ཡུམ་ཆེན་ལགས། ཁྱེད་ལ་དུས་རྒྱུན་དུ་ཁོམ་ལོང་མེད་པ་བུ་ཆུང་ངས་ལོས་ཤེས་ཀྱང་ཐ་ན་དེ་རིང་ཡང་ཁོམ་གྱིན་མེད་པ་ཤེས།

ཡུམ་ཆེན་ལགས། ཁྱེད་ཉིད་ནི་འུ་ཚང་གི་དེད་དཔོན་ཡིན་ལ། ངེད་མིང་སྲིང་ཚོའི་ཚེ་ཚེ་རབས་རབས་ཀྱི་ཟུངས་ཁྲག་ཀྱང་ཡིན།

ཡུམ་ཆེན་ལགས། ཁྱེད་ཉིད་ནི་བུ་ཆུང་ངའི་མུན་ནང་གི་སྒྲོན་མེ་དང་ལམ་ལ་ཆས་དུས་ཀྱི་སྒལ་ཚིགས་གསོན་པོ་དེ་ཡིན།

ཡུམ་ཆེན་ལགས། ཁྱེད་ཀྱིས་བསླབ་བྱ་ལས་བུ་ཆུང་ང་ལ་ཕུགས་འདུན་ཡོད་པར་མ་ཟད་བརྩོན་འགྲུས་ཀྱི་རྟ་ཕོ་གནང་བྱུང་།

ཡུམ་ཆེན་ལགས། ཁྱེད་ཀྱིས་མངར་བསྐྱུར་གྱི་འཚོ་བ་ལས་བདེ་སྐྱིད་ཀྱི་ཁྱིམ་ཚང་བསྐྲུན་པར་མ་ཟད་རྒྱུད་འཛིན་བྱས་ཡོད།

ཡུམ་ཆེན་ལགས། ཁྱེད་ཉིད་ཀྱིས་འབད་འབུངས་ལས་ང་ཚོ་ལ་དད་སེམས་ཡོད་པར་མ་ཟད་འགྱུར་མེད་ཀྱི་སྙིང་སྟོབས་བསྩལ་ཡོད།

ཡུམ་ཆེན་ལགས། ཁྱེད་ཉིད་ཀྱི་ཕྱག་ཟུང་ལས་གཉོམ་ལག་རྒྱས་ལ་བྱམས་སྐྱོང་ལས་གོམ་པ་སྤོས་མགོ་བརྩམས་པ་ཡིན།

ཡུམ་ཆེན་ལགས། ཁྱེད་ཉིད་ནི་ངེད་མིང་སྲིང་ཚོའི་དཔྲལ་བའི་མིག་དང་ཡ་ཁོག་གི་སྙིང་ཡིན་པ་སྨོས་ཅི་ལ་དགོས།།