ཕུགས་བསམ་རྨི་ལམ་རིང་མོ་སེམས་ན་ཁྱེར། །

ཕ་མའི་རེ་ཞེན་ལྕི་བོ་ཡིད་དུ་སྒོམ། །

ཕ་ཡུལ་དག་པའི་ཞིང་ཁམས་རྒྱང་དུ་བསྐྱུར། །

གམ་གཉིས་སྟོང་གིས་བཅད་དེ་ལ་ལུང་བརྒལ། །

རྙིང་མའི་གདན་ས་དྲུག་གི་ཡ་གྱལ་ཏེ། །

གྲུབ་དབང་རྫོགས་ཆེན་པ་ཡི་ཆོས་གྲྭའི་མཐར། །

སློབ་ཚོགས་པདྨས་འབུངས་པའི་སྐྱེད་ཚལ་དུ། །

སད་སེར་སྟོང་གིས་གདུང་བའི་མེ་ཏོག་རྙིང་། །

བརྩོན་དང་འབད་པ་རེ་ཞིག་བྱེད་ཁུལ་གྱིས། །

ལོ་དང་ཟླ་བའི་དུས་ཚོད་གློ་བུར་ངང་། །

མི་སྡོད་སྐད་ཅིག་འགའ་ལ་སོང་ན་ཡང་། །

ཁོ་བོ་རྨོངས་རྟུལ་རིགས་སུ་སྔར་བཞིན་གནས། །

དམིགས་འབེན་ཀུན་དང་འདྲ་བ་སེམས་སུ་ལྕི། །

སློབ་ཚོགས་ཕྱོགས་སུ་འཁོར་བར་རང་ཡང་སྐོར། །

ཀུན་གྱིས་ཐུན་མཚམས་བཅད་དུས་ངས་ཀྱང་གཅོད། །

མཐོ་དམན་རིགས་སུ་ཆད་པ་སྔོན་གྱི་ལས། །

མིག་ན་མཆི་མས་རབ་རིབ་སྒྲིབ་གྱུར་ཅིང་། །

གདོང་ལ་ནག་ནོག་ཚོན་གྱིས་ཡང་བསྒྱུར་ཏེ། །

ངག་ནས་ངུ་བའི་སྒྲ་སྐད་ཆེ་ན་ཡང་། །

ཤེས་རབ་མཆོག་གི་རྩལ་ཁ་ཅི་ལ་གྲོལ། །

ཕར་བལྟས་གཙང་ཞིང་ལྷོད་པས་སྐྱིད་ཅིག་རིག །

གཞིག་ན་མགོ་རེག་འདི་ཡང་སླ་མིན་ཏེ། །

ཡོན་ཏན་དཔལ་གྱིས་མཛེས་པ་མིན་རུང་ཡང་། །

འདུལ་ཁྲིམས་གཙང་མབ་ཞིག་ཀྱང་དཀའ་པོ་ཡོད། །