རྐྱང་ཉུལ་གདོང་ནག། 2022-05-13
ཆར་ཤུལ་སྨག་ལམ་མོག་པོའི་གཞོགས་ངོས་ན། །
ལྷིང་འཇགས་གུར་ཁང་ཡངས་པོ་སུ་ཡིས་བརྩེགས། །
རྣམ་ཤེས་སྐྱ་བོས་སྒེར་ལམ་བསྙེགས་རྗེས་སུ། །
འོད་དཀར་དགུང་ལ་མ་ཤར་ཅི་ཡི་རྐྱེན། །
དབུགས་ཀྱི་འབྱིན་རྔུབ་བར་ནས་བརྡ་ཞིག་འབྱོར། །
ཁམས་འདི་འཁོད་སྙོམས་ཡིན་ལུགས་མ་འབྲི་ཞེས། །
ཡ་ཆུང་སྲོག་གི་མཐིལ་ནས་བརྡོལ་བས་ན། །
མཚན་གཞུང་རྨི་ལམ་ཆས་པའི་རྐང་ཐང་ཅི། །
སྐྱི་བསེར་ལུས་ལ་ལྡང་བའི་བསིལ་བ་ཡིས། །
ཨ་མའི་རུམ་ཁོལ་དྲོད་མོ་བསྒོམས་མཐའ་རུ། །
ལྷོད་ཡངས་བག་ལ་ཉལ་བའི་ཆོ་འཕྲུལ་ལས། །
སྲོད་གཞུང་སྣང་བའི་རི་མོ་རུས་ལ་ཡིབས། །
ཚོར་བརྗོད་རྣལ་མ་བཤུས་པའི་ཚིག་ཁྱིམ་ན། །
བརྒྱ་སྟོང་ཁྲི་མ་འབུམ་གྱི་ཟློས་གར་བརྩམས། །
མྱོང་བ་དྲན་པ་གསལ་པོའི་རང་གཟུགས་ཀྱིས། །
བཅོས་ལྷད་སྒྱུ་མ་བྲལ་བའི་ཕུང་པོ་བཞེང་། །
རྩོམ་གསར། 10