བཀའ་དྲིན་གཞལ་མཐའ་བྲལ་བའི་ཨ་ཕར་ཕུལ།

ངའི་དྲན་ཤེས་ཀྱི་གཤོག་ཐོགས་ངོགས་ནས་ཁྱེད་ཉིད་མ་དྲན་པའི་དུས་སྐབས་མེད་ལ། ཡོད་ཚད་བུ་ཕྲུག་གི་ཆེད་དུ་བློས་གཏོང་ཕོད་པའི་རླབས་ཆེན་གྱི་དཔའ་མཛངས་མངའ་བའི་མི་ཕོ་ཁྱེད་རྣམ་པ་ཀུན་ངའི་དབུགས་དབྱུང་དང་འཁྲེན་ཞེན་གྱི་དབྱིངས་སུ་འཁྲིལ། ཁྲུང་ཁྲུང་ཤུགས་གླུ་ལེན་བཞིན་ལྷོ་རུ་འཕུར་ཞིང་རྐང་དྲུག་གཤིག་གླུ་གྱེར་བཞིན་ཚང་དུ་འཛུལ། ང་དང་ཤུལ་བཞག་གི་ལོ་མ་སེར་པོ་ཤུལ་དུ་ལུས་པ་ཚོར།

མི་ལོ་བཅུ་ཕྲག་གི་ཡར་སྔོན་ཞིག་ལ་ང་ལ་གློ་བུར་དུ་གྲང་རླུང་ཞིག་ཐོལ་གྱིས་ལྡང་། སྨྲེ་སྔགས་ཀྱི་ཀློང་ནས་ས་གཞིའི་ངོ་གདོང་ཉམས་ཤིང་སྡོང་རྒན་གྱིས་སྐྱོ་གླུ་རླུང་ལ་བསྐུར། འཆི་བདག་གི་དཔུང་ཚོགས་ངར་མས་ཨ་ཕའི་བརྡོལ་རལ་གྱི་ལྷམ་ཆུང་འཕྲོག །ཨ་ཕའི་དུང་སེམས་ལ་བརྒྱུས་པའི་མུ་ཏིག་གི་ཕྲེང་ཚོགས་སྡུག་བསྔལ་གྱིས་བཟི།

ཨ་ཕ། ཁྱེད་ཀྱིས་འགྲོ་བའི་ཁམས་འདིར། ལྗང་མདོག་གི་ཚེ་སྲོག་མང་པོ་ཞིག་ནར་སོན་པར་རེ་སྒུག་ཅི་འདྲའི་ལྕི་ཨང་། རེ་སྨོན་དང་རྨི་ལམ་ཡོད་ཚད་ཤུལ་དུ་བཞག་ནས་འདོད་ཧམ་གྱི་མུན་པའི་རྔམས་ཁ་ཧ་ཅང་མཐུག་པའི་མི་ཡུལ་འདི་དང་ཁ་གྱེས།ལོ་རྒྱུས་ཀྱི་གཅོང་རོང་དུ་ལྷུང་བའི་དྭ་ཕྲུག་ཅིག་སྡུག་ཡུས་གྲངས་མེད་བརྒྱུས་ནས་དུར་ཁྲོད་འཚོལ། ཨ་ཕ་དང་བྲལ་བས་མི་ཡུལ་ནས་མཐོང་མི་ཐུབ་པ་མང་པོ་ཞིག་ངའི་ཕྱོགས་བཞི་མཚམས་བརྒྱད་ན་ལྕགས་རི་ལྟར་འགྱིང་བས་ང་ལ་རྫོགས་མཐའ་བྲལ་བའི་སྡུག་བསྔལ་རང་གི་བྲང་ཁོག་གི་ཟབ་སྦས་ཡོད།

སེམས་དཔའ་ཆེན་པོ། ཁྱེད་ཡོད་དུས། ང་ལ་རྩེད་མཚར་དང་འཛུམ་མདངས་ཡོད་ལ། ཉི་མ་དང་རྩྭ་ཐང་ལུ་གུ་མང་བའི་སྤང་ལྗོངས་ནས་ཁེར་རྩེད་རྩེ་ཆོག །ཁྱེད་ཡོད་དུས། ངས་ཉི་མ་རེ་ལ་ཨ་ཕ་ཞེས་ཁྲི་སྟོང་མང་པོ་འབོད་ཆོག་ལ། རྨི་ལམ་གྱི་འཇབ་རྒོལ་ཐུབ་དུས་ཁྱེད་ཉིད་བཙལ་ཆོག །

སེམས་དཔའ་ཆེན་པོ། ཁྱེད་མེད་དུས། ངས་རང་ཉིད་ལ་ཅི་ཡང་མེད་པ་ངང་གིས་ཚོར། འཇིག་རྟེན་འདིར་ཐོབ་ཆོག་པ་མང་པོ་ཞིག་རྒྱང་རིང་རྒྱང་རིང་ཞིག་ཏུ་མཆིས། ཁྱེད་མེད་དུས། བསམ་གཞིག་གང་མང་ཞིག་གིས་ང་རང་སྡུག་བསྔལ་གྱི་ཕ་མཐར་བསྐྲད། ཁྱེད་ཀྱི་འཛུམ་དམུལ་དང་སེམས་གཏམ་རེ་རེ་ཐག་རིང་ཐག་རིང་ཞིག་ཏུ་ཆས།

སེམས་དཔའ་ཆེན་པོ། ཁྱེད་ཀྱི་བྱམས་བརྩེའི་ལེའུ་རེ་རེ་ཀློག་སྐལ་མ་བྱུང་བའི་བཟོད་དཀའ་བའི་སྡུག་བསྔལ་འདི་སུ་ལ་བཤད། སེམས་ཀྱི་གསེབ་ཏུ་སྦས་པའི་གདུང་སེམས་ཀྱི་དབྱངས་རྟ་རེ་རེ་དེ་སུ་ཞིག་གིས་མཉན་སྲིད།