བཞོས་བའི་འོ་མའི་བཅུད།།
གཅིག་ཏུ་བསྙལ་ནས་གྲུབ་པའི་ཞོ་གསར་འབུམ།།
རྟེན་འབྲེལ་ལྷ་མོས་པིར་གྱིས་བསྒོས་པ་བཞིན།།
དྲི་མེད་མདངས་བཅས་འཛིན་པའི་གཡང་ལུག་བཀྲ།།
ཟོལ་ཁྲལ་དར་ཟབ་སྣ་ཚོགས་ཤི་རྟ་ལས།།
ཁོར་ཡུག་འདི་རུ་ལེན་ཕྱིར་རྒྱང་རིང་དུ།།
རྐང་འགྲོས་འཁྱར་འཁྱོར་ཐེངས་གཅིག་བཀོད་སྟབས་ཀྱིས།།
ཁམས་པའི་ཕོ་རྒོད་གྲགས་པའི་རྫ་རྔ་བརྡུངས།།
རིན་ཆེན་བྱུ་རུ་དམར་པོ་ཐོད་པའི་སྟེང་།།
གསེར་འོད་རྟ་བདུན་འཛུམ་པའི་བརྒྱན་སྤྲས་ཤིང་།།
དྲན་རིག་སེམས་ཀྱི་གཞས་ཆུང་རི་རྩེ་རུ།།
བྲན་པའི་གླུ་མ་སྙིང་ལ་སྡུག་པར་གྱུར།།
ཡན་ལག་སྟུག་ཅིང་བོངས་ཆེ་སྟོབས་རྒྱས་ཤིང་།།
དམར་ནག་ཁྲག་གི་ཚོན་རྩི་མཁུར་ཚོས་ལ།།
མ་བྱུགས་རང་བྱུང་ཉམས་ཀྱི་སེར་གས་ཅན།།
རྒོད་པོ་གཡུ་རལ་ཅན་དེ་འདི་ན་གསོན།།
ཡིད་སྲུབས་བདུད་ཀྱི་ཕོ་ཉ་རབ་ཁྲོས་ནས།།
རལ་གྲིའི་ངར་ལ་དབུགས་ཀྱི་ཤུགས་དྲངས་ཏེ།།
རྫ་ཆུའི་འགྲམ་རྒྱུད་གཤེན་ཐང་སྐྱ་མོ་རུ།།
བརྫུས་པའི་འདས་དོན་བརྗོད་མེད་སྐྱོ་བ་ཨང་།།
ཇི་ལྟར་བསྒོ་བའི་རྩལ་གྱིས་བརྫིས་པ་ཡི།།
སྨན་ལྗོངས་ས་ཡི་ཐིག་ལེ་འབར་བ་འདི།།
མདོ་ཁམས་མཛེས་པའི་དཔལ་དུ་རྣམ་བསྒྱིངས་པ།།
འགྱུར་མེད་མངོན་དུ་འཕགས་པའི་དུས་ཀྱི་ཆར།།
དེ་རྗེས་ཨར་ཇག་ཁྲམ་པའི་དཔུང་རྒྱས་ཏེ།།
སྙེམས་ལྡན་རྒོལ་བའི་སྣང་བ་འཕྲོག་མཁས་ཚོགས།།
དཀར་འཇམ་ཡུག་ཅིག་ཁྱབ་པའི་གདུགས་དཀར་ཆོས།།
མངོན་པར་ས་གཞིར་ཁྱབ་ཏེ་ཞི་བར་བཀོད།།
གན་མཛོད་ནོམ་གྱིས་བཀང་བའི་དཔོན་ཆེན་དང་།།
ཕུན་ཚོགས་སྐྱིད་ཀྱིས་ཁྱབ་པའི་འབངས་སྡེ་གཉིས།།
ལྷུང་ལྷུང་ཆལ་ཆིལ་ལྡིང་བའི་རྫ་འགྲམ་ན།།
མཐོང་ན་མི་མཐུན་མེད་པའི་ངང་དུ་བཞུགས།།
འཇིགས་རུང་འཁོར་བའི་དུ་ཁའི་མེ་འོབས་ལ།།
ཕྱེ་ལེབ་གཤོག་པའི་ཟློས་གར་བསྒྱུར་བའི་བློ།།
བོར་བའི་སྐྱེ་བོ་དབེན་པའི་ཀློང་ཡངས་ཆེན།།
རི་བོང་འཛིན་མ་འཛུམ་དང་གཉིས་མེད་རྒྱུ།།
ཡིད་འོང་གཞོན་ནུ་ཆུ་རྩེད་ཞབས་ཁྲུས་སུ།།
ཞུགས་པའི་ཚོགས་རྣམས་སྙིང་གི་མཛའ་གཅུགས་ལ།།
རྟེན་འབྲེལ་གཉེན་སྟོན་ཆོ་གའི་རྒྱས་བཏབ་སྟེ།།
སྦྲ་ཁྱིམ་སྨུག་པའི་ཀློང་དུ་མྱོས་ལ་གཟིགས།།
ལྷིང་འཇགས་ཞི་བའི་གནས་ཀྱི་མཁའ་དབྱིངས་སུ།།
མདོ་སྔགས་ཉི་ཟླའི་རྣ་ཆ་འཛིན་མཁས་པའི།།
གྲུབ་བརྙེས་འཕགས་པའི་འདུས་སྡེ་མ་ལུས་ཀུན།།
རྫ་ཆུ་སྔོན་མོའི་ངོགས་ན་མཚམས་སྤྲིན་གནོད།།
དུས་གསར་མི་རྟག་སྒྱུ་མའི་ཟློས་གར་རྗེས།།
གནག་སྣུམ་རྡོ་ཡི་ཚངས་ཐིག་འཐེན་འདྲའི་སྟེང་།།
མི་རིགས་སྣ་ཚོགས་རྐང་དྲུག་གླུ་བའི་ཟོལ།།
རྫ་ཆུའི་འགྲམ་རྒྱུད་ཕྱོགས་ནས་སྤེལ་མར་ལྡིང་།།
ཐ་ཆུང་གནག་རྫི་གཡུ་ཡི་སྣབས་ཆ་ཅན།།
ད་ནི་དར་བབ་ལང་ཚོའི་མཛེས་རོལ་བདག།
གཡུ་ཞུན་ཁུ་བ་ལྷུང་འདྲའི་རྫ་འགྲམ་ལ།།
འབྱོར་ཚེ་ཆུང་ངུའི་དུས་ཀྱི་ད་རེབ་དྲན།།
གྱི་ལིང་གཤོག་རླུང་ཐོགས་པའི་འདོ་རིགས་རྟའི།།
ཁ་ལོ་བསྒྱུར་ནས་གཡུ་མདོག་རྩྭ་ཐང་སྟེང་།།
མགྱོགས་པའི་རྨིག་སྒྲ་ཡོམ་ཡོམ་བརྡབས་པ་ཡི།།
དམིགས་བྲལ་ཆུང་ངུའི་འཁྲུལ་སྣང་འདི་རུ་ལྷོངས།།
ག་ཞ་དགའ་སྟོན་སྐྱིད་པའི་སྡིངས་ཆ་ལ།།
ལྷན་གཅིག་ཆོ་ག་མཛད་པའི་དུས་ཀྱི་མི།།
ད་ལྟ་དྲན་རིག་ངོགས་སུ་ཆུ་ཟླའི་གཟུགས།།
སྣང་བས་འཛིན་པའི་ཡུལ་ནས་འདའ་བར་གྱུར།།
འོན་ཏང་ཚངས་རལ་ཀློང་ཆེན་ཡངས་པ་རུ།།
བཅུག་པའི་ཚིག་འབྲུ་ཐབས་ཀྱིས་པིར་རྩེ་རུ།།
མི་མཐོང་ངག་གིས་བཀོད་པར་བཤམས་པ་འདི།།
གྲགས་དཀར་རྫ་ཆུ་མཛེས་པའི་དོ་ཤལ་ཙམ།།
རྩོམ་གསར། 10