འཇིག་རྟེན་འདི་ནས་མི་གཉིས་མཉམ་དུ་འཛོམས་ཤིང་། བློ་ཞིབ་མོས་རང་གི་ཚོད་ཀྱིས་འཁོར་བ་ཟེར་བའི། དཀའ་སྡུག་གི་ལམ་རིམ་ཀྱག་ཀྱོག་ཅིག་ལ་འཐིམ་ཞིང་། མི་ཚེ་གང་བོར་མགོ་ཡི་སྐྲ་ལོ་རླུང་ཁར་ཟད་ནས། ཚེ་ཡི་རླུང་རྟ་མི་ཚོགས་ཀྱིས་རྒྱ་མ་བཀྱག་དགོས་བྱུང་སོང་བ་དང། སྐྱེ་བ་འདི་ནས་དུས་ངེས་མེད་དུ་མི་ཞིག་ལ་ཁྲེལ་གཞུང་འཚོ་དགོས་ཤིང་། རྒྱུ་མཚན་མེད་པར་གྱེས་བྲལ་གྱི་སྐྱོ་གདུང་མྱོང་དགོས་ཡོད། སྐབས་དང་སྐབས་སུ་རྒྱུ་དང་གོ་ས་མེད་ན་འཇིག་རྟེན་འདིར་གསོན་ཡོད་པ་ཡང་ཤེས་ཀྱིན་མི་འདུག། སྐྱེས་པ་ནས་ང་རང་འཆར་ཡན་ལ་ཧ་ཅང་ཧ་ཅང་དགའ་བའི་མི་ཞིག་ཡིན། ལྷིང་འཇགས་ངང་དུས་ཚོད་མང་ཆེ་བར་སྙན་ངག་འབྲི་བའི་ལས་ལ་འབད་ཅིང་། འདི་དག་རེ་རེས་ང་རང་དབྱངས་གསལ་ལ་དགའ་བའི། བོད་ཀྱི་བྱིས་པ་ཞིག་ཡིན་པ་གསལ་བྱེད་ཐུབ་པར་ཡིད་ཆེས་བྱས། ག་དུས་ཡིན་ཡང་ང་རང་མི་ཚོགས་ཀྱི་རྫོང་ཐུག་པོའི་དཀྱིལ་དུ་ལྷུང་བར་ཧ་ཅང་ཞེད་སྣང་སྐྱེས་ཀྱིན་ཡོད། གྲོང་ཁྱེར་གྱི་གྲུ་ག་རེ་རེ་ནས་ཚོད་ཚོད་ལ། སེམས་ཀྱི་ཟབ་སར་གནས་པའི་ཕ་ཡུལ་གྱི་རི་ཆུ་ནགས་གསུམ་དྲན་ཞིང་། ཆུང་དུས་འུ་གཉིས་སྐྱེ་ས་འཚར་སའི་ས་ཆ་རེ་རེ་ནི། ཨུ་ཚུགས་ཀྱིས་མི་ཞིག་གི་རྨི་ལམ་བསྲུངས་བ་ལྟར་བརྗེད་ངེས་ཀྱིས་གང་ཞིག་ཏུ་ཁྱེར་འགྲོ ཚེ་ཐོག་འདིར་སྙིང་ཉེ་བའི་མི་ཞིག་གི་བརྩེ་བ་ཐོབ་ཐབས་མེད་པ་དེ་ནི། རང་ཉིད་དངོས་མ་ཞིག་བཅའ་མ་ཐུབ་པ་དང་འདྲ་པོ་འདུག།

ཚེ་ཕྱེད་ཀྱི་དུས་ཚོད་སྒྱིག་ལུག་གིས་བསྐྱལ་ཅིང་། སྙིང་ཉེ་བའི་མི་ལགས། ཁྱོད་དང་ཁ་བྲལ་དགོས་པ་ནི། མ་བུ་གསོན་བྲལ་གྱི་སྡུག་བསྔལ་དང་འདྲ་པོ་འདུག་ཨང་། བཀྲེས་སྐོམ་གྱིས་གདུང་བའི་རྟ་ཕོ་ཞིག་ལྟར་སྨག་ནག་ཅིང་མཐུག་ན་ཡང་། བརྩེ་དུང་གི་སྲང་ལམ་འདི་ཅིས་ཀྱང་བགྲོད་དགོས། སྙིང་ལགས། རྒྱ་ནག་ཧྲང་ཧེ་ནས་ཁྱོད་ལ་ཕ་ཡུལ་དྲན་པའི་གདུང་བ་ཧ་ཅང་ལྕིའམ། སྐད་འཕྲིན་བརྒྱུད་དེ་བསྐུར་བའི་འདྲ་པར་མཐོང་འཕྲལ་ང་ཡི་ནང་སེམས་སུ། རྨི་ལམ་དང་སྡུག་བསྔལ་སྤུངས་ཤིང་འཆི་བ་དང་མྱ་ངན་དྲུད་ཡོང་། འདུ་འབྲལ་གྱི་འཁོར་བའི་ནང་ནས་ཐ་ན་རང་ཁ་ཡང་། གསོ་མི་ཐུབ་པའི་དཀའ་ཁག་ལ་འཕྲད་མྱོང་། འཆར་གཞི་མེད་པའི་འཚོ་བའི་ནང་ནས་འཆར་གཞི་མེད་པའི་མི་དང་འཕྲད་པ་ཧ་ཅང་མང་། ཚེ་ཕྱེད་ས་མཐའ་ནས་དུས་ཚོད་བཏང་སོང་བའི་ང་དང་ངའི་གྲོགས་པོ་རྡོ་རྗེ། ས་སྲོས་དང་འབྲེལ་བ་ཅི་ཡང་མེད་པའི་འབབ་ཚུགས་རྗེས་མའི་བརྩེ་དུང་། མཐའ་མཇུག་གི་གྱེས་གདུང་སེམས་ཁྲལ་གྱི་བསྡུས་པའི་དུས་ཚོད་ནང་དུ་གཡོས། སྙིང་ཉེ་བའི་མི་ལགས། ནམ་ཚོད་ཅིག་ལ་ཁྱེད་རང་བདེ་ཐང་ངང་ཕ་ཡུལ་དུ་ལོག་ཐུབ་བམ།