ཁྱོད་ནི་ང་ཡི་སྔོན་མའི་རྨི་ལམ་གྱི།།

བག་ཆགས་ཀློང་དུ་ལྡིང་བའི་བྱེའུ་ཆུང་སྟེ།།

སྐྱེས་པའི་ཚེ་རབས་ཕྲེང་ཐག་ལ་བརྒྱུས་པ།།

རྟག་བརྟན་འགྱུར་བ་མེད་པའི་གྲོགས་པོ་ཡིན།།

ལས་ཀྱི་ཆུ་བོ་དལ་གྱིས་བཞུར་མཚམས་ཀྱི།།

ཁྱོད་ནི་གཙང་པོའི་འགྲམ་གྱི་མེ་ཏོག་སྟེ།།

བདག་གི་མི་ཚེ་དབྱར་གྱི་གཞུང་པ་ན།།

མཛེས་སྡུག་རྣམ་པར་བཀྲ་བའི་གྲོགས་པོ་ཡིན།།

བསོད་ནམས་གསེར་གྱི་ལྷུན་པོའི་རི་སྐེད་ཀྱི།།

མི་ཚོགས་ཚང་ཚིང་རྒྱས་པའི་ལུང་པ་ནས།།

འུ་གཉིས་སྣང་བ་མཐུན་པ་སྟེས་དབང་མིན།།

རྒྱུ་དང་རྐྱེན་གྱིས་རྙེད་པའི་གྲོགས་པོ་ཡིན།།

ང་ནི་ཁོག་རྒྱ་ཆུང་ལ་ནང་སེམས་དོག།

ཕྲག་དོག་རྒོད་ལ་ཉོན་མོངས་རབ་ཏུ་ཆེ།།

ཁྱོད་ཀྱི་གཤིས་ཀས་འདི་དག་རྨེག་མེད་བྱས།།

དགེ་བའི་ལམ་སྣ་འཁྲིད་པའི་གྲོགས་པོ་ཡིན།།

སྐབས་རེར་འཁོན་ཡང་བསྐྱར་དུ་མཐུན་སླ་ཞིང་།།

སྐྱིད་སྡུག་གང་ཡིན་བཤད་ན་ཆོག་སའི་མི།།

ཨ་གསར་དྲི་མ་ཡལ་བའི་སྤང་ཁུད་ནས།།

འུ་གཉིས་སྣང་འདྲིས་ཕྱེ་ལེབ་ཆ་གཅིག་ཡིན།།

ནམ་མཁའི་སྤྲིན་པ་ཐང་དུ་མ་ལྷུང་བར།།

ཆུ་ཡི་གཉེར་མ་དབྱིངས་སུ་མ་ཚེས་བར།།

མཛའ་བརྩེ་ཕྱི་ནང་གཙང་བའི་རུམ་ཁ་ནས།།

འུ་གཉིས་མི་འགྱུར་གཡུང་དྲུང་རི་མོ་ཡིན།།

སྒྱུ་འཕྲུལ་གར་གྱིས་བསྐྲུན་པའི་འཇིག་རྟེན་ནས།།

དུས་ཀྱི་མི་རྣམས་ཕལ་ཆེར་ལྦུ་བ་རེད།།

འོན་ཀྱང་ཁ་ཁོག་གཅིག་ཏུ་མཐུན་པའི་ཁྱོད།།

འཕྲད་པ་འདི་ནི་ང་ཡི་བསོད་ནམས་ཡིན།།

སྐར་འོད་ཆེམ་ཆེམ་གཡོ་བའི་མངའ་འོག་ནས།།

ཟླ་བ་ཡིབ་ལ་ཉེ་བའི་མཚན་གཞུང་ལ།།

ཁེར་རྐྱང་སུན་སྣང་འགོག་མེད་ལྡང་བའི་དུས།།

གྲོགས་ཁྱོད་སྤྲིངས་པའི་འཕྲིན་པ་འདི་ཙམ་མོ།།