མི་རིགས་འཕེལ་འགྲིབ་དུས་ཀྱི་འགག་སྒོ་རུ།།

ཉག་ཕྲའི་སྐད་ཡིག་ཚེ་སྲོག་གསོ་བའི་མགོན།།

ཉན་ཐོས་རྒྱལ་བ་ལྟ་བུའི་སེམས་དཔའ་ཁྱེད།།

ཤུལ་ལུས་གདུལ་བྱ་བསྐྱུར་ནས་གང་ལ་ཕེབས།།

འཇམ་པོའི་ངག་གིས་བསྐལ་ལྡན་གྲངས་མེད་ལ།།

དབྱངས་དང་ཐུགས་ཀྱི་བྱིན་ལམ་རྫོགས་མེད་བསྩལ།།

གྲགས་སྙན་བ་དན་ཆོལ་གསུམ་གཡོ་བའི་མགོན།།

པ་ཕ་རྒྱལ་མཆོག་ཁྱེད་ཉིད་གང་དུ་གཤེགས།།

སྐུ་ལུས་ཁྲི་གདུགས་གངས་དཀར་རྩེ་ནས་འཕྲོས།།

གསུངས་ངག་བདུད་རྩིས་སློབ་བུའི་སྐོམ་གདུང་སེལ།།

ཐུགས་རྗེ་དབྱེར་མེད་དར་མདོ་གྲོང་ཁྱེར་ནས།།

རིགས་ཀྱི་མྱུ་གུ་བསྐྱངས་པའི་སྐུ་དྲིན་དྲན།།

མཁས་པའི་མཛད་པས་རིག་པའི་གནས་བཅུ་སྤེལ།།

བསླབ་པ་གསུམ་གྱིས་བོད་ཀྱི་གཤེས་སྤྱོད་བསྐྱངས།།

དུས་གསུམ་ཀུན་ཏུ་གཟི་བརྗིད་བདག་ཉིད་པོར།།

སྒོ་གསུམ་གུས་པས་དད་པའི་གཙུག་ན་མཆོད།།

བརྡ་སྤྲོད་འཆད་ལ་ཟླ་མེད་སེང་གེའི་རྩལ། །

འཚོ་བྱེད་སྨན་གྱིས་ཉམ་ཐག་ཚེ་སྲོག་གསོ།།

ལོ་རྒྱུས་སློབ་གསོ་རྩོམ་རིག་སྨྲ་བའི་ངག།

འགྲན་མེད་སློབ་དཔོན་དམ་པའི་སྐུ་དྲིན་དྲན།།

རིག་གསར་དུས་རླུང་འཚུབ་མོས་མ་བསྒུལ་ཅིང་།།

སྟོན་པའི་ཚུལ་ཁྲིམས་ཀ་ཆེན་མ་འགྱེལ་བའི།།

སྤྲུལ་བའི་སྐུ་རུ་བཞེངས་པའི་སེམས་དཔའ་ཁྱེད།།

གངས་ཅན་ཆོས་རིག་བསྐྱངས་བའི་སྐུ་དྲིན་ཅན།།

ཡང་སྲིད་ཉི་མ་གཞོན་ནུའི་ཟེར་མདངས་ཅན།།

མི་རིང་གདུལ་བྱའི་མགོན་དུ་ལེགས་ཤར་ཏེ།།

སྐྱེས་ཐོབ་ཤེས་རབ་ཅན་གྱི་ཁྱེའུ་ཞིག །

ཆོས་རིག་ཁྲི་ཆེན་སྟེང་ན་མྱུར་འབྱོན་ཤོག །

མགོན་ཉིད་ཞིང་གཞན་བརྗེས་ཚུལ་ཐོས་པས་ན།།

སྐྱོ་སེམས་དྲག་པོས་གདུང་བའི་རྗེས་དྲན་འདི།།

གོ་དྲུག་སློབ་བུ་ཚེ་རིང་ནད་མེད་དེས།།

རྟའུ་གཤིས་ཆུ་རིང་མོའི་འགྲམ་ནས་སྦྱར།།