འབུམ་ལྷ་སྲས། 2022-07-04
སྣང་བའི་ནམ་མཁའ་འདི་ཉིད་བཞག་པ་ནས། །
སེམས་ཀྱི་རྒྱལ་ཁམས་ཞེས་པར་མིག་གིས་ཅེར། །
དེ་ནི་གདུང་བའི་ཉིན་མཚན་བརྩི་སྟངས་ཤིག །
ཡང་ན་དྲན་པའི་མགུར་མ་འཐེན་ཚུལ་ཡིན། །
ལམ་དང་ལམ་འཕྲང་བརྒྱུད་ནས་རྒྱང་དུ་ཆས། །
འོན་ཏེ་སེམས་ཀྱི་དར་དཀར་ཁྱེད་སར་འཐེན། །
སྨྲ་བའི་རི་མོ་སྟོང་དང་འབུམ་གྲངས་བརྩེགས། །
ཡིད་ཀྱི་གསང་བའི་གསང་བ་དེ་རུ་བསྡུས། །
བསྡུས་བརྗོད་གཏམ་དག་ཁྱེད་ཀྱིས་ཚོར་ན་བསམས། །
བདག་གི་ཕྱི་ནང་ཡང་ཡང་བཀླག་པར་རེ། །
སྟོན་མཚན་ཟླ་བ་གསལ་བའི་ཡུལ་མཐའ་རུ། །
སྤྱན་ཟུང་དལ་གྱིས་ཕྱེ་ནས་མཁའ་རུ་བལྟས། །
ཁྲུང་ཁྲུང་ལྷོ་རུ་འཕུར་བའི་ཚུལ་ཇི་བཞིན། །
གདུང་བ་འོད་བརྒྱའི་འཕྲོ་འདུ་ཆད་མེད་ཤར། །
ཆགས་སྡང་རྩི་ཤིང་བདོ་བ་བདག་ཉིད་ཀྱིས། །
ཞེན་པའི་མེ་ཕུང་རི་སྒང་ཀུན་ཏུ་སྦར། །
དྲན་པ་དུད་སྤྲིན་མཁའ་རུ་འཁྲིགས་པར་བྱས། །
གང་གི་མེ་ལོང་ཁྲོད་དུ་འཆར་ན་འདོད། །
མཁས་བརྒྱའི་སྨྲ་བའི་ངག་སྒོ་ཡངས་པོ་ལས། །
གཏིང་ཟབ་ནང་གི་འཇིག་རྟེན་བརྗོད་པར་ངལ། །
ཡུན་དུ་དེ་རུ་བལྟས་ཤིང་དངོས་གྲུབ་ཙམ། །
ཁྱེད་འཛུམ་དགོད་དང་སྐྱོ་སྡུག་རེས་མོར་དོད། །
རྩོམ་གསར། 10