སྐྱ་ཀུན་བཟང་དར་རྒྱས། 2022-04-26
ཚིག་ཇ་བསྐོལ་ནས་ཁོལ་བྱུང་།།
ཉི་མའི་འཇའ་ལ་ཅེར་རོགས།།
སང་ཉིན་རླུང་དུ་ཐིམ་པ།།
ང་དང་ཁྱོད་ཀྱི་རྨི་ལམ།།
ཡང་ན་དཀར་ཡོལ་ངོས་སུ།།
གཟིམས་པའི་ལེའུ་མཐའ་མ།།
ལ་ཆུང་ལུང་ཆུང་རེ་ལ།།
སྤྲིན་གྱི་ངོ་པགས་ཐོགས་འདུག།
ཡང་ཡང་སྒུག་པའི་སྣང་བ།།
ཡེ་ནས་དྭངས་རྒྱུ་མི་འདུག།
ཕར་འཁོར་སྙིང་གི་ཟླ་བ།།
དབྱངས་མའི་དབུ་རུ་ཡིབ་ཚེ།
སྟོན་ཟླ་འདྲེན་པའི་རྩྭ་སྐྱ།།
རང་མལ་ནང་ནས་འདར་སོང་།།
དབེན་པའི་རི་ཁྲོད་ཅེས་པ།།
སེམས་པས་ང་ལ་བརྗོད་བྱུང་།།
གྲོང་ཁྱེར་འཁྱར་པའི་རྣམ་ཤེས།།
མཚན་ཞག་གཉིད་དུ་མ་ཡུར།།
ཡར་གྱི་ལྕམ་གསེབ་ནང་དུ།།
ཅི་ཞིག་འགྲོ་བ་དྲན་གྱིན།།
མར་གྱི་སྒོ་ཐེམ་ཐོག་ཏུ།།
ཅི་ཞིག་ཤར་བ་བསམ་བཞིན།།
རང་སེམས་བདེ་བའི་ངང་དུ།།
སྐྱིད་པོར་ཉལ་དབང་མ་བྱུང་།།
རབ་བྱེད་མུ་ཏིག་འདྲ་པོ།།
ཕྱི་ནས་ནང་དུ་བྲིས་ཤིང་།།
ནང་ནས་ཕྱི་རུ་བྲིས་ཀྱང་།།
ང་ལ་དགོས་པའི་འདོད་ལོ།།
ད་དུང་ཚིམ་རྒྱུ་མི་འདུག།
ད་ཡང་སྨྱོ་པ་ཞིག་བཞིན།།
རྫུན་མའི་སྨྱོ་པ་ཞིག་བཞིན།།
གློག་རིས་དོབ་དོབ་དབུང་དུ།།
བརྒྱ་རྩ་བརྒྱད་ཅེས་གླེང་ཞོར།།
གསེར་གྱི་ག་འུའི་ནང་ནས།།
གཞོན་པའི་གངས་རི་གློང་ངོ་།།
རྩོམ་གསར། 10