ཀྭ་ཡེ་སློབ་གྲོགས་ཆུང་ཆུང་བདེ་ལགས་སམ། །

ཁ་བའི་བུ་དང་བུ་མོར་རྟེན་འབྲེལ་ཞུ། །

ག་ནས་འོངས་པ་ནམ་ཡང་སེམས་ལ་ཟུངས། །

ང་ཚོ་དབྱངས་གསལ་སོ་བཞིའི་བདག་པོ་ཡིན། །

ཅ་དག་ལྭ་བ་གྱོན་པ་ཧ་ཅང་ཡག།

ཆ་ལུགས་གཞན་དུ་མ་བསྒྱུར་རེ་བ་ཡོད། །

ཇ་ཁང་སློབ་ཁང་དག་ཀྱང་གསར་པ་ཡིན། །

ཉ་མོ་ཆུ་ལ་འཁྱུག་ལྟར་སློབ་ལ་བརྩོན། །

ཏ་ལེར་རྩོལ་བས་བསྒྲུབས་ན་འབྲས་བུ་སྨིན། །

ཐ་ཆད་ང་རང་རྒན་གྱི་མིང་རོ་ཙམ། །

ད་ལྟ་ཕྲག་ཏུ་བཞེས་པ་ཁྱོད་ཅག་ལ། །

ན་ཚའི་ཟུག་ཟེར་ལྟ་བུའི་སྙིང་གཏམ་ཡོད། །

པ་ཕ་གཉེན་ཉེའི་ལས་ཀྱི་ལག་པ་འདྲ། །

ཕ་ཡུལ་མདོ་སྟོད་ཁམས་ཀྱི་མེ་ཏོག་ཚོ། །

བ་བྱུང་འོ་མའི་མདངས་འདྲའི་ཡོན་ཏན་ལ། །

མ་འདུག་ཉིན་རེར་བརྩོན་དང་དམིགས་འདུན་འགྲུབ།།

ཙ་ཙིག་འུར་ཟིང་ཕྱོགས་ལ་དེང་རབས་དགའ། །

ཚ་གྲང་དཀའ་སྤྱད་ལས་ལ་འཇུག་མཁན་ཉུང་། །

ཛ་དྲག་འཇིག་རྟེན་སྐྱོན་ཡོན་མ་ནོར་བསྐྱོད། །

ཝ་མོ་ཝོ་ལ་དུས་ཚོད་མ་གཏོང་ཀྱེ། །

ཞྭ་ལྟར་གཙུག་གི་རྒྱན་ཆ་རིག་པའི་གནས། །

ཟ་འོག་རྒྱན་དང་ནོར་བུའི་ཕྲ་ཚོམ་འདྲ། །

འ་ཅག་དྭངས་གཙང་བྱིས་པ་རིག་བཟང་ཁྱུ། །

ཡ་རབས་དཔེ་ཁུག་ཁུར་ཏེ་སླེབས་པ་བསུ། །

ར་རོའི་གཏམ་ལ་མ་ཉན་རང་ཚུགས་དགོས། །

ལ་རྒྱའི་རི་མོ་རང་གི་སེམས་ལ་ཕྲིས། །

ཤ་ཚའི་གྲོགས་པོ་ལམ་བུ་དཀར་པོ་ཡིན། །

ས་སྟེང་འདི་ན་ཁ་དོག་སྣ་ཚོགས་ཡོད། །

ཧ་ཅང་ཟབ་པའི་བསླབ་བྱའི་བདུད་རྩི་མིན། །

ཨ་མཚར་རྩོམ་ལ་དགའ་བའི་ཨ་མདོ་བས། །

ཧ་ཧ་གང་དྲན་ཚིག་གི་ཉོག་ཟས་འདི། །

ཨ་ཧོ་སྐལ་བཟང་སློབ་བུ་ཁྱོད་ཚོར་ཕུལ། །