གཅིག

ངའི་ཨ་མ་ནི་འབྲོག་མོ་རྣལ་མ་ཞིག་ཡིན། སྦྲ་རྒན་དུ་བ་ཅན་གྱི་ནང་དུ་ལྟེ་ཁྲག་གཏོར་ཞིང་ནོར་ལུག་གི་རྨིག་རྗེས་ཁྲོད་ལང་ཚོ་འཚར་བའི་འབྲོག་མོ་རྣལ་མ་ཞིག་ཡིན་པས། ངའི་ཨ་མ་ལའང་འབྲོག་མོ་གཞན་དང་འདྲ་བར་ལྷད་མེད་ཀྱི་གཤིས་བཟང་དང་བྱམས་བརྩེ་ཡི་འཛུམ་དཀར་ཡོད། གཡོ་ཟོལ་གྱིས་མ་བསླད་པའི་མིག་མདངས་དང་རྫ་ཆབ་ཀྱི་བཞུར་སྒྲ་བཞིན་དྭངས་ཤ་འཚེར་བའི་བཞོ་དབྱངས་མངའ། ལོ་ན་ཆུང་དུས་ནས་ཀྱང་ཙག་དང་བསེར་བུ་གངས་དང་ཆར་ཆུའི་ཀློང་ནས་ཕྱུགས་རྗེས་སུ་འབྲངས་གྲངས་མང་།

གཉིས།

ལང་ཚོའི་ཁོ་ལག་རྫོགས་རྗེས་གཞིས་ཁྱིམ་གསར་པ་ཞིག་གི་ཆེད་དུ། མ་འོངས་པའི་འཚོ་གནས་ཀྱི་སླད་དུ་ཨ་མ་དང་ཨ་ཕས་ནམ་སྔ་ལངས་དང་དགོང་ཕྱི་ཉལ་གྱིས་ལས་ལ་བརྩལ་ཏེ་བརྩེ་དྲོད་འཁྱིལ་བའི་སྦྲ་ནག་བཟོས། དབྱར་ཁར་ཉི་འོད་ཀྱི་ཚ་ཟེར་དང་དྲག་ཆར་གྱི་རྔམས་ཁ། དགུན་ཁར་མཚོ་བོད་མཐོ་སྒང་གི་ཙག་དང་རླུང་གངས་དང་བུ་ཡུག་གི་ཁྲོད་ནས་སྐྱས་བཏེགས་ཤིང་། སྒོ་ཕྱུགས་འཚོ་སྐྱོང་བྱས། ངེད་མིང་སྲིང་ཚོ་རེ་རེ་བཞིན་ཁ་འཇམ་པོས་བསྙོར་ཞིང་ལག་དྲོན་མོས་བསྐྱངས།

གསུམ།

བུ་ཕྲུག་དག་ལག་ཆགས་ཏེ་རེ་རེ་བཞིན་སློབ་ལོ་ལོན་དུས་ཡོད་ཚད་སློབ་གྲྭར་བསྐྱལ་ཏེ་ཁྱིམ་ཚང་གཅིག་གི་སྒོ་ཕྱི་ནང་གཉིས་ཀྱི་ལས་ཀ་ཡོད་ཚད་ཨ་མ་དང་ཨ་ཕའི་ཕྲག་ཏུ་བླངས། ཁྱིམ་ཚང་འདིའི་ཕྱིར་དུ་ཉིན་གཅིག་གི་དུས་ཚོད་ནང་ཨ་མར་ཁོམ་ལོང་ཏོག་ཙམ་ལས་མེད་ནའང་། ཨ་མའི་མཚན་མོའི་རྨི་ལམ་དུ་ཨ་ཕ་དང་མིང་སྲིང་ཚོ་སྨིན་དྲུག་བཞིན་བསྒོམས་ཡོད་སྲིད།

བཞི།

ཨ་མ། འུ་ཚང་གི་ལྷས་རའི་ཕྱི་ནང་དུ་ཁྱེད་ཀྱིས་རྐང་རྗེས་ཁྲི་ཕྲག་དཔར་ཡོད། འུ་ཚང་གི་དབྱར་དགུན་སྟོན་དཔྱིད་ཀྱི་མཚེར་ས་རེ་ན་ཁྱེད་ཀྱི་ལྗིད་ཏིག་ཏིག་གི་རྐང་རྗེས་དང་གྲང་བསིལ་བསིལ་གྱི་རྔུལ་ཆུ་ཐོར་ཡོད། སེམས་པ་ནང་ལ་བཀུག་སྟེ་ཞིབ་ཏུ་བསམས་ན། ཨ་མ་ཁྱེད་ཀྱི་ཡོད་ཚད་ཁྱིམ་ཚང་འདིའི་སླད་དུ་བློས་བཏང་བ་ལས་ངས་ཁྱེད་ལ་དྲིན་ལན་ཕར་ལ་ཞོག། ཐ་ན་ཁྱེད་ཀྱི་ལག་ཏུ་ཇ་ཚ་མོ་དཀར་ཡོལ་གང་ཡང་བཞག་མྱོང་བ་བཤད་རྒྱུ་མེད། ཁྱེད་ཀྱིས་ཀྱང་ཕ་མ་གཞན་དང་འདྲ་བར་ང་རང་ལས་བྱེད་པ་ཞིག་ལ་རེ་བ་བཅངས་མྱོང་། ཡིན་ནའང་ང་ནི་ལས་བྱེད་པ་ཞིག་རེད་མ་ཐུབ་པས། ངས་ཁྱེད་ཀྱི་རེ་བ་སྟོང་ཟད་དུ་བཏང་སོང་། ཁྱེད་རང་དགོངས་པ་མ་ཚོམས།

ལྔ།

ཨ་མ། ལོ་ཟླ་ནི་དུས་ཚོད་ཀྱི་མདའ་མོས་རྒྱང་ལ་དྲུད་པ་ལྟར་ཁད་ཀྱིས་བཞུར་བས། ཁྱེད་ཀྱི་ལང་ཚོའང་ག་ལེར་རྒས་སོང་། ཨ་མ་ད་ལྟ་ཁྱེད་རང་རྒས་ནས་དཔྲལ་བའི་ངོས་སུ་གཉེར་མ་བབས་འདུག། དེ་ནི་ལོ་ཟླས་བཏབ་པའི་ཁ་སང་གི་སྤྲོ་གར་སྣུམ་པོ་དང་དཀའ་སྡུག་གི་མི་ཚེའི་རི་མོ་ཨང་། ཨ་མ། ཁྱེད་ཀྱི་སྐྲ་དཀར་གྱི་ཉག་མ་ཇེ་མང་དང་སྐྲ་ལོའི་ཁ་དོག་ཇེ་དཀར་དུསོང་། སྐྲ་ལོ་དཀར་བ་ནི་རྒས་པའི་ཆོས་ཉིད་ཡིན་ལ། དཀར་ཟོམ་ཟོམ་གྱི་ཁ་དོག་གིས་ལྷད་ཀྱིས་མ་གོས་པའི་ཁྱེད་ཀྱི་སེམས་པ་མཚོན་ཡོད།

དྲུག

ཨ་མ་ཚེ་རིང་ལོ་བརྒྱ། ཁྱེད་རང་ནད་མེད་ཚེ་རིང་ཡོང་བ་དང་བསམ་དོན་རི་མོ་འགྲུབ་པར་བུ་ངས་ཞེ་བསམ་པའི་གཏིང་ནས་སྨོན་ལམ་འདེབས། ཨ་མ་ལོ་བརྒྱ་ཚེ་རིང་།

རྩོམ་པ་པོ། གྱང་ཆག།

རྩོམ་སྒྲིག་པ། མགར་རྒྱལ་སྲས།