ཉི་གཞོན་འོག་གི་རྩྭ་ཐང་སྣུམ་ཞིང་འཇམ།།

ཆར་ཟིམ་ཁྲོད་ཀྱི་འཇན་ཚོན་དྭངས་ཤིང་མཛེས།།

དེ་ལྟ་ན་ཡང་འཁོར་བའི་སྡིག་སྒྲིབ་ཀྱིས།།

ལྷག་པའི་གཟུགས་སྒྲ་དྲི་རོ་བསྐལ་བར་བྱས།།

སྤྲིན་དཀར་བཞིན་ལ་རྡུལ་གྱི་ནག་ཐིག་ཆགས།།

གཟུགས་མེད་རླུང་གིས་ལུས་ཀྱི་བ་སྤུ་གཟེངས།།

ལྕང་མའི་འདབ་ལོ་རྒས་པའི་སྟོན་ཚིགས་ནས།།

བག་ལ་ཉལ་བའི་དབྱར་ཁ་ཡིད་ངོར་ལྡིང་།།

འཁོར་བའི་ཉི་མས་རི་ལུང་གཙེས་ན་ཡང་།།

རྡོག་ཁྲེས་བོར་བའི་བྱ་བྱེའུ་དེ་དག་ཀུན།།

ལྗོན་པའི་ཡལ་གར་གྲིབ་བསིལ་བདེ་བ་བསྔལ།།

ཉི་ཟླའི་གསུང་སྐད་འབྱིན་པའི་ངང་ཚུལ་སྡུག།

ཆར་སྨུག་དཀྱིལ་དུ་གཞིས་སྒར་ཆགས་ན་ཡང་།།

རླུང་བུས་བལྡག་ཡོང་བསམ་པའི་ན་ཟུག་འཇགས།།

འཇིག་རྟེན་དུས་བཞི་སྙོམས་པའི་རྩྭ་ཐང་དུ།།

བག་ཕེབས་ཅི་དགར་རྩེན་འདི་ཤིན་ཏུ་སྤྲོ།།

རབ་ཏུ་འདྲིས་པའི་སྤང་སྐྱིབས་ལྗོན་ཤིང་གིས།།

རྨི་ལམ་དབུས་ཀྱི་གླིང་ཕྲན་ཕྱིན་པར་བྱེད།།

འདུ་བྱེད་ཚེ་ཡི་དམུ་ཐག་མ་ཆད་གོང་།།

སེམས་ཀྱི་གྲོང་ནས་ཕྱིར་ལྡོག་མེད་ན་སྙམ།།

དེ་དུས་ང་ཡི་ནམ་མཁའ་དག་ཅིང་གཙང་།།

དེ་དུས་ང་ཡི་མཚེའུ་ཆུང་དྭངས་ཤིང་བསིལ།།

ཁུག་སྣ་ཡལ་བའི་གྱེར་ཟའི་རི་མགུལ་ནས།།

དེ་དུས་ཅེར་གྱིས་བལྟས་པས་རྒྱང་རིང་མཐོང་།།

ཉོན་མོངས་ཉེས་པའི་ཁང་ཤག་འཛུགས་སྐྲུན་གྱིས།།

དེང་མར་རྨི་ལམ་མང་བའི་དེའུ་འོབས་བསྲངས།།

བྱམས་བརྩེ་བྲལ་བའི་ས་རྐོ་འཕྲུལ་ཆས་ཀྱིས།།

བདག་གི་ཏིང་འཛིན་ར་བ་ཉམས་རྨས་བཏང་།།

འཇིག་གཞོམ་བྲལ་བའི་ལོ་ཟླའི་བཀའ་ཆད་ཀྱིས།།

ཡལ་བར་གྱུར་པའི་ཉེ་མི་ཡིད་ལ་བཅགས།།

རང་གནས་བཞུར་བའི་གཙང་བོ་ནག་པོ་བཞིན།།

ཕྱིར་ལྡོག་མེད་ཀྱང་ལག་ཟུང་ཡང་སྲིང་བྱེད།།

ཉི་རྒས་གྲིབ་མ་བདག་གི་བྲང་ལ་ཟུག།

དོན་སྣོད་ལྷགས་པས་སྡོམ་པའི་གྲང་ངར་སློང་།།

གོ་ཁྲབ་གྱོན་པའི་བསྐལ་པའི་དབལ་རླུང་གིས།།

ཚ་གྲང་དམྱལ་བའི་གྲོང་ལ་ཤུགས་ཀྱིས་འདེད།།

ཐར་པའི་གཞུང་ལམ་རྒྱང་རིང་མེད་ན་ཡང་།།

ལྕགས་སྒྲོག་ཐེབས་པའི་རྟ་ཕོ་ཉམ་རེ་ཆུང་།།

ད་ནི་བཀྲག་མདངས་ཡལ་བའི་རྩི་ཤིང་གིས།།

སྟོན་ཁའི་རྒྱབ་ཀྱི་ལོ་ཟླའི་འཇིགས་སྐྲག་སྔོག།

ས་ནག་གད་པས་བཟུང་བའི་ལུང་གཤོང་དུ།།

ཐོབ་ཤོར་འདུ་འབྲལ་སྒྱུ་མའི་རྡུལ་རླུང་འཚུབ།།

ཀྱེ་མ་དཔྱང་ཟམ་བྲལ་བའི་གྲུ་ཟུར་ནས།།

འཁོར་བ་སྡུག་བསྔལ་རྒྱ་མཚོའི་རྦ་རླབས་མཐོང་།།