མཐར་ཕྱིན་ལ་ཉེ་བའི་རང་གི་སློབ་བུ་དག་ལ་ཕུལ།

གང་གི་སྔོན་བསགས་ལས་ཀྱི་ནུས་མཐུ་ལས།།

ད་རེབ་རང་ཅག་འཛོམས་པའི་སྐལ་བ་བྱུང་།།

དུས་ཐུང་འཛོམས་པའི་རྟེན་འབྲེལ་འདི་འདྲ་ལ།།

ལྷག་བསམ་གཙང་མས་གྱེས་ཕྱག་ཚིག་གསུམ་འཇོག།

ང་རང་ཁྱེད་ཚོར་བསྡུར་ན་ཆེ་ཙམ་རེད།།

མི་གཤིས་ལྷད་མེད་ཁྱེད་ཅག་ང་ལས་ཡག།

དཔེ་ཆ་བཀླགས་པ་ཁྱེད་ཚོའི་མང་ཙམ་མོད།།

བློ་རིག་འབད་བརྩོན་ཁྱེད་ཅག་ང་ལས་ལྷག།

སྐྱེས་ཆེན་གསེར་རིའི་ཕྲེང་བའི་སྐུ་དྲིན་ལ།།

གངས་ལྗོངས་གཙུག་ལག་རིག་གནས་འཛད་མཐའ་མེད།།

ཐོས་བསམ་བསྐྱེད་མཁས་བདག་གི་སློབ་བུ་ཚོས།།

ཆོག་ཤེས་མ་བརྟེན་ཧམ་སེམས་ཆེན་པོས་སྦྱོངས།།

རང་གི་མི་རིགས་གང་ཡིན་མེས་པོ་སུ།།

ཆ་ལུགས་ཡུལ་སྲོལ་གོམས་གཤིས་གང་ཡིན་པ།།

རང་གི་མིང་ལ་ཅི་དང་རུས་གང་གཏོགས།།

ཕར་བཤད་ལོ་རྒྱུས་སྨྲ་བའི་ཚིག་གསུམ་དགོས།།

དེང་རབས་ཚན་རིག་ལག་རྩལ་གང་དར་ཡོད་།།

སྤྱི་པའི་རིག་གནས་འཕེལ་ཕྱོགས་གང་ཡིན་པ།

རྒྱལ་སྤྱིའི་གསར་འགྱུར་གནད་བསྡུས་གང་ཡོད་སོགས།།

དེང་རབས་རིག་པ་བཤད་པའི་ལྕེ་ཡང་དགོས།།

སྐད་རིགས་མི་འདྲ་མང་པོར་སློབ་པ་དང་།།

ཡིག་རིགས་མི་གཅིག་སྣ་མང་སྦྱོང་བ་སོགས།།

ཤེས་བྱའི་གནས་ལ་འཛད་མཐའ་མེད་མོད་ཀྱང་།།

རང་གི་སྐད་ཡིག་གཞན་དང་མི་སྦྲགས་གལ།།

སྤྱི་ཚོགས་རྙོག་འཛིང་ཆེ་ལ་འདུ་འཛི་རྒོད།།

མི་ཚེའི་རི་ལ་ཉིན་སྲིབ་གཉིས་ཀ་ཡོད།།

འགྲོ་བའི་ལམ་དུ་འགོག་པའི་རྡོ་ཡང་སྲིད།།

སྙིང་རུས་བསྐྱེད་དེ་མདུན་སྐྱོད་སྤོབས་པ་དགོས།།

སྙན་པའི་སྐད་ཆ་སུ་ཡི་ཡང་ཁ་རུ་ཡག།

རྩེ་དགོད་བར་ནས་བསླུ་བའི་མི་ལ་གཟོབས།།

ཤ་ཚའི་སྙིང་གཏམ་རྣ་རུ་མི་སྡུག་མོད།།

མ་འོངས་མི་ཚེའི་གདམ་ངག་ཡིན་པར་སོམས།།

སྐབས་རེར་ཕྱི་བྱོལ་བྱེད་པའི་བཟོད་སྒོམ་དང་།།

ལན་རེར་གདོང་མཆོང་བྱེད་པའི་དཔའ་གདེང་དགོས།།

དཀར་ནག་མདུད་པ་བཀྲོལ་བའི་དྲང་བདེན་དང་།།

ལེགས་ཉེས་ཡག་སྡུག་འབྱེད་པའི་བློ་ཡང་དགོས།།

བདེན་པའི་སྐད་ཆ་སུ་ཡི་ཁ་རུ་ཡོད།།

གནས་ལུགས་འདིའོ་སུས་ཀྱང་བཤད་ཤེས་མོད།།

རང་གི་གནས་ལ་ལག་ལེན་འོང་བའི་མི།།

ཉིན་མོའི་སྐར་མ་མོ་གཤམ་བུ་དང་མཚུངས།།