ཀུན་མཁྱེན་གྲགས་པ། 2022-03-18
ཀ་དག་སེམས་ཀྱི་ངོས་ནས།།
ཁ་བའི་འདབ་མ་ཉིལ་ལེ།།
ག་ལེར་ཉི་མ་ཤར་བས།།
ང་ཡི་ཡ་ཆུང་བརླན་སོང་།།
ཅ་ནེ་འོ་ཇའི་སྟབས་ཀ།
ཆ་མེད་མི་ལ་བླུགས་ན།།
ཇ་ཡི་རོ་བཅུད་ཞིམ་པོ།།
ཉ་མོ་ཆུ་ལ་འདྲེས་སམ།།
ཏ་ལེན་ཨམ་ཕྲག་ནང་ལ།།
ཐ་ཆད་སྨོན་ལམ་ཤོང་ངམ།།
ད་དགོང་ཟླ་བ་གཡོར་དང་།།
ན་ཆུའི་ནང་དུ་བཙལ་ཆོག།
པ་ཏྲ་ཨ་ཀྱོག་པ་ཀྱོག།
ཕ་གི་ལམ་ཕྲན་འདྲ་ལེ།།
བ་རྫི་ཡིན་པར་བསམས་ན།།
མ་གི་ལས་འཕྲོ་མིན་ནམ།།
ཙ་གེ་ཙི་གེ་ཟེར་ནས།།
ཚ་རུའི་སྟོད་གོས་བརྐུས་འགྲོ།།
ཛ་དྲག་ཅི་འདྲ་ཆེ་ཡང་།
ཝ་མོའི་གཡོ་སྒྱུ་མི་སྲིད།།
ཞ་འབྲིང་ཡིན་པའི་ཚུལ་གྱིས།།
ཟ་གོས་དང་དུ་བླངས་ན།།
འ་ཡོ་བདག་མེད་ཅིག་ལ།།
ཡ་ངའི་ཚིག་མཚོན་མ་གཏོང་།།
ར་མ་པྲ་ཚགས་ཤིག་གིས།།
ལ་དང་ལུང་བ་བརྒལ་ནས།།
ཤ་བ་ཡུ་མོ་གཅིག་གིས།།
ས་ཆུ་འཕྲེད་ཀྱིས་བཅད་འགྲོ།
ཧ་ཅང་བབ་ཆགས་ངང་གི།།
ཨ་ལོང་དགུ་སྦྲེལ་ལྟ་བུའི།།
ཧ་ལམ་ཀློག་མཁན་མེད་པའི།།
ཀ་རྩོམ་བརྩེ་ཆུ་འདྲེས་མ།།
རྩོམ་གསར། 10