འབར་བློ་དཀར། 2022-06-27
སྤྲིན་དཀར་ནག་གི་བང་རིམ་གསེབ་ནས།།
འབྲུག་ཕོ་ཆུང་གིས་ལྡིང་སྐོར་འཕེན་ཞིང་།།
ཆར་ཟིལ་མ་དང་ཟིལ་མ་འཐོར་སའི།།
ཡུལ་དེ་བཞུགས་ཀྱི་བྱམས་ལྡན་ཨ་མའི།།
ཚེ་དར་ཐག་བཞིན་རིང་བ་ཨེ་རེད།།
གཞི་འཁོར་བ་ཡི་ཐབ་ཚང་ནང་ནས།།
ལས་དམ་ཚིག་གི་མེ་ཁ་གསོས་ཏེ།།
བཟང་གཤིས་རྒྱུད་ཀྱི་བལ་དཀར་འཇོག་པའི།།
སྨན་རིགས་བཟང་གི་བྱམས་ལྡན་ཨ་མའི།།
ཐུགས་མེ་ལོང་བཞིན་དྭངས་པ་ཨེ་རེད།།
དགུང་རི་རྩེ་ནས་ཉི་འོད་འཕྲོ་དུས།།
ཕྱུགས་བཞོ་དབྱངས་ཀྱི་མགུར་མ་འཐེན་བཞིན།།
སྦྲའི་སྒོ་ཁྱིམ་ནས་གོམ་ཆུང་སྤོས་པའི།།
ཡིད་ཁོག་འཛུམ་གྱི་བྱམས་ལྡན་ཨ་མའི།།
སྐུ་གངས་རི་བཞིན་བརྟན་པ་ཨེ་རེད།།
ལུས་ལང་ཚོ་ཡི་ལྗང་སྨྱུག་བསྐམས་ཤིང་།།
སྟོན་བསིལ་རླུང་གིས་སྐྲ་ལོ་སེ་བོ།།
དབུའི་དཔྲལ་མཚམས་ནས་བྱིལ་བྱིལ་བཏང་བའི།།
མདངས་ཟིལ་ཉམས་ཀྱི་བྱམས་ལྡན་ཨ་མའི།།
ངག་སྨྲ་བརྗོད་ལ་དིག་པ་ཨེ་འདུག།
ཞལ་ཟླ་གཞོན་ལ་སྤྲིན་པས་གཙེས་ཤིང་།།
སྤྱན་སྐར་ཆེན་གྱི་གཟི་མིག་བོར་ཏེ།།
སྐྱིད་སྣང་བ་ཡི་དུས་ཚིགས་ཡལ་བའི།།
ལོ་རྒས་འཁོགས་ཀྱི་བྱམས་ལྡན་ཨ་མའི།།
བློ་དྲན་རིག་ལ་རྒུད་པ་ཨེ་འདུག།
ལྟོ་ཟས་མེད་ལ་ཟས་སྦྱིན་གནང་ཤིང་།།
རྒྱབ་གོས་ཧྲུལ་ལ་གོས་ཀྱང་བཙེམས་ཏེ། །
རང་བུ་ཕྲུག་གི་མདུན་ལམ་བསྐྱངས་པའི།།
སེམས་དཀའ་ཐུབ་ཀྱི་བྱམས་ལྡན་ཨ་མའི།།
ལུས་མཛེས་སྡུག་ལ་ཉམས་པ་ཨེ་འདུག།
གནས་ངེས་མེད་དུ་ཁ་ལོ་དཀྱུས་ཏེ།།
ཡུལ་རྒྱུས་མེད་ཀྱི་ས་མཐའ་འགྲིམས་དུས།།
བུ་ཁེར་རྐྱང་གི་གདུང་བས་མནར་ཏེ།།
དྲིན་མ་ལོ་ཡི་བྱམས་བརྩེ་ཟབ་མོ།།
ཁོག་ཤ་མཆིན་གྱི་བར་ནས་དྲན་བྱུང་།།
བདག་བུ་རུལ་ང་སྐྱེ་བ་འདི་ལ།།
བན་སེར་མོ་ཞིག་ཡོང་བར་རེ་སྟེ།།
དུས་ཉིན་མཚན་ལ་སྐྱབས་འཇུག་གནང་བའི།།
མ་དྲིན་ཆེན་གྱི་བྱམས་སྐྱོང་བསམས་ན།།
སྙིང་དམར་པོ་ལ་ན་ཟུག་སྐྱེས་བྱུང་།
ཆོས་འདི་གྲུབ་ཅེས་བཤད་དུ་མེད་ལ།།
ལས་འདི་ཐོན་ཞེས་བསྟན་རྒྱུ་མེད་པར།།
ཚེ་ཉི་མ་ཡི་ལ་སྐེད་ལོན་པའི།།
རང་ལས་སྐལ་འདི་ལན་གཅིག་བསམས་ན།།
སེམས་གཏིང་རིམ་ནས་ཁོ་ཐག་ཆད་སོང་།།
ཉེས་བདག་འཛིན་གྱི་ཤྭ་ཕོ་མ་སོད།།
ཡུལ་བདག་མེད་ཀྱི་ཁྲག་ར་མ་རྙེད།།
བློ་ཆགས་སྡང་གི་སྒོ་མོ་ཕྱེས་པའི།།
རང་ཆོས་མེད་ཀྱི་ལས་འདི་བསམས་ན།།
ཡིད་སྐྱོ་གདུང་གི་མུན་པ་འཐིབ་ཀི།
དེ་ཡིན་ན་ཡང་ཆུང་ངུའི་དུས་ནས།།
མགོན་བཤེས་གཉེན་གྱི་ཞབས་རྡུལ་རེག་སྟེ།།
ཆོས་ཡང་དག་གི་རྒྱལ་བའི་གསུང་ལ།།
ཀློག་ཐོས་བསམ་གྱི་བྱ་བ་བགྱིས་པའི།།
དོན་དགེ་འབྲས་ཀུན་མ་ལ་སྔོ་འོ།།
རྩོམ་གསར། 10