སྐུ་ནི་བརྗིད་པའི་གངས་དཀར་ལྷུན་པོའི་ངང་ཚུལ་ཅན། །

གསུང་ནི་སྙན་འཇེབས་ཁུ་བྱུག་སྔོན་མོའི་ངང་ཚུལ་ཅན། །

ཐུགས་ནི་དཀྱིལ་ཆེ་མཐའ་ཡས་ལྷ་ཡི་རྫིང་རིང་ཅན། །

གོས་དཀར་ལྷ་མོར་སྒོ་གསུམ་གུས་པའི་ཕྱག་འཚལ་ལོ། །

འགྲོ་བའི་ཟུག་རྔུ་འཇོམས་བྱེད་སྨན་གྱི་རྒྱལ་པོ་མཆོག །

ཕངས་སེམས་སྤུ་ཙམ་མེད་པར་གཏོང་ཕོད་ཆེས་ཆེ་བས། །

བྱམས་བརྩེའི་ཕྱག་ཟུང་སྐྱོང་བར་མཛད་མཁན་ལྷ་ཡི་རྗེ། །

འགྲོ་བའི་མགོན་ཁྱབ་གོས་དཀར་ལྷ་མོར་མངོན་པར་བསྟོད།།

གོད་ཆགས་ཁྲོད་དུ་ངལ་བ་གྲངས་མེད་སྐྱོན་གནང་མཁན། །

ག་བུར་དབང་པོའི་མདངས་ལ་འགྲན་པའི་ལྷག་བསམ་ཅན།།

ག་དུས་ཡིན་ཡང་དུ་མེད་གཡུལ་སར་མདུན་སྐྱོད་མཁན། །

གོས་དཀར་ལྷ་མོའི་གཞན་ཕན་བསམ་པར་མངོན་པར་བསྟོད།།

ཁ་བའི་མདངས་ལ་འགྲན་པའི་རབ་དཀར་སྨན་པའི་གོས། །

ཁ་ཙམ་མིན་པར་རིམས་འགོག་འཐབ་སར་མདུན་དུ་བསྐྱོད། །

ཁ་ཞེ་གཉིས་མེད་ཅན་གྱི་གོས་དཀར་ལྷ་མོ་ཡིས། །

ཁ་ལས་ཉིང་སྐྱུར་དཔྱད་བཤེར་བྱ་བར་མངོན་པར་བསྟོད། །

ཧ་ལས་ཏོག་དབྱིབས་གློ་ཚད་རིམས་ནད་ལ་སོགས་པ། །

ཧ་ཅང་འཇིགས་སྣང་སྐྱེ་དགོས་མེད་ཅེས་གསུངས་གྱུར་ཀྱང་། །

ཨ་ཏིག་ཡང་ཏིག་འཕྲོད་བསྟེན་སྔོན་འགོག་གཙོ་བོར་འཛིན། །

ཨ་ཙི་ཀུན་གྱིས་གོས་དཀར་ལྷ་མོར་མངོན་པར་བསྟོད། །