སྤྲིན་པས་རྒྱང་བལྟས་བྱེད་པ་ཡག་སྣང་ཅི་ཡོད། །

མིག་ཆུའི་ཟིལ་མ་འཐོར་བའི་སྟེས་དབང་ཞིག་རེད། །

འགྲོ་འདུག་བཞུར་ལམ་རིང་མོའི་མགྲོན་པོ་ཞིག་ལ། །

ཚིག་གིས་སྐེ་རྒྱན་བཏགས་པའི་སྣང་བརྙན་བསྟན་ཡོད། །

སྤྲོས་པའི་ཡིག་ཚོགས་སྤུང་བ་སྤྲོ་སྣང་ཅི་ཡོད། །

ནང་སེམས་ཞི་བའི་དབྱངས་སུ་སྡོད་ཐབས་ཤིག་རེད། །

དྲན་གདུང་གསེབ་ཏུ་སྦས་པའི་ཁ་དོག་སྣ་ཚོགས། །

བཤད་ཀྱང་རྫོགས་ཐབས་དབེན་པའི་གསང་བ་ཞིག་རེད། །

ཡིད་ཀྱི་དཀྱིལ་དུ་གནས་པའི་ཁྱེད་ཞལ་མཛེས་པོ། །

འཇའ་ཚོན་རི་མོས་དཀྲིས་པའི་སྣང་བ་དཀར་དམར། །

རྟོག་བཏགས་སྤྲོས་པ་ཞིག་གི་བརྗོད་དོན་ཁྱོད་ཡིན། །

འཁོར་བའི་དགའ་སྐྱོའི་ནང་གི་ལས་མཐུན་གཞོན་ནུ། །

མཚོ་འགྲམ་ངང་སེར་གཉིས་ཀྱིས་འཁྱུད་མོ་བྱས་པས། །

དུང་སེམས་བརྩེ་བའི་མེ་ཏོག་ཤུལ་དུ་ལྷག་འདུག །

སྣང་བ་དར་དཀར་རི་མོའི་མདངས་ལ་དམིགས་ནས། །

མི་ཤིག་དམ་ཚིག་མགུར་མའི་གཞས་ཆུང་བླངས་ཡོད། །

ཚེ་གཅིག་དྲན་ཤིང་ཆོག་པའི་སེམས་ཀྱི་མེ་ཏོག །

སྨོན་ལམ་བརྒྱ་ཕྲག་ཀློང་ནས་ལང་ཚོ་སྨིན་སོང་། །

རབ་དཀར་ཟླ་ཚེས་གསར་པའི་འཛུམ་ཆུང་ཞིག་གིས། །

ཕྱི་མའི་ཡུལ་དུ་ཕྱིན་ཀྱང་ཕྱིར་མིག་ལྷག་འདྲ། །

དམ་ཚིག་བུམ་པའི་ནང་གི་སྲུང་འཁོར་ཆ་གཅིག །

ལུས་ཀྱི་གྲིབ་མའི་གཟུགས་བཞིན་རྟག་ཏུ་འགྲོགས་ཡོད། །

ངག་གི་ཁ་ཏོན་མཚུངས་འདྲའི་དུས་ཀུན་བཏོན་ནས། །

དྲན་སེམས་གསེར་སྐུད་རིང་མོས་ཕྱི་ནང་བསྡམས་ཡོད། །

བཟང་ངན་གཏམ་གྱི་གླེང་མོལ་ཉན་འདོད་ཅི་ཡོད། །

རང་སེམས་རང་ལ་མ་ཁྲེལ་གཤིས་དེས་ཆོག་འགྲོ། །

གནམ་སའི་འགྱུར་ལྡོག་རྒོད་ཀྱང་སྐྲག་སྣང་གང་ཡོད། །

དམ་ཚིག་གཙང་མའི་མདངས་ལ་གས་ཆག་མེད་ཤོག །