བོད་བསིལ་ལྡན་གངས་རིའི་ཞིང་ཁམས་སུ། །

ཆོས་མདོ་སྔགས་བསྟན་པ་དར་བའི་ལྗོངས། །

དཔལ་ཁམས་བྱེ་ལྔ་རིག་སློབ་གླིང་ནས། །

ཆོས་ཟབ་མོ་ཐོབ་པས་རང་སེམས་སྤྲོ། །

དཔལ་མཁན་ཆེན་གཞན་ཕན་སྙིང་པོ་ལ། །

སེམས་མི་འགྱུར་ཡིད་ཆེས་དད་པ་ཡོད། །

ཆོས་ཟབ་མོ་གསང་སྔགས་ཐོབ་དུས་སུ། །

མགོན་ཁྱེད་ཀྱི་གདམས་ངག་བརྗེད་ཐབས་མེད། །

འཁོར་དཔོན་སློབ་ཆོས་ཀྱི་དགའ་སྟོན་རོལ། །

སེམས་དགའ་དགའ་སྤྲོ་སྤྲོའི་ཚོགས་ལ་རོལ། །

རྗེ་ཁྱེད་ཀྱི་བྱམས་བརྩེའི་ཐུ་འོག་ནས། །

སེམས་དགའ་བའི་མགུར་གླུ་འདི་ནས་ལེན། །

བདག་འདི་ནས་བྱང་ཆུབ་མ་འཐོབ་པར། །

མགོན་ཁྱེད་ཀྱི་ཐུགས་ཀྱིས་རྗེས་བཟུང་སྟེ། །

གནས་མཁའ་སྤྱོད་དག་པའི་ཞིང་ཁམས་ནས། །

རྗེ་ཁྱེད་ཀྱི་ཞབས་དྲུང་སྐྱེ་བར་ཤོག །

ཚིག་འདི་ཡི་བདེན་པའི་ནུས་མཐུ་ཡིས། །

འཁོར་དགེ་འདུན་པ་ཡིས་ཐུགས་བསྐྱེད་ཀྱིས། །

བདག་སྐྱེ་བ་ཚེ་རབས་ཀུན་ཏུ་ཡང་། །

ལམ་ཡང་དག་འཇུག་པར་སྨོན་ལམ་འདེབས། །