ལོ་ཟླ།

ལོ་ཟླ་ག་ཙམ་འགྱུར་ནས་དུས་བསྐལ་བ་མཐའ་མ་ཚེས་པའི་ཚེ་ན་ཡང་། དབྱར་འདི་ཡི་མཛེས་པ་མཐའ་བདག་གི་དྲན་འཛིན་གྱི་ཡོལ་བའི་ངོས་སུ་ཡལ་ཐབས་མེད། ཆེས་མཐའ་མཇུག་གི་དག་ཞིང་དུ་འབོད་པའི་ཡུལ་གྲུ་འདི་ནས། ངས་རང་ཉིད་ཀྱི་མེས་པོ་དམ་པ་དྲན་པའི་ང་རྒྱལ་གྱི་གླུ་ཞིག་ལེན་ནས་སྟོང་གསུམ་འུར་གྱིས་བཀང་ན་འདོད།

ཡང་སྙིང་།

མདུན་གྱི་མེ་ལོང་ངོས་སུ་རང་ཉིད་ཀྱི་གྲིབ་གཟུགས་ལ་ཡང་ཡང་བལྟས་ནས། གངུ་དུ་སོང་བའི་རྐང་རྗེས་རེ་རེ་ནས་བྲིས སྐྱེ་རྒ་ན་འཆིའི་གོ་རིམ་བྲིས། འཇིག་རྟེན་གྱི་མཛེས་སྡུག་བྲིས། ཡང་སྙིང་བོར་བའི་ནམ་མཁའ་བྲིས། མཁོས་ཀ་ཞན་པའི་མི་ཚོགས་བྲིས། དུས་ཐ་མའི་རང་ཉིད་དངོས་མ་ཞིག་བྲིས་ཏེ་ནམ་མཁའ་རུ་རླུང་ལ་སྤུར་འཇོག། ཁ་ཕྱོགས་བོར་བའི་ང་དང་འདྲ་ང་འདྲ་ཞིག་གི་ལག་ཏུ་འཕྲོད་པར་ཤོག་ཅེས་རེ་སྨོན་བྱས། གལ་ཏེ་རྙེད་པར་གྱུར་ན་ད་གཟོད་འཇིག་རྟེན་གྱི་ཡང་སྙིང་རྟོགས་ཡོང་།

དན་རྟགས།

ལོ་རྒྱུས་ཀྱི་རྟ་ཁ་སུས་ཀྱང་བསྒྱུར་མི་ནུས། དུས་ཀྱི་གཡོ་སྐྱོམ་སུ་གང་གིས་ཀྱང་རྡོག་མི་ནུས། ང་ཡི་མེས་པོའི་བཞག་པའི་སྲ་ཞིང་མཁྲེགས་པའི་རྡོ་ཡི་ཕ་བོང་། གསེར་གྱི་གླེགས་བབ་ངོས་ཀྱི་ཡིག་འབྲི་རེ་རེ་སྲིད་པའི་གངས་རི་དང་མཉམ་དུ་འཚོ་བཞུགས་བྱེད་དགོས་ཞེས་བདག་གི་ཡིད་ཀྱི་གཏིང་རིམ་ནས་སྨོན་པ་གྲངས་མེད་བྱས། ང་ཡི་ཚེ་སྲོག་གི་བཞུར་རྒྱུན་དྭངས་མོ། སྲིད་པའི་ཁམས་ཆེན་པོ་འདི་ཆོབ་སྒྲ་དང་བཅས་ཏེ་འབར་ན་ཡང་། ཁྱོད་རང་འགྱུར་བ་མེད་པའི་གཡུང་དྲུང་ལྟར་བརྟན་པོར་བཞུགས་དགོས།

ཡི་ཆད།

ད་ལྟ་ཕྱི་ནང་སྐྱེ་དངོས་ཡོད་ཚད་གསོན་ཤུགས་རྒྱས་ཏེ། མེ་ཏོག་སྣ་ཚོགས་བཀྲགས་མདངས་འཚེར། ང་ཡི་སེམས་ཁམས་ཀྱང་རྒྱུན་ལྡན་ལས་རྡབ་ཉིས་འགྱུར་གྱིས་དྭངས་ཤིང་གསལ། ལས་ཀྱི་རླུང་བུ་འཇམ་པོ་སིལ་སིལ་གཡུག་ནས་ངོ་གདོང་བྱིལ་བྱིལ་གནང་། འདས་དོན་གྱི་རི་མོ་སྣ་ཚོགས་མེ་སྟག་མཆེད་པ་ལྟར་འཚུབ། ཡང་བསྐྱར་དྲན་པའི་སྒོ་མོ་བརྡུངས་ནས། འདང་རྒྱག་གཞན་ཞིག་གི་ནང་དུ་ལྷུང་། ཇི་ལྟར་བྱས་ཀྱང་བདག་གི་ཡིད་ལ་སིམ་པའོ་རྒྱ་སེའུ་མེ་ཏོག་མཐོང་དུ་མེད། རེ་སྒུག་ལ་མཐའ་མེད་ཅེས་ཁ་ཚོན་བཅད་ཆོག་ཀྱང་། མི་ཚེའི་མཇུག་སྡོམ་ནམ་རྒྱག་ངས་ཀྱང་ཤེས་ཀྱང་མེད་པས་ང་ལ་དཔའ་གདེངས་མི་འདུག།