དབྱར་གསུམ་རི་སུལ་འཛོམས་པ་ལས་དབང་ཡིན་ནམ།།

མཚར་སྡུག་མཛེས་པར་རོལ་བའི་ཁྱོད་དང་ང་རང་།།

བྱ་རོག་འུག་པ་ལྟ་བུའི་འགལ་ཟླ་མིན་པས།།

མ་འཁོན་རྣམ་འགྱུར་དག་ནི་སྙིང་དུ་སྡུག་གི།།

ཉི་འོད་ལམ་ལམ་འཚེར་བའི་དུས་ཚོད་ནམ་ཡང་།།

ལྗོན་པའི་བསིལ་གྲིབ་དད་ཅིང་ཚང་དུ་ཡིབ་དུས།།

ཉིང་དགོས་ཁ་ཟས་མི་འཚོལ་ལྷ་བྱ་གོང་མོ།།

མཐའ་གཉིས་ཐེ་ཚོམ་ཞགས་པའི་རྒྱ་ལ་ཚུད་འདུག།

ཆར་བ་ཟིམ་ཟིམ་འབབ་ཀྱང་སྣང་དོགས་མེད་པར།།

རི་ལུང་ཡར་མར་འདུར་ཞོར་གླུ་དབྱངས་ལེན་དུས།།

ཀུན་རྫོབ་སྒྱུ་མར་གཟིགས་པའི་སེམས་དཔའ་སེམས་མས།།

མཉམ་རྗེས་བཏང་སྙོམས་བཞག་ནས་བཞུགས་པ་མཐོང་ངོ་།།

མེ་ཏོག་སྣ་བརྒྱའི་ལང་ཚོར་རྒས་ཚུགས་དོད་ཅིང་།།

མི་སྡུག་བསིལ་རླུང་འཁྱམ་པོ་འུར་འུར་རྒྱུ་བ།།

ཁྱོད་རང་རྒྱང་རིང་འགྲིམ་པའི་བརྡ་ཐབས་ཡིན་པས།།

བདག་གི་སེམས་པ་འདི་ཡང་རྒྱུན་ལྡན་མ་རེད།།

ལྷོ་ཕྱོགས་མུན་གྱི་གྲོང་ལ་གཤོག་འགྱུར་ལྡེམ་སོང་།།

རྟག་པའི་གནས་ཡུལ་འདི་ནས་གྲང་ངར་རྒོད་ཀི།།

འོན་ཀྱང་དགུན་ཟླ་མི་རོལ་ཐབས་ཇུས་མེད་པས།།

འཚོ་སྟངས་གྲུ་གསུམ་འདི་ལ་གོམས་ལོབ་བྱུང་ན།།

འདས་པའི་ཚུལ་དང་ཀུན་སྤྱོད་ཡིད་ལ་དྲན་ཏེ།།

སེམས་ཀྱི་ན་ཚ་ཟུག་གཟེར་འཇགས་པ་མེད་དུས།།

འདྲ་གཟུགས་བརྙན་རིས་དག་ལ་སེམས་པ་གླན་ཏེ།།

གདོང་གི་མིག་ཆུ་བསིལ་མ་སྤྲིན་པར་བསྐུར་ཡོད།།

སོས་ཀའི་རི་ལུང་ཐང་གསུམ་གཡུ་ལོས་བརྒྱན་པ།།

འུ་གཉིས་སླར་ཡང་འཛོམས་པའི་དུས་ཚིགས་ཡིན་འགྲོ།།

གཉུག་མའི་ཞལ་འཛུམ་སྐྱོང་བཞིན་ཁམས་འདྲི་ཞུ་དུས།།

དབྱར་གསུམ་རི་སུལ་འགྲིམས་པའི་ཁུ་བྱུག་ཡིན་ན།།