ང་རང་ཁྱེད་དང་མཉམ་དུ་མཐོན་པོ་རི་རྒྱལ་དང་དམའ་མོ་རྒྱ་མཚོར་འཕྲད་མྱོང་། ཡིན་ན་ཡང་ངས་མིག་རྒྱང་རིང་སར་མི་མཐོང་ཡང་མིག་རྒྱང་རིང་སར་བལྟས། ཅིས་ཀྱང་རི་རྒྱལ་གྱི་ཕ་རོལ་ན་ང་ལ་དབང་བའི་འཚོ་བ་མངར་མོ་ཞིག་ཡོད་པར་འདོད་ནས་སེམས་ཤུགས་ལྷོད་མ་མྱོང་། གང་ལྟར་རྒྱ་མཚོ་འདིའི་གཏིང་རིམ་ན་ང་ལ་དབང་བའི་དགོས་འདོད་ཀྱི་ནོར་བུ་ཡོད་པར་འདོད་ནས་སེམས་ཀྱི་དད་འདུན་ལ་གས་ཁ་ཤོར་མ་མྱོང་།

ང་རང་འདི་ལྟར་ལམ་ལ་ཆས་ཀྱིན་རྟག་ཏུ་ལམ་ལ་ཆས་འདོད་ཡོད། མ་ཟད་ཁྱེད་དང་ལྷན་དུ་ལམ་ལ་ཆས་འདོད་ཡོད། ཁྱེད་ཉིད་ནི་ང་ལ་མཚོན་ན་མེད་ཐབས་མེད་པ་ཞིག། སེམས་ཀྱི་དྲོད་ཁོལ། ཡིད་ཀྱི་དྲན་རྟེན། མིག་གི་དགའ་སྟོན། ལུས་ཀྱི་ཟུངས་ཁྲག ངག་གི་འགྱུར་ཁུགས། ཡོད་ཚད་ནས་ཡོད་ཚད་དུ་ཁྱེད་རང་ཁོ་ན་ལས་མ་མཆིས་སོ། །

ཁྱེད་ཉིད་ཀྱིས་མནོ་བསམ་གང་ཡང་མི་གཏོང་བར་དྲན་འཛིན་གྱི་མེ་ལོང་ངོས་སུ་གང་ཤར་ཐམས་ཅད་ང་ལ་མ་བསྟན་རོགས། ཤར་ཤར་ཚང་མ་ལྟ་བྱ་མིན་ལ་སྙིང་པོའང་མེད། དེ་བས་ཁྱེད་ཀྱིས་བསམ་གཞིགས་ཤིག་གཏོང་བ་ལ་རེ་བ་ཡོད། ཁྱེད་ཀྱིས་ཐོས་འཛིན་གྱི་བུ་ག་རུ་ཐོས་ཐོས་ཚང་མ་ང་ལ་མ་བཤད་རོགས། བཤད་བཤད་ཚང་མ་ཉན་བྱ་མིན་ལ་དགོས་དོན་ཡང་ཆུང་། དེ་བས་ཁྱེད་ཀྱིས་ཐུགས་སེམས་ལྷོད་ལྷོད་ངང་བསམ་གཞིགས་ཀྱི་པ་ཏྲ་ཞིག་འབྲི་བ་ལ་རེ་འདོད་ཤིན་ཏུ་ཆེ་ལགས།

མདོར་ན “བྱས་རྒུམ་རྒུམ་ཚང་མ་འབུ་མིན། ། མིས་བཤད་བཤད་ཚང་མ་གཏམ་མིན། །” ཟེར་བ་ལྟར་གང་འདོད་ཀྱི་འཆལ་གཏམ་ཞིག་ང་ལ་མི་བཤད་པར “བརྒྱ་བཤད་ཚིག་གི་རྩ་བ། ” ཟེར་བ་བཞིན་ཡང་སྙིང་གསོན་པོ་དེ་བཤད་རོགས།

ཁྱེད་ཀྱིས་ཐུགས་སེམས་གང་ཡང་མི་གཏོང་བར་ཕྱོགས་བཞི་མཚམས་བརྒྱད་ཀྱིས་གཏམ་འཆལ་ཚོ་ང་ལ་བཤད་ན་ནི། ངས་རང་ཉིད་ཀྱང་བོར་འགྲོའོ།།