འདི་སྣང་ལས་ལ་སྙིང་པོ་མེད་ན་ཡང་། །

ཨ་ཆད་ཨུ་ཐུག་བྱས་ནས་བརྒྱུག་དགོས་བྱུང་། །

རེས་དགའ་རེས་སྐྱིད་འཁོར་བའི་གདུགས་འོག་ཏུ། །

ཁྱེད་རང་འཚོལ་བ་དེ་ཡང་ཤིན་ཏུ་དཀའ། །

དགའ་སྐྱོ་འདྲེས་མའི་ལོ་ཟླ་རབ་རིབ་ནང་། །

འབད་པའི་ལས་དེ་དོན་སྙིང་ཡོད་པ་ན། །

དམུ་རྒོད་སྐྱེ་བོ་མགུ་ཡང་མ་མགུ་རུང་། །

རང་སེམས་འགྱོད་མེད་ངང་ནས་སོང་ན་སྐྱིད། །

སེམས་ཀྱི་རེ་བ་རྒྱང་རིང་ཡུལ་ལ་གཏད། །

ཕུགས་ཀྱི་འདུན་མ་མཆོག་གསུམ་གཙུག་ཏུ་བཀུར། །

གླེགས་བམ་གསང་ནས་རང་ལམ་འཚོལ་བ་འདི། །

ལམ་གྱི་བགྲོད་ཚུལ་ནང་ནས་མཐར་ཐུག་ཡིན། །

ཁེར་རྐྱང་འགྲིམ་པའི་ལོ་ཟླ་རྔམ་མཐུག་ཀྱང་། །

འཚོ་བ་སྐྱ་ཆད་སྔོ་སྡུག་ཞེ་མེར་ཡང་། །

འཇུག་པའི་ལམ་དེ་ནོར་བ་མེད་པ་ན། །

ནང་སེམས་སྤྲོ་དགའི་ངང་ནས་འཇུག་པར་རིགས། །

དུས་ནི་མི་སྡོད་ཆུ་བོ་བཞིན་དུ་བཞུར། །

ཚེ་ཡི་སྐུད་པ་ཉག་ཕྲག་གྱུར་དུས་སུ། །

མི་ཚེ་སྙིང་པོ་དོན་མེད་མ་ཡལ་ཚེ། །

སྐྱོ་ཡང་སྡུག་ཀྱང་ལས་ནི་དཀར་པོ་འོ། །