འཛམ་གླིང་འཕྲོད་བསྟེན་རྩ་འཛུགས་ཀྱིས་སྤྱི་དམངས་ཀྱི་བདེ་ཐང་ཆུ་ཚད་ཇེ་མཐོར་གཏོང་བའི་ཆེད་དུ། ཞིབ་ཕྲ་དང་སྤྱོད་གོ་ཆོད་པའི་བདེ་ཐང་ཕྱོགས་སྟོན་ཏེ་ཟས་རིགས་ཉེན་མེད་ཀྱི་གཙོ་གནད་ཆེན་མོ་ལྔ་བཏོན་ཡོད་པ་སྟེ།

ཀ། གཙང་སྦྲ་བྱ་དགོས།

“ཟ་མ་མ་ཟོས་གོང་དང་ཟོས་རྗེས་ལག་པ་བཀྲུ་དགོས་པ”ནི་ཁྱོད་རང་ཆུང་ངུའི་དུས་ནས་ཤེས་སྲིད། དེ་ལས་གཞན་ད་དུང་ཟ་མ་མ་ལས་གོང་དང་ལས་དུས་སུ་ཡང་ལག་པ་བཀྲུ་རྒྱུར་མཉམ་འཇོག་དགོས་ལ། ཟ་མ་ཚོས་རློན་གཉིས་ཀ་བརྗེ་སྤོར་བྱེད་པའི་བརྒྱུད་རིམ་ཁྲོད་ལྷག་པར་མཉམ་འཇོག་དགོས། ཐབ་ཚང་གི་ཅ་ལག་དག་གཙང་མ་བྱ་དགོས་པ་ནི་སྨོས་མེད་རེད། དཔེར་ན། དཀར་ཡོལ་དང་ཐུར་མ། ཐུར་ཁུག གྲི། ཤིང་ལེབ། ཐབ་ཕྱིས་སོགས་ཀྱི་གཙང་སྦྲ་ལ་མཉམ་འཇོག་བྱས་ཏེ། དེ་དག་སྦགས་བཙོག་གི་འབྱུང་ཁུངས་སུ་འགྱུར་དུ་འཇུག་མི་རུང་། ཐབ་ཚང་དང་ཟས་རིགས་ཉར་འཇོག་བྱེད་ས་རུའང་འབུ་དང་ཙི་གུ་ཡོང་བར་སྔོན་འགོག་བྱ་དགོས་ལ། ཁྱིམ་གསོས་སྲོག་ཆགས་ཀྱང་ཐབ་ཚང་དུ་རྩེ་རུ་འཇུག་མི་རུང་།

ཁ། ཟ་མ་ཚོས་རློན་དགར་ནས་འཇོག་དགོས།

འདིར་བཤད་པའི“ཚོས་མ”ཞེས་པ་ནི་གཏུབ་རྗེས་ཐད་ཀར་ཟོས་ཆོག་པའི་ཟ་མ་ལ་གོ་སྟེ། དཔེར་ན་ཚག་ཤ་ལྟ་བུ། “རློན་པ”ཞེས་པ་ནི་གཏུབ་རྗེས་ད་དུང་བཙོ་དགོས་པའི་རིགས་ལ་ཟེར། ཚོས་རློན་དགར་བ་ནི་ཟས་རིགས“རློན་པ”ཡི་སྟེང་དུ་ཡོད་སྲིད་པའི་འབུ་ཕྲ་རྣམས་ཟས་རིགས“ཚོས་མ”ཡི་སྟེང་དུ་འགོས་ཏེ་ཟས་རྐྱེན་ལས་བྱུང་བའི་ནད་ཡམས་སྔོན་འགོག་བྱེད་ཆེད་ཡིན། འདིར་བརྗོད་པའི་དགར་བ་ནི་རིགས་དེ་གཉིས་ཐུག་ཏུ་མི་འཇོག་པ་རྐྱང་རྐྱང་མ་ཡིན་པར། ད་དུང་ཤིང་ལེབ་དང་གཏུབ་གྲིའི་རིགས། སྣོད་ཅ་ལག་ཡོད་ཚད་ཀྱང་སོ་སོར་དགར་ནས་འཇོག་དགོས་པ་དེ་ཡིན།

ག། ཚོས་ཐག་ཆོད་དུ་འཇུག་པ།

ཚོས་ཐག་ཆོད་དུ་འཇུག་ན་སྤྱིར་བཏང་དུ་སྐར་མ10ནས15དགོས་ལ། གལ་ཏེ་ཤ་ཆེན་པོ་ཞིག་ཡིན་ཚེ། (དཔེར་ན་བྱ་ཤ་ཧྲིལ་པོ་གཅིག) ཚོས་ཐག་ཆོད་པའི་དུས་ཚོད་དེ་ལས་ཀྱང་རིང་བ་ཡིན།

ཉེན་མེད་ཀྱི་དྲོད་ཚད་སྲུང་འཛིན་བྱེད་པ།

ནད་སྐྱེད་ཕྲ་ཕུང་མང་ཤོས་ཤིག་ནི་དྲོད་ཚད་མཐོ་བའི་ཁོར་ཡུག་ལ་དགའ་བ་དང་། 70℃ལས་མཐོ་བའམ5℃ལས་དམའ་བར་གྱུར་ཚེ་འབུ་ཕྲ་དག་གསོན་དཀའ་བ་ཡིན། སྤྱིར་བཏང་དུ་ཟས་རིགས70℃ཡི་ཡན་དུ་ཉར་ཚགས་བྱེད་མི་སྲིད་དེ། ང་ཚོས་གཙོ་བོ་འཁྱགས་སྒམ་གྱི་དྲོད་ཚད་དམའ་བོར་འཇོག་གིན་ཡོད་མོད། འོན་ཀྱང་འཁྱགས་སྒམ་ཡང་ཉེན་སྲུང་སྒམ་མིན་པས། འབུ་ཕྲ་ཉུང་ཤས་ཤིག་དྲོད་ཚད་དམའ་མོ་རུའང་སྐྱེ་འཚར་བྱེད་ཐུབ། དཔེར་ན། ལི་སི་ཐེ་རིགས་ཀྱི་འབུ་ཕྲ་ལྟ་བུ། དེའི་རྐྱེན་གྱིས་འཁྱགས་སྒམ་ནས་བླངས་པའི་ཟས་རིགས་དག་ངེས་པར་དུ་བསྲོས་ནས་ཟ་དགོས།

ང་། ཆུ་དང་ཟས་རིགས་བཟང་པོ།

ཟས་རིགས་ཉེན་མེད་ཡིན་འདོད་ན་ཐོག་མར་རྒྱུ་ཆ་ཉེན་མེད་ཡིན་དགོས། དྭངས་གཙང་གི་རང་འབབ་ཆུ་ཡིས་སིལ་ཏོག་དང་སྔོ་ཚོད་བཀྲུ་དགོས་ལ་ཟས་རིགས་ཀྱི་རྒྱུ་ཆ་གསར་པ་ཉོ་དགོས། ཉོ་ཐེངས་གཅིག་ལ་ཟས་རིགས་མང་པོ་མི་ཉོ་བ་དང་། སྤུས་ཚད་འགན་ལེན་གྱི་ཉིན་ཚོད་ཡོལ་བའི་ཟས་རིགས་མི་ཟ་བ་དང་། ཟས་རིགས་རུལ་བ་མར་གཡུགས་པར་སེར་སྣ་ཆེ་མི་རུང་།

དེ་མིན། ཟ་མ་རུལ་བ་དང་གཙང་མ་མིན་པ། གནོད་ལྡན་དངོས་པོ་ཡོད་པའི་ཟས་རིགས་མི་ཉོ་ཞིང་མི་ཟ་བ་དང་། གར་འོང་མི་ཤེས་པའི་ཟས་རིགས་མི་ཟ་བ། བཟོ་གྲྭ་དང་བཟོ་གྲྭའི་ས་གནས་མེད་པ་དང་། སྤུས་ཚད་འགན་ལེན་གྱི་དུས་ཚོད་སོགས་མཚོན་རྟགས་མི་ཚང་བའི་ཟས་རིགས་མི་ཉོ་བ། འཛིན་ཡིག་མེད་པའི་ཚོང་ཁང་དང་གཙང་སྦྲ་མི་ལེགས་པའི་ཟ་ཁང་དུ་མི་འགྲོ་བ། སྲང་ལམ་དུ་འཚོང་བཞིན་པའི་ཟས་རིགས་དང་སྤུས་ཞན་སྐོམ་ཆུ་གང་འདོད་དུ་མི་ཉོ་བ། ཟ་མ་མ་ཟོས་གོང་དང་གཙང་སྤྱོད་བསྟེན་རྗེས་སུ་ལག་པ་བཀྲུ་བའི་གོམས་སྲོལ་ཆགས་སུ་འཇུག་པ། ཟ་མ་ཟ་དུས་བྲོ་བ་འགྱུར་ཡོད་པའི་ཟ་མར་འཕྲད་ན་མྱུར་དུ་ཟ་མཚམས་འཇོག་པ་བཅས་བྱེད་དགོས།།