རྗེ་བཙུན་མཚོ། 2022-03-21
ཀ་ཡེ་གསོན་དང་ཡུམ་ཆེན་རིན་པོ་ཆེ།།
ཁ་ལ་མངར་གསུམ་བྱིན་མཁན་དྲིན་ཆེན་མ།།
ག་ས་གང་དུ་བཞུགས་ཀྱང་བྱམས་ལྡན་མ།།
ང་ཡི་སེམས་ནས་ཁྱེད་ཉིད་བརྗེད་མྱོང་མེད།།
ཅ་ཅོ་སྨྲ་བའི་ཕྲུ་གུ་ང་ཚོ་ལ།།
ཆ་རྒྱུས་གཏམ་གྱི་སྙིང་གཏམ་བརྗོད་པ་ཡིས།།
ཇ་དང་ཐུད་ཀྱི་ཞལ་ཟས་སྩོལ་མཁན་མ།།
ཉ་ཡིས་ཆུ་འདོན་ལྟར་དུ་ནུ་ཞོ་སྩོལ།།
ཏ་ལེན་ལུས་ཀྱི་སྣོད་དུ་ང་བཅུག་ནས།།
ཐ་ན་རང་ལུས་ཡིན་ཡང་བདག་ལ་འབུལ།།
ད་ནི་མི་སྡོད་ཤེས་བྱའི་མཁའ་ལ་འཕུར།།
ན་ཚོད་གཞོན་སྟབས་མཁས་པའི་གྲལ་དུ་འགྲོ།།
པ་ཏྲ་འདྲ་བའི་སྣ་མང་འཇིག་རྟེན་འདིར།།
ཕ་མཐའ་བྲལ་ནས་ས་ཕྱོགས་ཀུན་ཏུ་འགྲོ།།
བ་མོ་ནང་བཞིན་བུ་མོ་ང་མི་འདུག།
མ་ཡུམ་སློབ་གྲྭར་བརྟེན་ནས་མདུན་ལམ་འཚོལ།།
ཙ་གེ་ཙིག་གེ་ཡིན་ཡང་སེམས་ལ་འཛིན།།
ཚ་གྲང་བཀྲེས་ལྟོགས་ཙམ་ལ་མི་ལྟ་བར།།
ཛ་གྲགས་ཅན་གྱི་མི་ཞིག་མ་ཡོང་རུང་།།
ཝ་ལེར་ཁྱེད་ཀྱི་བཀའ་དྲིན་སེམས་ཀྱིས་འཛིན།།
ཞ་ལྟར་མཉམ་འགྲོའི་དུས་ཚོད་མེད་ཀྱང་རུང་།།
ཟ་མ་ཐུན་གཅིག་ཟོས་ཀྱང་ཁྱེད་ཉིད་དྲན།།
འ་ཅག་མ་སྨད་གཉིས་ཀྱི་ལས་སྨོན་འདི།།
ཡ་ཆུང་ཁོག་པའི་ནང་ནས་སྙིང་ལས་དམར།།
ར་བ་ཆུང་རུང་བརྩེ་སེམས་མཁའ་དང་མཚུངས།།
ལ་ལུང་རྩྭ་ཆུ་འཇིག་རྟེན་འགྱུར་ན་ཡང་།།
ཤ་དང་ཁྲག་རྒྱུད་འབྲེལ་བ་འགྱུར་མེད་དེ།།
ས་ཕོགས་འདི་ནས་མ་སྨད་ལྷན་འཛོམས་བྱུང་།།
ཧ་ཧ་ཟེར་ནས་མི་ཚེ་སྐྱིད་ལ་རོལ།།
རྩོམ་གསར། 10