གཤམ་གསལ་གྱི་ལུས་སྦྱོང་རྣམ་གྲངས་དེ་ཚོ་ཕྲུ་གུར་འཚམ་པོ་མི་འདུག

1.དུས་ཚོད་རིང་དྲགས་པའི་ལུས་རྩལ་རིགས། ལོ་དྲུག་མན་གྱི་ཕྲུ་གུས་རྒྱང་རྒྱུག་དང་རི་འཛེག་སོགས་ཐེངས་གཅིག་རང་བཞིན་གྱི་ལམ་ཐག་རིང་ཚད་སྨི2000ཡན་གྱི་ལུས་སྦྱོང་བྱེད་མི་རུང་། ལོ་ན6ནས12བར་གྱི་ཕྲུ་གུས་དུས་ཡུན་ཆུ་ཚོད2ཡན་གྱི་གོམ་པ་སྤོས་ན་མི་འཚམ། ཕྲུ་གུའི་དབུགས་ལམ་མ་ལག་དང་འཁོར་སྐྱོད་མ་ལག ཤ་གྲིམ་མ་ལག་བཅས་ཀྱི་ནུས་ཚད་བརྗེ་ཚབ་ཆུ་ཚད་དམའ་བས། ལུས་པོའི་དབྱང་རླུང་འདོན་སྤྲོད་ནུས་པས་ལུས་སྦྱོང་རྣམ་གྲངས་དེ་རིགས་ཁྲོད་ཀྱི་ཟད་གྲོན་དུས་ཐོག་ཏུ་གསབ་མི་ཐུབ།

2.རྐང་ལག་མི་འགུལ་བའི་ལུས་རྩལ་རིགས། གྱེན་ལངས་དང་ལྗིད་འདེགས་སོགས་རྐང་ལག་མི་འགུལ་བའི་འགུལ་སྐྱོད་ཀྱི་རྣམ་པ་འདིས། ཤ་གནད་མུ་མཐུད་དུ་ཛ་དྲག་དང་ཤུགས་བཀོལ་གྱི་རྣམ་པར་གནས་ཀྱི་ཡོད། ཕྲུ་གུའི་ཤ་གནད་མི་རྒྱས་པས། དེ་ལྟར་ཡུན་རིང་སོང་ན་ཤ་གྲིམ་དུབ་རྨས་འབྱུང་སྲིད། དེ་དང་ཆབས་གཅིག ལུས་རྩལ་རྣམ་གྲངས་འདིས་སྒལ་གཞུང་དང་རྐེད་ཚིགས། བྲང་ཚིགས་སོགས་ལ་གནོན་ཤུགས་སྟེར་ལ། བྱིས་པའི་འཚར་སྐྱེ་ལ་ཡང་ཤུགས་རྐྱེན་ཐེབས་སྲིད།

3.ཡོ་བྱད་བཀོལ་སྤྱོད་ཀྱི་ལུས་རྩལ་རིགས། འཚོ་བའི་ཁྲོད་རྒྱུན་མཐོང་གི་ཤེས་སྦྱོང་ཡོ་བྱད་དང་ལྗིད་འདེགས་ཡོ་བྱད་དག་གིས་ལུས་ཕུང་ལ་ནུས་ཤུགས་ཆེན་པོ་ཐེབས་སུ་འཇུག་པ་དང་། ཕྲུ་གུའི་ཤ་གནད་འཚར་སྐྱེ་འཐུས་ཚང་མིན་པས། སྔ་མོ་ནས་ཡོ་བྱད་བཀོལ་སྤྱོད་རིགས་ཀྱི་ལུས་རྩལ་རྩེད་ན། ཕྲུ་གུའི་སྙིང་དང་གློ་བའི་འཚར་སྐྱེ་ལ་གནོད་པ་ཡོད།

ལོ་ཚད་མི་འདྲ་བར་འཚམ་པའི་འགུལ་སྐྱོད།

ལོ་ཆུང་བྱིས་པས་རང་ཉིད་ཀྱི་ལུས་ཁམས་དོ་སྙོམས་ལ་ཕན་པའི་ལུས་རྩལ་རྣམ་གྲངས་གདམ་དགོས་པ་སྟེ། དཔེར་ན་ཆུ་རྐྱལ་དང་སྦེ་ག་སོགས་ལུས་རྩལ་རྣམ་གྲངས་ཀྱིས་གཟུགས་པོའི་ཕྱོགས་ཡོངས་ཀྱི་བྱང་ཚད་མཐོ་རུ་འགྲོ་རྒྱུར་རྨང་གཞི་ཡག་པོ་འདིང་ཐུབ།

གཞོན་ནུ་ལོ་ཆུང་གིས་འགུལ་སྟངས་ཞིབ་མོ་ཅན་གྱི་ལུས་རྩལ་རྣམ་གྲངས་གདམ་དགོས། དཔེར་ན་ཕིང་ཕང་སྤོ་ལོ་དང་། བྱ་སྒྲོའི་སྤོ་ལོ། ལན་ཆིའུ་སྤོ་ལོ་སོགས་ལྟ་བུ། རྣམ་གྲངས་འདི་དག་གིས་ན་གཞོན་ཚོའི་གཟུགས་གཞི་ཐང་དུ་གཏོང་ཐུབ་པ་དང་། རིག་པ་སྐྱེན་པོ་ཡོང་ཐུབ། གཞན་ཡང་། དབུགས་ཐག་རིང་དུ་གཏོང་ཐུབ་ལ། ཉེ་སྒྲིབ་མི་ཡོང་བ་བཅས་བྱེད་ཐུབ།

ཇི་ལྟར་ཆུང་ན་དེ་ལྟར་བཟང་། ཕྲུ་གུ་ལོ་ན་ཇི་ཙམ་ཆུང་ན་འཁོར་ཤུད་དེ་ཙམ་གྱིས་སྦྱོང་སླ་པོ་ཡོད། ལོ་གསུམ་བཞི་ཙམ་གྱི་སྐབས་སུ་ཕྲུ་གུའི་ལུས་པོའི་ལྗིད་ཚད་ཆུང་ལ་མཉེན་གཤིས་ཆེ་བས་གཟུགས་པོར་ཚོད་འཛིན་བྱེད་སླ་པོ་ཡོད་པ་རེད།