ཆབ་ཆ་ནི་རླུང་ལྡང་ས་ཁོ་ན་ཞིག་མ་རེད།

ཁྱུང་གཤོག        2022-06-20

སྐྱོ་གླུ་གཏོང་མཁས་ཀྱི་གཞས་མཁན་

ཞིག་དང་མཚུངས་པར།

འགྱུར་ཁུགས་ཐན་ཐུན་ལས།

གྱེས་གདུང་གི་ཁ་བ་འབབ།

འཁྱག་སིབ་སིབ།

བརྩེ་བ་སོར་གང་བོ་དེའི་ཆེད་དུ།

ངས་རླུང་བུར་སོ་ཁ་གཏད་དེ་བསྡད།

མི་ལོ་ག་ཚོད་ཅིག་གི་སྔོན་ནས།

ཞེ་འདོད་དང་ན་ཟུག་ཁུར་ཏེ།

རྒྱང་རིང་ཞིག་ལ་ལོག་པ་ལྟར།

དྲན་པ་བོར་བའི་ཁྱེད་ཀྱི་རུམ་ཁར་འབྱོར།

གནས་འདི་རུ།

སེམས་ཚོར་སྣ་ཚོགས་ཀྱིས་སྨྱོ་འཛིང་བྱེད།

ཆགས་སྡང་གི་ཐ་སྙད་མང་

པོས་སྨྲ་བརྗོད་སྣ་ཚོགས་རྒུམ།

དུས་ཚོད་ཀྱི་སྤང་ཐང་གཅལ་དུ་བཀྲམ་སྟེ།

རབ་རིབ་ཏུ་སྣང་བའི་ཁ་ཕྱོགས་འཚོལ་དུས།

སྣང་བའི་འཇིག་རྟེན་ལ་གཞི་ནས་

དགུན་ཁ་སླེབས་ཚར།

ད་ནི།བདག་གི་མགྲིན་པར་ལུས་

པའི་ཐ་སྙད་ཚོགས་ཀྱིས་ཀྱང་།

ཁྱེད་རང་མཚོན་ཐབས་མི་འདུག།

མ་གཞི། ཁྱེད་ནི་རླུང་ལྡང་ས་ཁོ་ན་ཞིག་མ་རེད།

དུས་ཚོད་ཀྱིས་བསྐྱུར་ཟིན་པའི་

ནམ་མཁའ་སྟོང་བ་དེའི་འོག

ང་ནི་རང་གི་གྲུབ་གཟུགས་ལ་

སྨོན་པ་ཡང་ཡང་ཤོར།

ཨུ་ཚུགས་ཀྱི་རླུང་བུ་སྔར་བཞིན་ལྡང་།

ཁྲེལ་འཇོག་མེད་པའི་དུས་ཚིགས་འདིར།

སྙིང་ཉེ་བའི་རང་ཉིད་སིལ་བུར་ཐོར་ཏེ།

རྣམ་ཤེས་ཀྱི་རྒྱུད་སྐུད་དཀྲོལ་ཐབས་མི་འདུག

མིག་ཟུང་གི་སྒོ་གཏན་ཏེ་བསྡད་ན།

ཆབ་ཆ་ནི་རླུང་ལྡང་ས་ཁོ་ན་ཞིག་མ་རེད།

ཁེར་རྐྱང་གི་ན་ཟུག་གཏིང་ནས་

ལངས་ས་ཞིག་རེད།



  • ལེ་ཚན་སྔོན་མ།:མཐོ་སྒང་གི་ཁྱིམ་གཞིས།
  • ལེ་ཚན་རྗེས་མ།:ཞེ་འདང་གི་དབྱངས།