དུས་གསུམ་དུས་ཀྱི་རི་མོ་གཡོ་བའི་འགྲོས། །

དྲི་ཟའི་དབྱར་རྔ་རྡུང་བའི་སྙན་ངག་པས། །

ངག་རིག་སོར་མོའི་གར་དུ་ཉེར་བསྒྱུར་ན། །

མགྲིན་བཟང་འོ་མའི་རོ་མངར་ཅི་དགར་རོལ། །

ཀུན་རྟོག་རལ་བ་ནག་པོ་གསིག་པ་ན། །

གཉིས་འཛིན་རེ་དོགས་སྐྱ་བོའི་ན་བུན་གྱིས། །

དགའ་སྐྱོའི་རྨི་ལམ་མཚོན་པའི་ཕོ་ཉ་མོ། །

ཚིག་གི་སྒྱུ་རྩལ་ངོམ་པའི་དཔལ་དུ་འཛིན། །

ཀུན་རྫོབ་སྣང་བའི་བུ་མོའི་རྫུན་རིས་ཀྱིས། །

སྐྱེ་འཆིའི་འཆར་རིམ་མཐོང་བའི་ལྗོངས་ཡངས་སུ། །

སྡང་ཞེན་སྤྲོས་པའི་མཚན་མ་གཡོས་པ་ན། །

སྲིད་གསུམ་སྒྱུ་མའི་ལས་མཐའ་རྫོགས་པ་མེད། །

ལོ་ཟླ་ཕལ་ཆེར་དྲན་པའི་ཡུལ་དུ་གྱུར། །

ཞག་གྲངས་རེ་ལས་འཚོ་བའི་གཏམ་རྒྱུད་འཁྲུངས། །

མི་ཚེའི་མཐོང་སྣང་གཙང་བོའི་གཉེར་རིས་བཞིན། །

ལས་རླུང་ཅི་དགར་རྩེན་པའི་རྗེས་སུ་བསྙེགས། །

དུས་ཀྱི་བསྐྱོད་མཚམས་བརྒལ་བའི་ཕ་མཐའ་ན། །

འདས་པའི་འཇིག་རྟེན་འཚོལ་བའི་ཞེན་སྣང་དག །

ད་ལྟའི་དྲན་པའི་ངོགས་སུ་སྐད་ཅིག་གིས། །

དགའ་སྐྱོ་སྤེལ་མ་མྱོང་བའི་ཚུལ་དུ་འཕོས། །

ཐུན་བཞིའི་ཏིང་འཛིན་སྐྱོང་བའི་དྲང་སྲོང་དང་། །

སེམས་ཉིད་རྗེན་ཅར་འཚོལ་བའི་བྱ་གཏང་བས། །

རྫ་དང་ནགས་ཁྲོད་འདི་ཡི་ལྟོ་བ་ནས། །

འཁོར་འདས་ལྟད་མོར་རོལ་བའི་ཉམས་གླུ་འཐེན། །

བུ་ཡུག་ལྷག་ལྷོག་ལྡང་བའི་དགུན་མཚམས་དེར། །

བདག་ཀྱང་ཆོས་པའི་ཟོལ་གྱི་ཡུན་ཙམ་ལ། །

རྟོགས་ལྡན་རྣལ་འབྱོར་རྒན་པོའི་རྗེས་ཤུལ་དུ། །

རིག་པའི་བཙན་ས་ཟིན་པའི་རྟེན་འབྲེལ་བསྒྲིགས། །

འོན་ཏེ་འདོད་ཡོན་མེ་ཏོག་འཛུམ་ཁ་མས། །

ཡིད་ཀྱི་ཏིང་འཛིན་དཀྲོགས་པའི་ངང་ཚུལ་གྱིས། །

ད་ལྟའི་མཆར་སྒོ་འདི་ཡི་མཛའ་ན་མོ། །

སྒྱུ་མའི་གདོང་འབག་འཁུར་བའི་གསེབ་ནས་སྟོན། །

བདག་འཛིན་རུ་དྲ་ནག་པོའི་ཆོ་འཕྲུལ་གྱིས། །

ཆགས་རྟོག་གར་མཁན་བུ་མོའི་རྗེས་འབྲངས་ཏེ། །

སྲིད་གསུམ་སྒྱུ་མའི་གྲོང་ཁྱེར་ཉུལ་བྱས་ཚེ། །

མདོ་མེད་འཁྱམ་པོའི་བུ་ཆུང་ཞེ་རེ་སྐྱོ། །

ཚོགས་དྲུག་སྤྲེའུ་རྩེན་པའི་སྣང་ཡུལ་ཀུན། །

འཁོར་བའི་གཟུགས་མོ་སྟོན་པའི་ངང་ཚུལ་ཏེ། །

གཅིག་རྗེས་གཅིག་གིས་དེད་པའི་ཉམས་འགྱུར་གྱིས། །

ཐ་མའི་སྡང་ཞེན་འདི་ཡི་གཡེམ་མ་ཉིད། །

བྱིས་པའི་དུས་ནས་ད་ལྟའི་གཞོན་པའི་བར། །

མི་ལོ་ཉེར་དྲུག་ཙམ་ཞིག་རྫོགས་ལ་ཉེ། །

སྲིད་པའི་འཚོ་བ་ཕྲ་མོའི་གཏམ་རྒྱུད་ལུས། །

རང་བློ་ངོམས་པའི་བྱ་བ་གཅིག་མི་འདུག །

རེ་སྐྱིད་རེ་སྡུག་མྱོང་མའི་མི་ཚེ་འདི། །

མི་སྡོད་གྱ་གྱུ་གཡོ་བའི་ཆུ་ཕྲན་ཏེ། །

ལས་ཀྱི་ལན་ཆགས་འཁོར་བའི་ངང་ཚུལ་གྱིས། །

གཅིག་པུར་འོང་ཞིང་གཅིག་པུར་གཞན་དུ་འགྲོ། །