གཞི་ཚང་ཟླ་བ་གྲགས་པ། 2022-04-29
བཅད་ཤེས་ལྟ་བུའི་སྙན་ངག།
ངལ་བའི་དངུལ་ཆུ་མ་བྲུལ།།
ལམ་དང་དཀྱུས་ཐག་བཅད་དེ།།
ས་ཚུགས་ཆུང་ཆུང་ཞིག་ནས།།
ལས་འཕྲོའི་གཤེར་ཆུ་བཞུར་མྱོང་།།
མི་ཚོགས་ཟིང་ཟིང་དབུ་མ།།
གླུ་དང་དགོད་སྒྲས་བཀང་ཡོད།།
གཟུགས་པོ་འཕྱོ་འགྲོས་བར་ནས།།
མིག་ཟུང་ཟུར་ལ་ཤོར་མྱོང་།།
ལྷ་བསྐོས་ས་བོན་མ་མཚུངས།།
འཚར་བའི་སྐྱེས་ཡུལ་ཐ་དད།།
ཆ་མེད་ཕྱོགས་ཡོང་མགྲོན་པོར།།
མིག་གི་བདུད་རྩི་འགྱེད་མྱོང་།།
ཕྱི་ཚུལ་རྣམ་པ་འགལ་བས།།
ཚེ་གྲོགས་བྱ་བར་མ་སྤོབས།།
ཨུ་ཚུགས་བཅོས་མའི་བར་ནས།།
འདུན་མའི་སྐལ་བཟང་ཡལ་སོང་།།
ཧམ་རླུང་ཁོག་ཏུ་མ་འཚུབས།།
ཁྲག་དང་མཆི་མ་མ་དཀུ།།
དམུལ་བའི་དགྱེས་ཞལ་མ་རིད།།
རྨི་ལམ་སྐབས་ཀྱིས་རྨིས་མྱོང་།།
ཐ་ཚིག་བྲག་ལ་མ་བཞག།
བྲག་དཀར་ཕ་རིར་འཆའ་བ།།
ཐང་ཡུད་ཉིན་དང་མཚན་མོ།།
སེམས་ཀྱིས་དམིགས་གཏད་བཅས་མྱོང་།།
འཇིག་རྟེན་དགའ་སྡུག་གཉིས་ཀ།
མ་རྟོགས་རིས་སུ་འཁོར་བས།།
རྟབ་པོར་གྱེས་པའི་མུན་སྲོད།།
ཕྱིར་མིག་ཐེངས་གསུམ་བལྟས་མྱོང་།།
ལམ་ཁ་ཤར་དུ་བདམས་པ།།
ཤར་ཕྱོགས་ཚངས་པའི་གནས་ཡུལ།།
ཐམས་ཅད་གཉིས་སུ་སྣང་ཡང་།།
ཡིད་སེམས་སྨྲེང་བར་མ་བྱུང་།།
སྐྱེས་ཡུལ་ལྷིང་འཇགས་སྟོངས་ཏེ།།
སེམས་པས་རང་རྐྱ་མི་ཐུབ།།
བེམ་རིག་འབྲལ་བར་འཁུ་བའི།།
ཤེས་པ་གནས་ཡུལ་གཞན་ཞིག།
ཚད་མ་སྐད་ཅིག་ཙམ་ཞིག།
ན་ནིང་དྲངས་པའི་ངེས་ཤེས།།
མི་རྟག་ཡིན་པར་ཨེ་གྲུབ།།
སྙུགས་སུ་འགྱུར་བ་མི་སྲིད།།
བདག་ནི་གཡུ་སྦྲང་མ་མོས།།
དུག་གི་སྣ་དང་ཁ་མཆུ།།
འཁྲེན་པའི་འགྱུར་འགྲོས་རེ་རེས།།
ཁྱེད་ཀྱི་མཚར་སྡུག་བཅོམ་འགྲོ།།
ང་ནི་ཕྱེ་ལེབ་སྔོན་པོ།།
སྣང་བའི་གར་ལ་རྩེན་ཏེ།།
ཁྱེད་ལ་ལྟ་སྐོར་ཐུབ་ན།།
སེམས་ཁམས་འདི་ཡིས་འཚེངས་པ།།
འདི་ནི་བརྩེ་དུངས་མ་ཡིན།།
འདི་ནི་དགའ་བ་མ་ཡིན།།
འདི་ནི་སྟེས་དབང་མ་ཡིན།།
འདི་ནི་ལས་འབྲེལ་མ་ཡིན།།
གློ་བུར་དབྱངས་སྙན་ཞིག་གིས།།
གནའ་ནས་བག་ལ་ཞ་བར།།
འཇབ་རྒོལ་ཐེངས་གཅིག་བྱས་པས།།
བག་ཆགས་སད་པ་ཡིན་ནོ།།
རྩོམ་གསར། 10