རྩེ་ཐང་བློ་སྨྱོན། 2022-05-23
མྱུ་གུ་གསར་དུ་འབུས་པའི་གཞོན་ནུ་མའི་འཛུམ་མདངས།།
བཅུ་དྲུག་ལང་ཚོ་དར་བའི་ཡིད་འོང་གི་མཛའ་གཅུགས།།
ཉེ་ལམ་དགའ་མའི་བརྩེ་འཛུམ་ཡང་ཡང་དུ་དྲན་རུང་།།
སྐྱོ་བ་ཁོག་དུ་བཅུག་ནས་ཐབས་མེད་པར་བུད་འགྲོ།།
ས་མཐའ་འདི་ནས་སྒུག་པའི་ལོ་ཟླ་ནི་གྲངས་མེད།།
སྙིང་སྡུག་པད་མ་འདྲ་བའི་ཞལ་རས་དེ་མ་མཐོང།།
བཅུ་དྲུག་ལང་ཚོ་ཅན་གྱི་ཟུར་མིག་ཅིག་འཕངས་ན།།
ཡིད་འཕྲོག་ལྷ་མོའི་སྣང་བ་འགོག་མེད་དུ་སྐྱེས་བྱུང་།།
མྱུ་གུ་ཁྱེད་ནི་གཙང་བོའི་འགྲམ་ངོགས་ན་སྐྱེས་ཤིང་།།
དྭངས་ཤིང་རྫ་ཆུ་སྔོན་མོས་བསུ་མ་ཞིག་བྱས་ན།།
མྱུ་གུ་གསར་དུ་འབུས་པའི་ལང་ཚོ་འདི་དར་དུས།།
རྫ་ཆུ་མཉམ་འཐུང་བྱེད་པའི་སྐལ་བ་ཞིག་ལོས་ལྡན།།
ཚིགས་དྲུག་སྨྱུག་མ་འདྲ་བའི་སྐྱེ་གཟུགས་དེ་མཐོང་ན།།
ཡིད་སེམས་འཕྲོག་པའི་གཞོན་སྐྱེས་བུ་མོ་དེ་ཁྱོད་རེད།།
སྐད་ངག་ཁུ་བྱུག་འདྲ་བའི་གསུང་སྐད་འདི་སྒྲོག་ན།།
ང་རང་རང་དབང་མེད་པར་ཁྱེད་ཕྱོགས་སུ་འཁོར་བྱུང་།།
མི་རྟག་འཁོར་བའི་གྲོང་དུ་གཏམ་རྒྱུད་འདི་ཐོས་ན།།
བསྐལ་བ་བརྒྱ་སྟོང་དུ་མའི་ལོ་རྒྱུས་ཤིག་ལྡན་རུང་།།
ཡིད་སེམས་ཁྱེད་ལ་འཁོར་བའི་འབྲོག་ཐང་གི་བུ་མོ།།
འཇོ་སྒེག་ཅན་གྱི་ན་ཆུང་སྒེག་ལྡན་མ་དྲན་བྱུང་།།
རྩོམ་གསར། 10