སྟོད་གཡའ་སྤང་འདྲེས་པའི་སོ་ཁ་ན། །

བྱ་རི་དྭགས་མཉམ་དུ་གུ་ཡངས་རོལ། །

གཞི་འཁོར་བའི་གནས་ལ་སུན་སུན་ནས། །

སྙན་རྩ་འདབ་གྲོལ་བའི་ཐོས་པ་དགའ། །

སྤྲིན་ལུག་ཁྱུ་འདྲ་བའི་ཡང་སྟེང་ན། །

རྒོད་ཐང་དཀར་ལྷན་དུ་གཤོག་རྩལ་ངོམ། །

དགྲ་གཉེན་ཉེའི་འཐབ་ཆ་ཟིང་ཟིང་ནས། །

སེམས་ཉོན་མོངས་བྲལ་བའི་ཐོས་པ་དགའ། །

ནགས་ཚང་ལོ་མཛེས་པའི་བྲག་ཕུག་ན། །

ཟས་སྔོ་རྐྱང་ཁོ་ནས་འཐུས་བྱས་པའི། །

གྲོགས་ཕུ་ནུའི་ཆགས་སྡང་དྲན་དྲན་ནས། །

དབྱངས་མགུར་མ་བཞེངས་པའི་ཐོས་པ་དགའ། །

སྟོད་ཕུ་ཆུ་འབབ་པའི་ཉེ་འགྲམ་ན། །

རྩི་མེ་ཏོག་བཞད་པའི་དབེན་པ་རུ། །

སེམས་མི་གཡོ་དམ་ཚིག་བརྟན་བརྟན་ནས། །

འཁོར་ཡིད་བྱེད་བྲལ་བའི་ཐོས་པ་དགའ། །

མི་གཞན་གྱིས་བལྟས་ན་སྙིང་རེ་རྗེ། །

ན་ཆུང་བའི་བུ་མོས་ཁྲེལ་ན་ཡང་། །

ཆོག་ཤེས་པའི་ལས་ལ་འབད་འབད་ནས། །

དུས་གཡེལ་མེད་སྒོམ་པའི་ཐོས་པ་དགའ། །

དགུན་ཟླ་གསུམ་གྲང་ངར་རྒོད་ན་ཡང་། །

གོས་རས་རྐྱང་ཁོ་ནས་ཆོག་པ་ཡི། །

སེམས་གཏུམ་མོའི་བདེ་དྲོད་འབར་འབར་ནས། །

ཐུགས་ལྟ་བ་མཐོ་བའི་ཐོས་པ་དགའ། །

གནས་བྱང་ཆུབ་རྫོང་གི་དབེན་པ་རུ། །

སྟོད་ལྷ་བཙན་གངས་དཀར་མཛེས་ཤིང་བརྗིད། །

ལུས་ཚེ་གཅིག་སྤྲང་པོ་བྱས་བྱས་ནས། །

རྒྱུ་ཞེན་ཆགས་བྲལ་བའི་ཐོས་པ་དགའ། །

རི་ཟུར་གསུམ་སྒང་ཁར་འགྲིམ་པ་ཡི། །

ཡིད་དབྱིངས་རིག་ཉི་ཟླ་རང་གསལ་ཅན། །

ཞེ་ཕུ་ཐག་ཆོད་པ་སྲ་སྲ་ནས། །

བློ་རྣམ་དཔྱོད་ལྡན་པའི་ཐོས་པ་དགའ། །

ཡིད་འཕྲོག་པའི་ཁོར་ཡུག་དྲ་བ་ཅན། །

གནས་རྐྱང་འཕན་ནམ་མཁའ་ཡང་རྫོང་ན། །

གཞི་འཛིན་མེད་དོན་དེ་རྟོགས་རྟོགས་ནས། །

རྐང་ཤ་རྗེན་དོད་པའི་ཐོས་པ་དགའ། །

ཆོས་ཐོས་པའི་ཟབ་ཚད་མཁའ་ཡི་ཟླ། །

སྒོམ་ཉམས་ལེན་ལྟ་བ་གངས་ལས་མཐོ། །

ལྷ་སྟོན་པའི་ཆོས་ཚུལ་བརྩོན་བརྩོན་ནས། །

གངས་ཉི་ཤར་འདྲ་བའི་ཐོས་པ་དགའ། །

ཤིང་བེར་དཀར་དབྱུག་པ་ལྕིག་རྒྱུན་ངང་། །

རྩལ་ཐོགས་པ་མེད་པའི་ས་མཐའ་པ། །

སྐུ་ཀུན་རྫོབ་གར་ལ་རོལ་རོལ་ནས། །

ལྗགས་མགུར་མ་ལེན་པའི་ཐོས་པ་དགའ། །

དོན་ཉམས་ལེན་ལས་ལ་ངལ་བ་མེད། །

བདག་མེད་པའི་ལྟ་བ་ཚུལ་བཞིན་རྟོགས། །

སེམས་དད་པའི་སྙིང་རུས་ཆེ་ཆེ་ནས། །

ཡུལ་གངས་ཅན་སངས་རྒྱས་ཐོས་པ་དགའ། །

ཡུལ་ངེས་མེད་འགྲིམ་པའི་རྣལ་འབྱོར་པ། །

ཞེ་རུས་པའི་དམ་བཅའ་མ་བརླག་པར། །

བློ་ཆོས་ལ་ནམ་ཡང་འདྲེས་འདྲེས་ནས། །

འཆི་རང་དབང་ཐོབ་པའི་ཐོས་པ་དགའ། །

དར་ཡུག་གཅིག་སྣེ་རུ་འཕུར་བའི་འཕྲུལ། །

བྱ་རྒོད་པོས་གནམ་འཕང་གཏོད་པ་བཞིན། །

གངས་ལ་ཕྱིའི་རྩེ་ན་ལྡིང་ལྡིང་ནས། །

ནང་ཉམས་རྟོགས་རྒྱས་པའི་ཐོས་པ་དགའ། །

སེམས་དད་དང་དགའ་བ་ཐོབ་པ་ཡི། །

ང་སྙིགས་མའི་མི་ཡིས་སྙན་ཚིག་འདི། །

རྗེ་མི་ལ་དྲན་པའི་མཆོད་པ་རུ། །

དབྱངས་སྡེབ་ལེགས་ཚིག་ལ་བརྒྱུས་ཏེ་ཐལ། །