པཱ་ལགས། ད་ནི་གཞི་ནས་སྟོན་ཀ་ཚེས་བྱུང་། ཁྱེད་ཉིད་བཞུད་པའི་ལོ་དེའི་སྟོན་ཀ་ནང་བཞིན། སྨྲེང་ཤུར་ཤུར་གྱི་མཁའ་དབུགས་ཤིག་གིས་སྣང་བའི་ཕྱི་ནང་ཧྲིལ་པོ་དམ་དུ་བཅུམ་བྱུང་། ད་ལྟ་ང་ཚོའི་བར་ཐག་ཉིད་སྟོང་ཁམས་ཆེན་པོ་ཞིག་གིས་ཡོངས་སུ་བཅད་ཟིན་ནའང་། ཁྱེད་ཀྱིས་གླིང་ཕྲན་འདིའི་སྟེང་གི་སྐྱོ་གར་དང་མི་སྡུག་པ་དག་མཐོང་གིན་ཡོད་ངེས། བདག་གིས་གློ་བུར་དུ་ཁྱེད་ལ་འབྲི་ཐལ་བའི་འཕྲིན་ཡིག་དེ་དག་ཀྱང་མཐོང་གིན་ཡོད་ངེས།

པཱ་ལགས། ད་ལྟ་ང་རང་ཕ་ཡུལ་གྱི་རི་དང་གཙང་པོའི་ཕ་རོལ་ཕ་རོལ་གྱི་བས་མཐའ་ཞིག་ཏུ་ཡོད། གནས་འདིའི་ནམ་མཁའ་དང་ཁུ་སིམ་མཐའ་དག་ག་ལེར་དུས་ཚོད་ཀྱི་ཁྲག་རྒྱུན་ནང་དུ་ཁེངས་བྱུང་།

པཱ་ལགས། གནས་འདིར་དངོས་གནས་སྟོན་ཀ་ཚེས་བྱུང་། སྟོན་ཀ་འདི་ལྟར་ཚེས་ཡོང་དུས། ང་ནི་སྨྲ་བ་འགག་སྟེ་ཕྱིར་རྟོག་གི་དུས་ཚོད་རལ་བོ་དག་སླར་སེམས་ལ་དཀྲི་དགོས་བྱུང་།

པཱ་ལགས། ལོ་དེའི་སྟོན་མཇུག་ཧ་ཅང་འཁྱག ། ལོ་དེའི་སྟོན་མཇུག་གི་ཞོགས་པ་དེ་ཧ་ཅང་འཁྱག། དེ་ནི་སྐྱེ་བ་འདི་ནས་ཆེས་འཁྱག་པའི་སྟོན་མཇུག་ཅིག་གམ། ཞོགས་པ་ཞིག་ཡིན། གྲང་ཤུར་ཤུར་གྱི་རླུང་བུར་བསྡོངས་ཏེ། གྲང་ཤུར་ཤུར་ཅི་ཞིག་རྣ་བར་ལྷུང་ཚུལ་དེ། སྙིང་ལ་ལྷུང་ཚུལ་དེ། སྐྱེ་བ་ནས་སྐྱེ་བར་བརྗེད་ཐབས་བྲལ་ལོ།།

ཁྱེད་རང་བཞུད་སོང་ཟེར། ཁྱེད་རང་དངོས་གནས་བཞུད་སོང་ཟེར། ཡིན་ནའང་། སྐབས་དེར་ང་ལ་མཚོན་ན《དངོས་གནས》དང《བཞུད་སོང》ཞེས་པ་དེ་དག་ཅི་ཙམ་བརྩེགས་ཀྱང་ནུས་པ་མེད་པར་གྱུར་ཏེ། འཁོར་བའི་བརྩེ་དུང་དང་གཟུང་འཛིན་གྱི་མུན་པ་སྟུག་པོ་ཞིག་གིས་བདག་གི་རྣ་བ་ཡོངས་སུ་གཏན་འདུག། ཡང་ན། རྟག་འཛིན་གྱི་བློ་ངོ་ནས་རླངས་པ་བཞིན་ཡལ་འགྲོ་བ་དེ་དག། ཅི་འདྲའི་ཉམ་ཆུང་བ་ཞིག་རེད།

དེ་ནས་བཟུང་། ནམ་མཁའ་ནི་འདང་མི་ཕོག་པའི་བསམ་གཞིག་གི་ནང་དུ་བྱིང་བ་བཞིན་ཁུ་སིམ་མེར་ཁེར་རྐྱང་གི་གླིང་ཕྲན་འདིའི་སྟེང་ཕྱོགས་ནས་ཚེས་པ་དང་། སྤྲིན་པ་ལང་ལོང་དུ་སྨྲེང་བས་རྒྱུ་བ། རླུང་བུ་ལྡོམ་པོ་དག་སེམས་གཅོང་གིས་ལྡང་བའི་ཉིན་མཚན་འདི་དག། ཚེ་དུས་ལྷག་མའི་རོལ་དབྱངས་ནང་དུ་འཁོར་སྐྱོད་བྱེད་ཀྱིན་འདུག།

པཱ་ལགས། སྐྱེ་བ་གཅིག་ནི་མུན་འོབས་སུ་བསྲིངས་པའི་ལམ་ཀ་ཞིག་སྟེ། འདི་ལས་ང་ཚོས་མཉམ་དུ་འཚོ་བ་ཞེས་པའི་རེག་བྱ་ཞིག་འཚོལ་བཞིན་འོང་ནའང་། ལམ་གྱི་བཞི་མདོ་དེ་ནས་ཁྱེད་རང་ནུབ་ཕྱོགས་སུ་འཐེན་པའི་ལམ་ཀ་དེ་སྙེག་ནས་ང་ཚོ་དང་རིང་དུ་གྱེས་སོང་། ཁྱེད་རང་དེ་ལྟར་གྱེས་སོང་ནའང་། དེ་ནི་ལམ་ཡིན་པས་སྒྱུར་དུ་མེད། དེ་ནི་ཕྱིར་ལྡོག་མེད་པའི་ལམ་དེ་ཡིན་པ་ངས་ཤེས་བཞིན་དུ་རེད།

པཱ་ལགས། ད་ལྟ་སོ་སོར་བཀར་བའི་སྒྱུ་མའི་ཡོལ་བ་ནག་པོ་དེའི་ཚུར་རོལ་ཏུ། ཁྱེད་ཀྱི་ཞལ་གསུང་རེ་རེ་ལམ་གྱི་ཁུག་པ་སོ་སོ་ནས་འོད་ཟེར་བཞིན་མཆེད་ཡོང་། མེ་ལྕེ་བཞིན་མཆེད་འོང་། དེ་དག་མེ་ལྕེ་བཞིན་མཆེད་འོང་དུས། བདག་གི་དབང་རྩའི་སྦུབས་སུ་འཁྱག་རོམ་ལ་འབྱར་བའི་དུས་ཚོད་དང་སེམས་པ་འདི་ག་ལེར་སྲོ་ཐུབ།

པཱ་ལགས། མཚམས་འདིར་སླེབས་དུས། ཁྱེད་ཀྱི་ཡོད་ཚད་མགྲིན་པར་འཁྱིལ་ཡོང་བ་བཞིན་རབ་ཏུ་བརྣངས་བྱུང་། འདི་ནི་བསྐུར་ཡུལ་མེད་པའི་འཕྲིན་པ་ཞིག་སྟེ། རྟ་མཆོག་དང་ཁྲུང་ཁྲུང་གིས་སྐྱེལ་མི་ཐུབ་པའི་འཕྲིན་ཡིག་ཅིག་ཡིན་སྲིད་ནའང་། ཁྱེད་ཀྱིས་ཅིས་ཀྱང་ཡིག་འབྲུ་འདི་དག་མཐོང་ངེས། འོན་ཏེ། ཁྱེད་ཀྱིས་འཕྲིན་ཡིག་འདིའི་ངོས་སུ་ཐུགས་ཡིད་སྨྲེང་བའི་མཆི་མ་མ་གཏོར་རོགས། རྒྱུ་མཚན། བདག་གིས་ད་ལྟ་ཁེར་རྐྱང་དང་གདུང་སེམས། ནད་གཞི་དང་སྐྱོ་གར་མཐའ་དག་གི་མཛེས་པ་མྱོང་ཐུབ། བདེན་པ་མྱོང་ཐུབ། བདག་གིས་སྐྱོ་གར་གྱི་མཛེས་པ་དང་བདེན་པ་ཉིད་མྱོང་གིན་འཇིག་རྟེན་འདིར་བདེ་བར་གསོན་ཡོད། ཐུགས་ཁྲལ་མ་གནང་རོགས།

པཱ་ལགས། ད་ལྟ། ང་ཚོའི་བར་དུ་འཕྲུལ་སྣང་གི་མེ་ཡིས་ཚིག་པའི་ཐལ་རོའི་ནང་གི་འདས་སོང་མ་གཏོགས་ཅི་ཡང་མེད་པས། ཁྱེད་ཉིད་ཅི་ལ་ཡང་མ་ཆགས་མ་ཞེན་པར་བཞུད་ཅིག། བདེ་བར་བཞུད་ཅིག།