མག་མོག་སྡིག་པའི་མེ་ཏོག་རང་དུ་བྱུང་།།

སྐར་མའི་གོ་རིམ་ཁྲོད་ནས་སུ་ཞིག་དྲན།།

དྲན་པའི་གཞུང་དུ་ཆགས་པ་སྨྲ་བའི་གཞི།།

གླེང་དང་མོལ་བ་མེད་པའི་མཚན་མོ་རུ།།

འཕྲིན་དང་སྐད་ལན་བྲལ་བའི་ཞག་དེ་ལ།།

ཉམ་ངའི་ཚིག་འབྲུ་རེ་འགའ་ང་ཡིས་ཚོར།།

ཚོར་བའི་གཏིང་དུ་ཉུལ་བ་ལན་འདི་ལ།།

མ་ཆགས་མ་སྡང་ངང་དུ་ཡིད་ཀྱིས་རེག།

འདི་ནི་ཐོལ་བྱུང་མིན་ལ་མགོ་རྔ་རིང་།།

ཐ་རེ་ཐོ་རེ་མིན་པའི་བརྗོད་གཞི་ཚོགས།།

ཆིག་ལབ་ཚིག་གི་དབུས་སུ་གླེང་སླ་བས།།

ཡིད་ཀྱི་འདང་ལ་འཁྲེང་པ་ངང་གིས་ཤེས།།

མཐའ་མེད་ཡིག་འབྲུ་ནང་དུ་ཅི་ཞིག་སྟེ།།

ལས་ཀྱི་བར་ཐག་སྦྲེལ་བའི་དར་སྐུད་ཀྱང་།།

ཕྲ་མོ་ལས་སྨོན་གཉིས་ཀྱི་རང་བཞིན་ཡིན།།

དེ་བས་ཚོར་འདུ་མེ་ལོང་ཤིན་ཏུ་གསལ།།

ལས་ཀྱི་སྐལ་བ་རང་འགྲིག་ཕྲན་དང་ཉེ།།

ཞེ་ཡི་གཞུང་དུ་ཆགས་པ་ཉམས་ཀྱི་མགུར།།

རྫུན་པའི་བཟོ་ལྟ་དབེན་པ་ངག་ཏུ་ཐོགས།།

མ་བཅོས་ངང་ཚུལ་ཀློང་དུ་དྲོད་ཀྱིས་ཟིན།།

འཚོ་བའི་འདུ་བྲལ་ཁྲོད་ལ་བདག་ཁོ་ནས།།

ཆིག་ལབ་ཁྲི་མ་འབུམ་ཞིག་ངང་གིས་ཤོར།།

སེམས་ཚོར་དཔག་མེད་དེ་རུ་དགའ་སྐྱོ་ཟུང་།།

ཡིད་ཀྱིས་འཐག་གིན་འགྲོ་བ་སླར་ཡང་དུ།།

སྣང་བ་ཐ་ནེ་ཐུན་ནེའི་ལས་འཕྲོ་ཡོངས།།

སྒྱུ་མའི་སྟངས་ཀ་ཇི་བཞིན་གློ་བུར་ངང་།།

ཚོར་བའི་ཡིད་འགྱུར་དེ་དག་སྐད་ཅིག་མ།།

སྙིང་ལ་སིམ་གདུང་བར་མའི་ཚོར་བ་བྱུང་།།

ཚོར་བའི་ལས་སྐལ་ནང་དུ་མ་བཅོས་པ།།

སྣང་བ་བརྒྱ་ཕྲག་བརྒལ་བའི་ངག་སྨྲ་ཞིག།

མཚན་མོའི་ཆིག་ལབ་ཚུལ་དུ་ང་ལ་དབང་།།

རྟོག་བཏགས་ཡེ་ནས་བོར་བ་ང་དང་ཉེ།།

གཅིག་འཕྲོ་གཅིག་གིས་ཟིན་པ་ལན་འདི་ལ།།

མནོ་བསམ་མི་འདྲ་མི་གཅིག་ཆིག་སྟོང་ལྷག།

རང་བྱུང་འཚོ་བའི་གཞུང་དུ་ཡིད་འོང་སྙམ།།

མཚན་མོའི་རྒྱུ་སྐར་འོག་ནས་ཆིག་ལབ་ཤོར།།