མི་ཚེའི་གྲུ་ལ་ཞུགས་པའི་ལམ་འགྲམ་གྱི། །

ལང་ཚོའི་འདབ་མ་གྲོལ་བའི་མེ་ཏོག་ཅིག །

ལང་ཤོར་སེམས་ཀྱི་བུ་ཡིས་ལག་ཏུ་འཐོག །

མཛའ་གཅུག་གཙང་ཆབ་སྔོན་མོའི་ཆུ་མིག་རྡོལ། །

དྭངས་གསལ་དྲི་མས་ཡོངས་སུ་དག་པ་ཡི། །

བརྒྱད་གཉིས་ཟུང་གི་ལང་ཚོའི་འགྲམ་ངོགས་སུ། །

བརྩེ་བའི་ཨ་ཡིག་ཐོག་མ་བཞད་དང་ལྷན། །

ཚོགས་དྲུག་རྒྱུ་བའི་ལམ་ཆེན་དལ་གྱིས་འགག །

མེ་ཏོག་འཛུམ་ཙམ་བྱས་ན་ཡིད་ཀྱང་དགོད། །

འདབ་མ་སྡུད་ཙམ་བྱས་ཀྱང་ཁོག་འདར་ཤོར། །

ཁྲི་མ་འབུམ་གྱི་རྟོག་འགྱུ་ཡིས་སྐྱེས་པའི། །

ཡིད་ཀྱི་གཞིས་ལ་དྲོད་གྲང་རེས་མོས་ལྡང་། །

བརྩེ་བ་དགུ་འགྱུར་སྟོབས་ཀྱི་མཁའ་དབྱིངས་ལ། །

ངོ་ཚའི་ཡོ་བའི་སྤྲིན་པ་ཡལ་ཤུལ་དུ། །

དུང་བའི་ཟླ་ཤེལ་ཆ་ཤས་རྫོགས་པ་ཡིས། །

མེ་ཏོག་རི་བོང་འཛིན་མའི་ཚུལ་དུ་འཆང་། །

ལོ་ཟླའི་འཕེལ་འགྲིབ་རྒོད་ཀྱང་ཇེ་མཛེས་གྱུར། །

དུས་བཞི་སོ་ཁ་བརྒལ་ཡང་རྙིང་དུས་མེད། །

ཚོགས་དྲུག་བུང་བའི་ཚོགས་ཀྱི་སེམས་རྟེན་ཏེ། །

ཡིད་ཀྱི་མེ་ཏོག་འཁོར་བའི་མཛེས་རྒྱན་ལགས། །

སློབ་མའི་ངལ་བས་ཀུན་ཏུ་དཀྲིས་པ་ཡི། །

ལོ་ལམ་རིང་མོ་ཤུགས་ཀྱིས་བགྲོད་པའི་ཚེ། །

ལུས་སེམས་ཚ་བའི་གདུང་བ་བཅོམ་པ་ལ། །

མེ་ཏོག་ཁྱོད་ལ་བསིལ་བའི་ནུས་པ་ལྡན། །

དགའ་སྐྱོའི་ཁ་ཆར་རེས་མོས་ལྡང་བ་ཡི། །

ཨ་ཐང་ཆད་པའི་སྲིད་པའི་ཐང་ཆེན་དུ། །

མེ་ཏོག་ཁྱོད་ཀྱི་ལང་ཚོ་འབུས་པའི་དྲིན། །

འཁོར་བར་ཐེངས་དགུ་སྐྱེས་ཀྱང་བཟོད་པ་གྱུར། །