ཕ་ཡུལ་ནི་དྲན་གདུང་དང་ཞེན་ཆགས་

ཀྱི་འཁྲེང་སེམས་སྣུམ་པོ་ཞིག།

ཚོར་སྣང་གང་མང་ཞིག་གི་བློ་ཕུགས་བཅོལ་ས་ཡིན།

ཕ་ཡུལ་ནི་སྙན་ངག་དང་དུང་སེམས་

ཀྱི་མེ་ལོང་བཙའ་རོ་ཞིག།

དགའ་སྐྱོ་རྫོགས་མེད་ཅིག་གི་སེམས་པ་གླན་ས་ཡིན།

ཕ་ཡུལ་ནི་རེ་བ་དང་རྨི་ལམ་གྱི་ཟེའུ་འབྲུ་མངར་མོ་ཞིག།

ཕྱིར་མིག་ཁྲི་ཕྲག་གི་དབུ་ཁྱུད་འབྲི་ས་ཡིན།

ནམ་ཡང་ཕ་ཡུལ་གྱི་མཛེས་དཔལ་ལ་ཞེན་

པའི་མིག་ཟུང་གཉོམ་པོ་འདིའི།

དྲན་ངོས་སུ་ཡལ་མི་ནུས་པའི་རི་ཆུ་ཞིག་

ལྷོད་ཀྱིས་བཤམས་ཡོད།

ཟླ་བ་སྒོར་སྒོར་དུ་སྣང་བའི་རི་གྲོང་དེ་ནི་ངའི་ཕ་ཡུལ་ཡིན།

དྲན་པ་ལྷོག་ལྷོག་ཏུ་འཕྱུར་སའི་ཡུལ་སྡེ་

དེ་ནི་ངའི་ཕ་ཡུལ་ཡིན།

རང་ཉིད་རང་ལ་དབང་བའི་རྨི་ལམ་

འཚོལ་སའི་ཡུལ་སྡེ་སྨུག་པོ་སྟེ།

ཡིད་སེམས་སུ་འཁོར་སླ་ཞིང་ནམ་ཡང་ཕྱིར་

ལོག་འདོད་སའི་ས་ཆ་དེ་ཅི་ལ་མིན།

ས་ཆེན་གྱི་ཕྲག་སྟེང་ལ་བུད་ཡོད་མཁན་ཁྱེད་

རང་ཡིན་པས།

སྒམ་བརླིང་དང་གཟབ་ནན་ཁོ་ན་

ཁྱེད་ལ་འཚམས་པའི་རུམ་དྲོ་ཡིན།

འཇིག་རྟེན་གྱི་རང་བཞིན་རྟོགས་ཡོད་

མཁན་ཡང་ཁྱེད་རང་ཡིན་པས།

སྟོང་ཉིད་དང་སྙིང་རྗེ་རྐྱང་བ་ཁྱེད་ཀྱི་མཐའ་

འཁོར་ལ་འཁོར་བའི་མཁའ་དབུགས་ཡིན།

ཁྱེད་རང་ཁོ་ན།

རང་ཉིད་ལ་དབང་བའི་འཇིག་རྟེན་ཞིག་གི་བདག་པོ་ཡིན་ཞིང་།

རེ་སྨོན་དང་དད་འདུན་གྱིས་སྐྱོར་བའི་ཞིང་ས་ཡིན།

ཀི་རིང་ལན་གསུམ་སྐྱོར་དུས།

རྒྱང་རིང་སྦྲ་ནག་འགྲམ་གྱི་སྒོ་ཁྱི་

གཉིད་ལས་དཀྲོགས་ས་ཕ་ཡུལ་ཡིན།

ཤུག་གླུ་ཐེངས་གསུམ་སྐྱོར་དུས།

གཡུ་གཞོང་ཐང་ཆེན་སྔོན་མོར་སྙེ་མའི་

མགོ་ལྕོག་ལྡེམ་ས་ཕ་ཡུལ་ཡིན།

བློས་བླངས་ཀྱིས་བཞེངས་མི་ནུས་པའི་

གཟུགས་བརྙན་གང་ཞིག།

ཡུལ་འདིའི་རི་ཆུ་ལུང་གསུམ་གྱི་མཛེས་པ་རུ་ཤར་ཡོད་ཅིང་།

དབྱངས་གསལ་གྱི་བརྗོད་མི་ནུས་པའི་ཞེན་ཆགས་གང་ཞིག།

ཡུལ་འདིའི་འདས་མ་ད་གསུམ་གྱི་ཕྲེང་བ་རུ་བརྒྱུས་ཡོད།

ཕ་ཡུལ་གྱི་ནམ་མཁའ།

ཕ་ཡུལ་གྱི་སྤྲིན་དཀར།

ཉི་ཟླའི་བྱིན་རླབས་ཀྱིས་བསྐྱངས་པའི་ར་བ་གོར་གོར།

སྐྱེ་འགྲོའི་བརྩེ་སེམས་ཀྱིས་བསྐྲུན་པའི་སྒོ་ར་གྲུ་བཞི།

ནམ་རྒྱུན།

ནང་སེམས་སུ་ཆུད་ཟིན་པའི་ཡིག་འབྲི་རྙིང་བ་དེ་ཁྱོད་ཡིན་ཞིང་།

སེམས་ངོས་སུ་དཔྱང་ཡོད་པའི་དར་དཀར་གྱི་

ཡོལ་བ་དེའང་ཁྱོད་ཡིན།

ཁྱོད་ཀྱི་གམ་ན་ཡོད་དུས།

ཁྱོད་ནི་ཡིད་ཀྱི་རྒྱ་ཁྱོན་ལྟར་གཞལ་མི་ནུས་

པའི་ཁོར་ཡུག་དེ་ཡིན་ཞིང་།

རྒྱང་རིང་ན་ཡོད་དུས།

ཁྱོད་ནི་སྙིང་གི་ནང་ངོས་སུ་ཡོད་པའི་

དྲོད་ཀྱི་ཤ་མདངས་དེ་རེད།

ཁྱེད་རང་ལྟ་བཞིན་ནར་སོན་ཞིང་།

ཁྱེད་རང་སྒོམ་བཞིན་རྒྱང་རིང་ལ་ཆས་པའི་ང་རང་།

འབྱུང་འགྱུར་གྱི་ཁུག་སྣེ་ཞིག་ཏུ་སླེབས་དུས།

སླར་ཡང་ཁྱེད་ཀྱི་པང་དུ་ཕྱིར་ལ་ལོག་ངེས།

རྒྱུ་མཚན།

ང་ཡི་ནང་སེམས་ཀྱི་མེ་ལོང་ཁྱོད་ཡིན་ཞིང་།

འཚོ་གནས་ཀྱི་རྒྱབ་རི་ཡང་ཁྱོད་ཡིན་ནོ།།