སྐུ་ལ་འོ་མའི་གང་བུ་རབ་གྲོལ་ཞིང་།།

གསུང་འཇམ་དབྱངས་ཀྱི་ལྷུག་མ་རང་དུ་གྲོལ།།

ཐུགས་ཀློང་ནམ་མཁའི་དབྱིངས་སུ་ཆོས་ཀུན་གཟིགས།།

རྒྱལ་ཡུམ་མཚོ་འཁྲུངས་མ་ལ་ཕྱག་འཚལ་ལོ།།

ཕྱོགས་མཐའ་སྲིད་ཞིའི་མེ་ཕུང་ག་པུར་མཆེད།།

ཉེ་བར་དུད་པའི་ལྗོན་པའང་སྲེག་ལ་བྲེལ།།

སྙིམ་པའི་མཚོ་ལ་གཉུག་མར་ངང་བཞུགས་ཀྱི།།

དབྱངས་ཅན་ལྷ་མོས་སྤྱན་དབུས་ད་ཕྱེ་མཛོད།།

ངན་རྟོག་མུན་པའི་དུད་སྤྲིན་མཁའ་ལ་འཕྱུར།།

རྐྱེན་ངན་འཐོར་རླུང་འཕྲལ་དང་འཕྲལ་གྱིས་གཡོ།།

འཕྱན་པའི་བདག་ལ་འདོད་སྲེད་རང་སོལ་གྱི།།

ལེགས་བྱས་མཚོ་མོའི་ཁྲུས་ལས་ད་འཁྲུད་མཛོད།།

སྤྱིར་ན་དབྱངས་ཅན་མི་རིང་གདེངས་ཀའི་རྩེར།།

ཉེས་བཤད་ཆུ་རིས་གསལ་བཞིན་མཆིས་ཀྱང་སྲིད།།

ལྟར་སྣང་བདག་བློའི་བདེན་འཛིན་བསལ་བའི་སླད།།

རྒུད་པའི་ཚ་གདུང་གཞོམ་ལ་ད་ཕེབས་མཛོད།།

བསམ་གཏན་ཀྱོ་བས་བདེ་ལ་རབ་བཞུགས་ནས།།

ཉམས་རྟོགས་གྲུ་ཆར་འཇོ་བའི་དབྱངས་ཅན་མས།།

སྙན་འཇེབས་དབྱངས་ཀྱི་རོལ་མོའི་སྟངས་སྟབས་ཉིད།།

ཐོས་འཛིན་བུ་གའི་སྙིང་པོར་སྤེལ་བར་མཛོད།།

རེ་དོགས་འཁྲི་ཤིང་ལྕུག་མའི་རྒྱར་ཚུད་པས།།

མི་བྱེད་དད་པས་དབྱངས་ཅན་འབོད་ལགས་ན།།

འདོད་རྒུར་སྒྱུར་བའི་ཚན་ཁ་མ་གནང་ཡང་།།

ཟབ་དབྱངས་སྙན་པའི་བྱིན་རླབས་ཆར་སྙིལ་མཛོད།།