བརྗེད་མི་སྲིད་པ་ཞིག་ལ།

དགུན་མཇུག་དང་དཔྱིད་འགོའི་ཐོ་རེངས་རེ་རེར།

རླུང་བུ་འཇམ་པོ་ཞིག་གིས་སྐྱ་རེངས་བསུ་བཞིན་ཉིན་མོའི་ཡོལ་བ་ཕྱེས།

འཇམ་ཅག་གེར། ཁུ་སིམ་མེར།

བསྐལ་བ་ཡ་ཐོག་གི་དུས་སྐབས་དང་ཅི་འདྲའི་འདྲ་ཨང་།

ང་ནི་འོད་ལ་ཞེན་པའི་འབུ་མེ་ལྕེབས་བཞིན།

ཕ་ཡུལ་ལ་ཧ་ཅང་ཞེན་པས།

ཕ་ཡུལ་དང་ཡུལ་མིའི་ཕྱོགས་ལ་རྣ་བ་བླགས་ཤིང་།

རི་རབ་དང་ཆུ་བོའི་ཀློང་ལ་སེམས་པ་བསྲིངས་དུས།

ངའི་ཐ་སྙད་ཀྱི་ཉི་འོད་ཕ་ཡུལ་འཕྲོས་འོང་།

ང་རྒྱང་ནས་རྒྱང་དུ་བཞུད་ཐེངས་རེར།

འཆར་ཡན་གྱིས་བཏེགས་ཤིང་ཕངས་སེམས་ལ་ཐིམ་པའི་སེམས་འགྱུ་རེ་རེ།

རྨི་ལམ་གྱིས་སྒོམ་ཞིང་དངོས་ཡོད་ཀྱིས་གཙེས་པའི་འདས་དོན་རེ་རེ།

ཉི་ནུབ་ཀྱི་གོ་རིམ་བཞིན། ཆར་བ་ཡི་འབབ་རྒྱུན་ལྟར།

ངའི་སེམས་ཀྱི་རྩྭ་ཐང་ན་མེ་ཏོག་ལྟར་བཞད་ཡོད།

ང་ཕ་ཡུལ་དང་ཉེ་བར་བཅར་ཐེངས་རེར།

ང་ནི་ངན་ལང་དུ་ཤོར་བའི་བྱིས་པ་བཞིན་ཁྱོད་ཀྱི་པང་ནས་བསྡད་དེ།

བསམ་བློ་དང་ཐ་སྙད་ཀྱིས་དབུལ་བའི་སློང་མོ་བ་ལྟར།

སྟོང་ཤིག་ཤིག་གི་སེམས་པ་ཁྱོད་ལ་གཏད་ཅིང་།

གྲང་ཤུར་ཤུར་གྱི་ལག་ཟུང་ཁྱོད་ལ་སྲིང་བཞིན།

ངའི་སེམས་ཀྱི་གས་ཆག་ལ་ཁ་གསབ་དང་

འཚོ་བ་ལ་དངོས་གྲུབ་གནང་རོགས།

ངའི་ཉག་ཕྲ་བའི་ཐ་སྙད་རེ་ལ།

ཚིག་སྦྱོར་གྱི་ལོ་འདབ་གནང་རོགས།

ས་མཐའི་མུན་ཁམས་འགྲིམ་ནས་ཡིད་སེམས་བཅོམ་ཐེངས་རེར།

མེ་ལྟར་ཚ་བའི་དྲོད་ཁོལ་རེ་གནང་རོགས།

བརྩེ་ཞེན་གྱི་མ་ཡུམ་ལྟ་བུའི་ཕ་ཡུལ་ལགས།

ངས་མིག་ཟུང་དང་གོམ་པ་རྒྱང་ལ་ཕྱོགས་ཀྱང་།

བརྗེད་མི་ཐུབ་པ་ནི་ཁྱོད་ཀྱི་རྣམ་པ་སྟེ།

ཉིན་རེའི་ཐོ་རེངས་ཀྱི་སྐྱ་རེངས་དཀར་པོ་ལུས་ལ་ཕོག་ཐེངས་རེར།

དགོང་རེའི་ཨ་སྔོན་གྱི་ཁྲི་གདུགས་གཞོན་ནུ་ནུབ་མཚོར་ལྷུང་ཐེངས་རེར།

གཏན་ནས་གཏན་དུ་ཡིད་ཀྱི་མེ་ལོང་ནང་འཆར་ཡོང་།