ཚེ་རབས་ལས་ཀྱི་བག་ཆགས་ཟབ་མོ་སེམས་ཀྱི་མཛོད་ཁང་ནོར་གྱིས་གཏམས། །

འཁྲེང་སེམས་ལས་ཀྱི་ཕྱིར་མིག་ཐོག་མ་རྒྱང་རིང་ས་མཐའི་ཕྱོགས་སུ་འཐེན། །

ཨ་ཐང་ཆད་པའི་འཚོ་བའི་ཉིན་སྲིབ་སྐྱིད་སྡུག་ལ་མོ་བརྒལ་དུས་སུ། །

ལྷ་སའི་གྲོང་གི་བྱམས་པ་བསམས་ན་སེམས་འདི་སྙི་མོ་སྙི་མོ་ཞིག།

བརྩེ་ཞེན་དར་དཀར་མདུད་པས་བཅིངས་པའི་སྣང་བའི་རི་མོ་རྟགས་བརྒྱད་མ། །

དུངས་སེམས་འོ་ཆུ་ལྷན་དུ་འདྲེས་སའི་སྐྱིད་ཆུ་རིང་མོ་དལ་གྱིས་བཞུར། །

ཐོབ་ཤོར་ལེགས་ཉེས་སྲིད་པའི་གྲོང་ཁྱེར་ཁྲ་ཁྲ་གློག་གི་འཇིག་རྟེན་ནས། །

ལྷ་སའི་གྲོང་གི་བྱམས་པ་བསམས་ན་སེམས་འདི་སྡུག་གོ་སྡུག་གོ་ཞིག།

བཅོས་མིན་བརྩེ་བས་ཡོངས་སུ་བརྒྱན་པའི་སེམས་ཀྱི་ཨ་སྔོན་དྭངས་ཤིང་གཙང་། །

མཛའ་བཅུགས་ལས་ཀྱི་ཚོར་བ་འཇམ་པོ་ཤ་དང་རུས་པའི་གཏིང་ལ་འཐིམས། །

ལས་དབང་བཙན་པོའི་ཕྱིར་མིག་ཁྲོད་ཀྱི་ལོ་དང་ཟླ་བ་ཆུ་བོའི་འགྲོས། །

ལྷ་སའི་གྲོང་གི་བྱམས་པ་བསམས་ན་སེམས་འདི་ཁེར་རྐྱང་ཁེར་རྐྱང་ཞིག།

ཆུང་འདྲིས་ཟེར་བ་ལས་ཀྱི་ཞེན་ཆགས་སེམས་ཀྱི་རྡོག་ཁྲེས་ལྕི་མོ་ཞིག།

རི་ཆུ་སྟོང་གི་ཕ་མཐའ་ཆོད་རུང་ཁྲེལ་གཞུང་དྭངས་གསལ་འོ་ཆུ་ཡིན། །

དགེ་སྡིག་དུས་ཀྱི་ཉིན་མཚན་བར་ནས་ངག་འཇམ་གཤིས་བཟང་ཡང་ཡང་དྲན། །

ལྷ་སའི་གྲོང་གི་བྱམས་པ་བསམས་ན་སེམས་འདི་རྒོད་པོ་གཤོག་ཐོགས་འདྲ། །

ལས་འབྲེལ་གསེར་ཀྱི་དམུ་ཐག་ཕྲ་མོ་སྣང་བའི་འོད་ལ་འཁྲུངས་ནས་ཡོད། །

འདང་ལ་འགྱུར་མེད་སྲོག་གི་ཀ་བ་མི་འགྱུར་ལྷུན་པོའི་གཤིས་སུ་གྲུབ། །

གྱེས་བྲལ་འཁོར་བའི་ཆོས་ཉིད་ཟབ་མོ་དྲན་པའི་སྡུག་བསྔལ་སེམས་ལ་ལྷུང་། །

ལྷ་སའི་གྲོང་གི་བྱམས་པ་བསམས་ན་སེམས་འདི་གཉོམ་པོ་གཉོམ་པོ་ཞིག།

བརྩེ་སེམས་སྣང་བ་ཇ་དང་འོ་མ་དབྱར་ཀྱི་མར་ལོའི་འོད་དྲི་འཐུལ། །

ཁྲེལ་གཞུང་གཡུ་མཚོ་དྭངས་ཤིང་བསིལ་དུས་དུངས་བའི་ཁྲུང་ཁྲུང་གར་དུ་རྩེན། །

འདབ་དྲུག་ཁ་བའི་མེ་ཏོག་གཏོར་དུས་ལས་ཀྱི་མཚོ་ཁར་འགྲམ་དར་ཆགས། །

ལྷ་སའི་གྲོང་གི་བྱམས་པ་བསམས་ན་སེམས་འདི་མོན་ཕྲུག་ཡུལ་བོར་འདྲ། །

དཔྱིད་ཀྱི་དཔལ་མོ་ཞེ་འདྲིས་བུ་མོ་ཕུགས་བསམ་ལས་ཀྱི་ཁ་ཡིག་ཡིན། །

བདག་གི་དྲན་པའི་རྩྭ་ཐང་ངོས་སུ་དབྱར་གྱི་ཁུ་བྱུག་ཐེངས་གསུམ་གྲགས། །

སྨྲེང་སེམས་སྟོན་ཁའི་བ་མོ་དཀར་པོ་ཡིད་སེམས་སྐྱོ་བའི་གཞི་མ་རེད།།

ལྷ་སའི་གྲོང་གི་བྱམས་པ་བསམས་ན་སེམས་འདི་དགུན་གྱི་ཁ་བ་འདྲ། །

བརྩེ་དུང་སྲོག་གི་རྒྱུ་སྐུད་ཕྲ་མོའི་གདངས་དབྱངས་སྙན་མོ་སེམས་ལ་སིམ། །

འདང་དང་བརྩེ་བའི་སྙིང་གི་དྲོད་ཐིག་ཡ་ཆུང་སེམས་ཀྱི་སྟེང་ལ་སྦས། །

མར་མེ་འདྲ་བའི་ཚེ་སྲོག་བསམས་ན་མི་རྟག་འཇིག་རྟེན་ཡ་རེ་ང་། །

ལྷ་སའི་གྲོང་གི་བྱམས་པ་བསམས་ན་སེམས་གྱི་བྱང་ཐང་སྟོང་པ་འདྲ།།

གནག་སྣུམ་སྐྲ་ཡི་ལན་བུ་རིང་མོར་མ་འོངས་རེ་བའི་དབུ་ཁྱུད་བྲིས། །

དཀྱུས་རིང་འདྲེན་བྱེད་མིག་གི་མདངས་ལ་སྐྱིད་སྡུག་ལོ་ཟླའི་རི་མོ་གསལ། །

སྲོད་ཀྱི་མཚམས་སྤྲིན་མཁའ་ནས་ཡལ་དུས་འདང་གི་ཁ་ཚིག་ཞེ་ལ་ཐོགས། །

ལྷ་སའི་གྲོང་གི་བྱམས་པ་བསམས་ན་དྲན་གདུང་མུན་པ་སེམས་ལ་འཐིམས། །

མཁའ་ཡི་ཁྲི་གདུགས་གླིང་བཞིར་འཕྲོ་དུས་ལུས་ཀྱི་ངལ་དུབ་རེ་ཞིག་བཞག། །

ས་གཞི་སེར་པོའི་པང་ནས་འཁྲུངས་བའི་མེ་ཏོག་སེར་ཆེན་སད་ཀྱིས་བཅོམ། །

གནམ་ས་གཉིས་ཀྱི་འཕྲོ་སྦྱོར་བར་ནས་ཉམས་ཆུང་བདག་གི་བློ་སྙིང་སྒུལ། །

ལྷ་སའི་གྲོང་གི་བྱམས་པ་བསམས་ན་དྲན་པའི་རྫ་རི་སྨུག་པས་གཡོགས། །

ལས་འཕྲོ་ལས་ཀྱི་ཞལ་ཐང་ངོས་སུ་དུངས་ཞེན་རེ་ཁཱའི་སྐྱ་ཐིག་ཕབ། །

དུང་མདོག་ཟླ་འོད་གཞིས་ལ་ཚེས་རུང་བསམ་ནག་སྤྲིན་གྱི་ཡོལ་བས་བསྒྲིབས། །

རྣམ་ཤེས་འཁྱམས་པོ་རླུང་གིས་ཁྱེར་ནས་སྡོང་ལོ་སེར་པོའི་སྐྱོ་གར་མཐོང་། །

ལྷ་སའི་གྲོང་གི་བྱམས་པ་བསམས་ན་ཁམས་གསུམ་འཁོར་བར་སྙིང་པོ་དབེན། །

གངས་ཀྱི་རི་བོས་ཅོད་པན་འཆང་འདྲའི་ཀེ་ལ་ཤ་ཡིས་ཡོངས་སུ་བསྐོར། །

ལས་འབྲས་དཀར་ནག་བདེན་པའི་རི་མོ་ན་གཞོན་ཕོ་མོའི་བརྩེ་དུང་ལ། །

གྱེས་བྲལ་ན་ཟུག་ཁྲི་མ་འབུམ་གྱི་དམྱལ་ཁམས་འགྲིམས་དུས་སྐྱོ་བ་ལ། །

ལྷ་སའི་གྲོང་གི་བྱམས་པ་བསམས་ན་རེ་བསྒུག་ཁྲོད་ཀྱི་ཉི་ཟླ་ལགས། །

དུངས་སེམས་གསེར་གྱི་སོར་གདུབ་ངོས་ལ་དམར་ཆུང་བྱུ་རུའི་ཕྲ་ཡིས་བརྒྱན། །

མི་འགྱུར་བརྩེ་བའི་གཏན་ཚིགས་རྡོ་ལ་འགྱུར་མེད་ཨ་ཡིག་དཀར་པོ་བརྐོས། །

མ་རིག་འཁོར་བའི་འདམ་རྫབ་བར་ནས་སྨྲེང་བའི་སེམས་འདི་ལང་མ་གོག །

ལྷ་སའི་གྲོང་གི་བྱམས་པ་བསམས་ན་མ་སྐྱེས་ཨ་མ་ཡིད་ལ་འཁོར། །