འཇིག་རྟེན་འདུ་བྲལ་ཟེར་བ། །

ཤིང་བལ་རླུང་འཁྱེར་འདྲ་ལེ། །

ཕྱོགས་དང་ཕྱོགས་ནས་འོང་སྟེ། །

ལ་མོར་གཞན་ལ་འཁུར་འགྲོ།

འཇའ་འོད་གུར་ཁྱིམ་མཛེས་ཀྱང་། །

གནམ་སའི་བར་གྱིས་ཆོད་ཡོད། །

འཛུམ་དཀར་མདུན་ན་གསལ་ཡང་། །

འཆི་བའི་རབ་ཁས་བཅད་སོང་། །

མིག་མཐའི་ཆུ་བུར་ནང་ལ། །

འཛུམ་ཞལ་མེ་ཏོག་བབས་བྱུང་། །

དྲན་ཤེས་རླུང་བུས་སྒུལ་ཚེ། །

མི་མངོན་དབྱིངས་ལ་འཐིམས་འགྲོ། །

དལ་འབྱོར་རྟེན་བཟང་གྲུ་ཆེན། །

ཐབས་ཤེས་ཁྱེམ་བུའི་བསྐུལ་ཏེ། །

རིག་པའི་རྒྱ་མཚོའི་འཇིངས་ལས། །

ནོར་བུ་ལོན་པར་སྒུག་ཡོད། །

ལས་ཀྱིས་ལམ་འཛོལ་བྱུང་སྟེ། །

དུས་མཐའི་འཐོར་རླུང་ལྡང་བྱུང་། །

དར་ཆེན་སྲོག་གི་ཀ་བ། །

སྐད་ཅིག་རྨང་ནས་བཅགས་སོང་། །

རེ་བའི་རི་རབ་བརྩིགས་ཡོད། །

བརྩེ་བའི་རྒྱ་མཚོ་བསྐྱིལ་ཡོད། །

འགྲོ་ཁར་བདེ་མོ་མེད་པ། །

ཁྲེལ་གཞུང་མེད་པས་ཨེ་རེད། །

ང་དང་ཁྱོད་ཀྱིས་མ་ལན། །

ལེ་བདའ་སུ་ལ་མེད་ཀྱང་། །

འགྱོད་པའི་བྲང་གི་རྔ་བོ། །

ལན་བརྒྱར་བརྡུང་དགོས་བྱུང་སོང་། །

དགེ་འདུན་འདུས་པ་རྒྱ་མཚོར། །

བསྔོ་སྨོན་རྣམ་དག་ཞུས་ཡོད། །

ཕྱི་མར་གངས་རིའི་ལྗོངས་ནས། །

མཛའ་བཤེས་བཞིན་དུ་འཕྲད་ཤོག །