གངས་དཀར་ཨ་མའི་ནུ་བཞོ་མངར་མོ་ཡིས།།

བསྐྱངས་པའི་ཁྱེའུ་ས་ཆེན་བགྲང་ལས་འདས།།

མ་རྨོངས་ཤེས་བྱ་མཐའ་དག་བློར་བྱང་ནས།།

ས་ཆེན་གོ་ལ་བདག་པོ་བརྒྱབ་ན་བསམ།།

ཡོད་ཚད་སྟབས་བདེ་ཡིན་པའི་སྤྱི་ཚོགས་འདིར།།

ཡོད་ཚད་གཞན་གྱི་ཕྱོགས་སུ་འགྲོ་སླ་ལ།།

ཡོད་ཚད་ཡོངས་ཀྱི་ཆེད་དུ་ཡིན་དཀའ་རུང་།།

ཡོད་ཚད་ལེགས་པའི་ཕྱོགས་སུ་འགྲོ་བར་སྨོན།།

བསླུ་མེད་དཀོན་མཆོག་གསུམ་པོའི་སྐྱབས་འོག་གི།

འགྲན་མེད་ཤེས་བྱ་སྦྱོང་བའི་ཞྭ་སེར་ཚོགས།།

སྔོན་མེད་བརྩོན་པ་དྲག་པོས་ལྷུར་བླངས་ནས།།

མཐའ་མེད་འཁོར་བའི་གྲོང་ནས་ཐར་ན་བསམ།།

དུས་རབས་བཟང་པོ་ཉེར་གཅིག་སྤྱི་ཚོགས་འདིར།།

ཆོས་ལུགས་བཟང་པོའི་བསྟན་པ་རབ་དར་ནས།།

སྐད་རིགས་བཟང་པོ་བོད་ཀྱི་བརྡ་སྤྲོད་འདི།།

བློ་གསལ་བཟང་པོ་ཚོགས་ཀྱིས་བསླབ་པར་འོས།།

ནུས་མེད་སློབ་མ་ཞིག་གི་རྩོམ་ཐུང་འདི།།

བསམ་མེད་བྱིས་པ་ཞིག་གི་ཚུལ་དང་མཐུན།།

ཟླ་མེད་མཁས་གྲུབ་རྣམས་ཀྱི་དྲིན་བསམས་ན།།

དག་མེད་རྩོམ་ཞིག་ཡིན་རུང་འབྲི་ལ་སྤྲོ།།