སྐྱོ་སྣང་པི་ཝང་འཚོ་བའི་བར་ནས་དཀྲོལ། །

དེ་ལ་རམ་འདེགས་གཞས་ནི་ཐོས་མ་གྱུར། །

འདི་དང་དེ་ཞེས་བརྗོད་བྱ་གཞན་མེད་པའི། །

དམིགས་ཡུལ་ཅི་ཡང་མེད་པའི་འཚོ་བ་འདི། །

བསམ་བཞིན་བསམས་ན་མི་ཚེའི་བར་ཆད་ཅིག །

དྲན་བཞིན་དྲན་ན་ལྷིང་འཇགས་དཀྲོག་པ་ཞིག །

དུས་ཚོད་ཞག་ནག་ངང་གིས་འདས་པའི་རྗེས། །

བདག་ནི་རྣམ་གཡེང་སྒྱུ་མའི་རྙི་རུ་ཚུད། །

ཕུགས་བསམ་སྤྲིན་དཀར་ཡན་པའི་བདག་ཉིད་ནི། །

སུས་ཀྱང་མཛེས་པའི་གཤིས་སུ་མཐོང་མི་སྲིད། །

ཡིན་ཡང་བདག་གི་འཚོ་བའི་གཞིས་ཀ་དེ། །

མཐའ་རྒྱ་ཆེ་ཆུང་ནམ་མཁའི་མཐོངས་དང་མཉམ། །

རང་ལ་མཚོན་ན་སྐྱེད་ཚལ་ཡངས་མོ་ཞིག །

དེ་ཡི་མཛེས་སྡུག་དཔོག་པར་དཀའ་བ་ཞིག །

དེ་བས་སྔར་བཞིན་འཚོ་བའི་གནས་མལ་དུ། །

མི་ཚེའི་ཕྲེང་ཐག་ངང་གིས་འཛད་གྱུར་ཀྱང་། །

སྐྱོ་ཆས་གདུང་བའི་སྨྲེ་སྔགས་མི་འདོན་པར། །

རྣོ་སྦྲེང་སྐུད་པའི་རྒྱུད་ནས་གཟབ་ནན་དུ། །

ཐོལ་བྱུང་སྐད་ཆའི་གླིང་དུ་འབུད་པར་ངེས། །

དེ་ལ་དགའ་བའི་མེ་ཏོག་ཟེགས་ཀྱང་ཆོག །

དེ་ལ་སྡང་བའི་ཟུར་མིག་བསྟན་ཀྱང་ཆོག །

སྤྱིར་ན་འཇིག་རྟེན་དགའ་སྐྱོའི་གཞིས་ཀ་ལ། །

མི་ཚོགས་མཐའ་དག་བྲེལ་བྲེལ་ངང་ནས་རྒྱུ། །

བདག་ཀྱང་དགའ་སྐྱོ་ཟུང་དུ་འབྲེལ་བའི་ལམ། །

མི་འགྲོ་བཤད་ཀྱང་ཨུ་ཚུགས་མཁྲེགས་པོ་ཞིག །

དེ་བཞིན་འདོད་པའི་གཏམ་དང་ཞེན་པའི་ཚིག །

མགྲིན་པ་བུ་གའི་ཁྲོད་ནས་རླུང་བཞིན་ལྡང་། །

དེ་ལ་ངོ་ཚའི་གཤིས་ཀ་རྣམ་སྤངས་ནས། །

འདི་དག་དོན་གྱི་འཚོ་བའི་གདམ་གསེས་ཤིག །