བདག་ནི་ལྷ་ཡི་སྲས་གཅིག་ཡིན།།

སྐུ་དཀར་ཟླ་བའི་འོད་ཀྱིས་བྱུག།

དོ་ཀེར་ཚུགས་དང་མཐིང་མདོག་མཛེས།།

གཟི་བྱུར་སྤུད་པའི་ཐོར་ཅོག་རྒྱན།།

པདྨོ་འཛུམ་པའི་ཞལ་རས་ཀྱང་།།

མིག་ཟུང་སྦྲང་ཆར་ཐིགས་པ་ཆགས།།

སྨིན་མའི་མཆོག་སྦྱིན་ལྡིང་བ་དག།

འབུམ་པའི་རྒྱ་ཚ་ཞལ་དཀར་མཚུངས།།

ལུས་སུ་དར་གོས་ལྷབ་ལྷུབ་གཡོས།།

གོས་ཆེན་གསེར་མ་འབྲུག་རིས་ཅན།།

བརྗིད་པའི་ཉམས་ཀྱིས་གསོལ་བར་མཛད།།

ཁམས་གསུམ་བུ་མོའི་ཡིད་འཕྲོག་ནུས།།

ཡིད་དབང་འཕྲོག་པའི་ཚུལ་ནི་འདི་ལྟ་སྟེ།།

དཔེར་ན་དབང་ཕྱུག་གཙུག་རྒྱན་མཁར་འཕགས་ན།།

འདབ་མའི་མཛོད་དག་ཧ་ཅང་དགའ་བས་ནི།།

འཁུམས་པའི་ཡན་ལག་རེ་རེ་ལྷག་པར་བརྐྱངས།།

མཛེས་སྡུག་ཟེའུ་འབྲུའི་སོ་ཕྲེང་ཕྱི་རུ་འདོན།།

ཤིན་ཏུ་བདེ་དགའི་དྲི་བསུང་གློད་པར་བྱེད།།

དེ་ལྟར་བདག་ནི་ཁམས་གསུམ་ས་དགུ་འདིར།།

མངོན་པར་མཛེས་བྱེད་ཡིད་འོང་ལང་ཚོའི་དཔལ།།

སྙན་པའི་གྲགས་པ་རླུང་གི་རྒྱུ་བ་བཞིན།།

མ་ལྡང་མ་ཁྱབ་མ་ཡོད་ས་ནི་དབེན།།

མཛེས་སྡུག་སྤྲིན་དཀར་ཕང་བ་རུ།།

ཉིན་ཞིག་བདག་ནི་དེར་ལྷགས་ཏེ།།

མཁའ་ལམ་ཡངས་པོར་ཕར་ཚུར་བསྐྱོད།།

དེ་མར་བདག་གི་མདུན་རོལ་ན།།

ཞོ་གསར་སྤྲིན་པའི་སྟེགས་བུ་རུ།།

མཁའ་ཡི་མཛེས་བྱེད་མངོན་པར་བརྩེགས།།

མཁའ་འགྲོ་བྱེ་བ་ཁྲག་བརྒྱ་ཡིས།།

ལ་ལས་གར་གྱི་རྣམ་པར་རྩེན།།

ལ་ལས་རོལ་ཆ་འདྲ་མི་འདྲ།།

འབུད་བརྡུངས་དཀྲོལ་གྱིས་དབྱིངས་སུ་འགངས།།

དེ་དག་དབུས་ན་ལྷ་མོ་ཞིག།

སེང་གདོང་བརྐོས་པའི་ཁྲི་སྟེང་དུ།།

ཟླ་བ་པདྨའི་གདན་ཐོག་ལ།།

ཤིན་ཏུ་ཉམས་དགའི་ཚུལ་གྱིས་བཞུགས།།

ཨེ་མ་མཛེས་པའི་མཚན་དཔེ་ལས།།

སྐྲ་ལོའི་ལན་བུ་རེ་རེའང་།།

སྐྱེས་ཚུལ་ལྷག་ཏུ་བརྗོད་འདོད་ནས།།

དྲང་སྲོང་དག་གི་ནགས་ན་ནི།།

པོད་འཕྲིན་བྲག་གི་ཟླ་ལ་བརྩེགས།།

དའང་འདོད་ཡིད་མི་ཚིམས་པར།།

ཉིན་དང་མཚན་དུ་ལྷ་མོ་བརྗོད།།

ཁ་མཆུ་ལྕེ་སོ་ཟད་ལ་དོགས།།

ཇི་འདྲའི་མཚར་སྡུག་ཅན་གྱི་ལྷ་མོ་དེས།།

ངག་གི་ལྗོན་པའི་ཡལ་འདབ་མི་གྲོལ་ལ།།

གསུང་གི་ངད་ནི་ཅི་ཡང་མི་ལྡང་བར།།

ཅུང་ཟད་འཛུམ་དང་སྐྱེངས་པ་ཚུལ་ནི་བཟུང་།།

ངོ་ཡང་བསྐུངས་ལ་ལྟ་ཕོད་མིན་པའི་ཟོལ།།

སྣང་བརྙན་དེ་འདྲ་མཐོང་གྱུར་ཚེ།།

བདག་སེམས་སྐྱེད་མོས་ཚལ་དུ་ནི།།

ཡིད་དགའི་མེ་ཏོག་པདྨ་བཞད།།

དང་བའི་སེམས་ཀྱི་ཨུཏྤལ་འཛུམ།།

ཧ་ཅང་མགུ་བའི་རྐང་དྲུག་ལྡིང་།།

མྱོས་པའི་ཚུལ་དུ་དར་དིར་སྒྲོག།

ཟུར་མིག་གཤོག་ཟུང་བརྐྱངས་བར་བྱེད།།

མཛའ་གཅུགས་བོགས་ཕྱིར་ཕར་ཚུར་འཕུར།།

དེ་ནས་ལྷ་མོ་ཡིད་འཕྲོག་མ་དེ་ཡིས།།

ཆགས་པའི་ཟུར་མིག་གློག་དམར་གར་དུ་གཡོས།།

འདོད་པའི་གཏམ་གྱི་སྒྲ་བརྒྱ་པ་ཡང་སྒྲོག།

མྱོས་པའི་མངལ་ཆུའི་ཆར་བ་འབབ་པར་རྩོམ།།

སྨོན་པའི་ཉི་འོད་ཡིད་བཞིན་འཆར་ཙ་ན།།

གཏན་གྱི་འདུན་མའི་དབང་གཞུ་མིག་སྔར་བཞུགས།།

ཀུན་ཏུ་མཛེས་པར་སོ་སྐྱེ་མ་ལུས་པས།།

དགའ་ཞིང་བསྟོད་ལ་ཡིད་སྨོན་འཆོར་བའི་གནས།།