ང་རང་ལོ་ལྔ་ཡིན་པའི་དུས་སྐབས་སུ་ཨ་ཕ་དང་མཉམ་དུ་ལུག་རྫི་བྱས་པ་ཡིན། ཉིན་ཞིག་གི་དགུན་ཁའི་སྔ་དྲོ་ཞིག་ལ་ཨ་ཕ་ངེད་གཉིས་ཀྱིས་ལུག་དེད་ནས་འགྲོ་སྐབས་གློ་བུར་དུ་ལུག་འདྲོག་བཞིན་ཡོད་པས། ང་རང་མྱུར་དུ་སོང་ནས་བལྟས་པ་ན་སྡོང་རྒན་ཞིག་གི་འགྲམ་དུ་གར་ཡོང་མི་ཤེས་པའི་ཁྱི་གུ་ནག་ཁྲ་ཆུང་ཆུང་ཞིག་འདུག ངས་དེ་མཐོང་མ་ཐག་པང་དུ་བཟུང་ནས་ཨ་ཕའི་གམ་དུ་སོང་བ་ན། ཨ་ཕས་ང་ལ་ཁྱི་གུ་ཆུང་ཆུང་དེ་གང་ནས་ཁྱེར་ཡོང་བ་ཡིན།མྱུར་དུ་ཐང་ལ་ཞོག། འདི་ལ་ནད་འདྲ་ཡོད་ན་ཐང་ཟེར། ངས་ཨ་ཕའི་ཁ་ལ་མ་ཉན་པར་ཁྱིམ་དུ་ཁྱེར་ཡོང་བ་ཡིན། དེ་ནས་བཟུང་ཁྱི་གུ་དེ་ང་དང་མཉམ་དུ་ནར་སོན།

དེ་ནས་ལོ་གཉིས་གསུམ་ཙམ་འགོར་ཟིན། ཉིན་རེ་ནས་ཉིན་རེར་ཁྱི་གུ་དེའི་ང་ལ་སྤྲོ་སྐྱིད་ལྡན་པའི་བརྩེ་བ་ཞིག་བྱིན་བྱུང་། དེ་ནི་ཅི་ཞིག་ཡིན་པ་སུས་ཀྱང་རྟོགས་ག་ལ་སྲིད། དེ་ནམ་རྒྱུན་ང་དང་ལྷན་དུ་རྩེད་མོ་རྩེ་བ་ཡིན། གནས་གང་དུ་སོང་བ་དང་དོན་དག་ཅི་ཞིག་ཡོད་ཀྱང་དེ་དང་ཁ་བྲལ་མ་མྱོང་། ཉིན་ཞིག་གི་ཕྱི་དྲོ་ཞིག་ལ་ཁྱི་གུ་གློ་བུར་དུ་མཐོང་རྒྱུ་མེད་པས། ངས་ག་ས་གང་དུ་བཙལ་པ་ན་རྙེད་རྒྱུ་མ་བྱུང་བར། ངའི་སེམས་ཧ་ཅང་སྐྱོ་བས་རང་དབང་མེད་པར་མིག་ཆུ་རྡོག་པོ་འགའ་མུ་ཏིག་འཐོར་བ་ལྟར་ས་ཐོག་ཏུ་ལྷུང་།

ཉིན་མང་པོ་ཞིག་འགོར་ཀྱང་ད་རུང་རྙེད་རྒྱུ་མ་བྱུང་། ཉིན་ཞིག་ངའི་རྨི་ལམ་ནང་། ང་ཡིད་ཆད་ནས་སྒོ་འགྲམ་དུ་ངུས་ནས་བསྡད་ཡོད་སྐབས། དེ་ངའི་གམ་དུ་ཐོན་འདུག་པས། ང་དགའ་སྤྲོ་ཆེན་པོ་སྐྱེས་ནས་ངུ་མཚམས་བཞག་སྟེ་མགོ་བོ་ཡར་བཀྱགས་ནས་བལྟས་པ་ན། ཁྱི་གུའི་ལུས་ཧྲིལ་བོར་ཁྲག་གིས་བརྫིས་ནས་མིག་མཐར་མཆི་མ་འཁོར་བཞིན་ང་ལ་ལྟ་བཞིན་འདུག། ངས་དེ་མཐོང་མ་ཐག་སེམས་སྐྱོ་བས་ངུས་པ་ཡིན། ཅུང་ཙམ་འགོར་རྗེས་ཁྱི་གུ་ནག་ཁྲའི་མིག་ཆུ་རྡོག་པོ་འགའ་འཐོར་བཞིན་ཉམ་ཐག་པའི་ངང་ང་ལ་བལྟས་ཏེ་མིག་རྡེབ་དབང་ཙམ་གྱིས་འཇིག་རྟེན་འདི་དང་ཁ་བྲལ་སོང་།

ངས་སྐྱོ་གདུང་གི་མཆི་མ་འདོན་བཞིན་སེམས་སྡུག་གི་ཀློང་ནས་བཟོད་པར་དཀའ་བའི་ན་ཟུག་ཅིག་སྐྱེས་པས་སྐད་གསེང་མཐོན་པོའི་ངང་ནས་ངུ་འབོད་བྱས། གློ་བུར་དུ་མི་ཞིག་གིས་ངའི་མིང་ནས་འབོད་ཀྱིན་འདུག། ང་རང་འཚབ་འཚུབ་ངང་གཉིད་སད་བྱུང་། མིག་ཕྱེས་ནས་བལྟས་པ་ན་ཡོད་ཚད་ངའི་རྨི་ལམ་ཡིན་པ་གཞི་ནས་རྟོགས་སོང་།