བོད་ཡུལ་གྱི་དཔྱིད་དཔལ།

འཇུ་ཁ་བའི་སྨྲེང་སྨྱུག        2022-06-29

མཛེས་སྡུག་ལྡན་པའི་ཕ་ཡུལ་བསིལ་མོ་ཡི་ལྗོངས་འདི།།

མཛེས་ཉམས་ཡིད་དུ་འོང་བས་སྐབས་གསུམ་གྱི་གནས་ཡིན།།

མཛེས་འཛུམ་བློ་ལ་ཁོད་པའི་དཔྱིད་དཔལ་གྱི་རྣམ་པ།།

མཛེས་པའི་སྙན་ངག་ལྷ་མོའི་མགྲིན་ཚབ་ཏུ་ངས་ཕུལ།།

དཀར་གསལ་ཉི་ཟླའི་ཚལ་གྱི་དགོས་འདོད་ཀྱི་ནོར་མཆོག།

ཟིམ་ཟིམ་ནོར་འཛིན་ལྟེ་བར་ཕེབས་པ་ལ་བྲེལ་བས།།

དཔྱིད་དཔལ་སྐྱ་རེངས་བུ་མོའི་འཛུམ་ཞལ་གྱི་མཛེས་ཉམས།།

མྱུར་མྱུར་མཐོང་བར་འདོད་པའི་ངང་ཚུལ་འདི་སྐྱིད་པ།།

སྔོ་ལྗང་ནོར་འཛིན་ལྟེ་བའི་མཛེས་སྡུག་གི་གཞོགས་སྟེགས།།

ངོ་མཚར་སྒྱུ་མའི་ཟློས་གར་མཐོང་ལམ་དུ་བྱོ་འདྲ།།

ཡངས་པའི་གསེར་ལྡན་སྤང་གི་དཔྱིད་གསར་གྱི་མགྲོན་པོས།།

སྨྲ་བསམ་ཡུལ་ལས་འདའ་བ་ཐོས་རིས་ཀྱི་དགའ་ཚལ།།

གཡུ་མདོག་ལྗོན་པའི་རྩེ་ཡི་ཁུ་བྱུག་གིས་མགྲིན་ནས།།

ཆར་ཆུ་འབབ་པའི་སྙན་པ་ཕྱོགས་ཀུན་ཏུ་སྒྲོག་དུས༎

ཡངས་པའི་ནོར་འཛིན་སྤང་དུ་ཆར་ཟིལ་གྱི་དངོས་འགྲུབ༎

བསྩལ་བའི་དུས་ཚིགས་མྱུར་མོར་འཆར་བ་ལ་འདི་སྤྲོ་ཨཱང་།།

ཁོ་ར་ཁོར་ཡུག་ཆར་ཟིལ་ཤག་ཤག་ཏུ་བབས་ཏེ།།

མཐའ་ཡས་རྩྭ་ཐང་བཅུ་དྲུག་ལུས་ཕྲ་མར་མཚུངས་འགྲོ།།

གར་ལ་རྩེད་པའི་དཔྱིད་གསར་བསུ་མཁན་གྱིས་མི་རྣམས།།

འཁྱམ་འཁྱམ་ལྗོངས་རྒྱུའི་ལྟད་མོ་ཆས་པ་ལ་བྲེལ་འདུག།

དཔྱིད་ཀྱི་དཔལ་མོ་བཞད་པའི་སྤྲོ་སྣང་གི་ཐོར་རྩོམ།།

མགྲིན་གྱིས་རང་སྒྲ་དཀྲོལ་ཏེ་ཆོལ་གསུམ་ལ་ཕུལ་ན།།

སྙན་དབང་གསོས་པའི་སེམས་ཀྱི་བདུད་རྩི་ཡི་མཆོད་ཆང་།།

བཞེས་པ་ཐེངས་ཤིག་མཛོད་དང་རིགས་ཞེན་གྱི་སྤུན་ཟླ།།



  • ལེ་ཚན་སྔོན་མ།:མ་ཡུམ་དྲན་པའི་མགུར་གླུ་འཇགས་མེད་གཙང་པོའི་རླབས་སྒྲ།
  • ལེ་ཚན་རྗེས་མ།:གནས་སྐབས་མེད།