ཉེ་ཆར་བོད་རང་སྐྱོང་ལྗོངས་རིག་གནས་ཐིང་ནས་ཤེས་རྟོགས་བྱུང་བར་གཞིགས་ན། 2018ལོའི་ལོ་མཇུག་ནས་བཟུང་། འཛམ་གླིང་རིག་གནས་ཤུལ་བཞག་ཕོ་བྲང་པོ་ཏ་ལའི་དཔེ་རྙིང་སྲུང་སྐྱོང་བེད་སྤྱོད་རྣམ་གྲངས་ལག་བསྟར་བྱེད་མགོ་ཚུགས་ཚུན། དཔེ་རྙིང་སྲུང་སྐྱོང་དང་བེད་སྤྱོད་ཀྱི་ལས་དོན་ཁག་ལ་སྐུལ་འདེད་ཏན་ཏིག་བཏང་ནས་ད་ལྟའི་བར། དཔེ་རྙིང་བམ་པོ3000ལྷག་ཙམ་དང་རྩ་ཆེའི་དཔེ་རྙིང་ཤོག་ལྷེ་ཁྲི་བརྒྱ་ལྷག་ཙམ་ཡོངས་བཤེར་ཐོ་འགོད་བྱེད་པའི་ལས་དོན་ལེགས་གྲུབ་བྱུང་འདུག།
   ཕོ་བྲང་པོ་ཏ་ལ་ནི་སྤྱི་ལོའི་དུས་རབས་བདུན་པའི་ནང་བཞེངས་པ་དང་། ད་ཡོད་བོད་ལྗོངས་ས་ཁུལ་གྱི་གཞི་ཁྱོན་ཆེ་ཤོས་དང་ཉར་ཚགས་ཆ་ཚང་ཤོས་ཀྱི་ཕོ་བྲང་ཞིག་ཡིན་པའི་ཆ་ནས། དེའི་དམིགས་བསལ་གྱི་བཟོ་བཀོད་དང་གྲངས་འབོར་མང་བའི་རིག་དངོས་ཀྱིས“བོད་མི་རིགས་ཀྱི་ལོ་རྒྱུས་རིག་གནས་སྒྱུ་རྩལ་གྱི་གཏེར་མཛོད”ཅེས་པའི་མཚན་སྙན་གསོལ་ཡོད། 
   ཕོ་བྲང་པོ་ཏ་ལའི་དཔེ་རྙིང་སྲུང་སྐྱོང་བེད་སྤྱོད་རྣམ་གྲངས་ལ་ཁྱོན་མ་དངུལ་སྒོར་དུང་ཕྱུར3བཏང་བ་དང་། རྣམ་གྲངས་དེའི་ལས་ཀའི་དུས་ཡུན་ལོ10ཡིན་པ་རེད།
   བོད་རང་སྐྱོང་ལྗོངས་རིག་གནས་ཐིང་གི་གྲངས་གཞི་ལས་མངོན་པར། ཕོ་བྲང་པོ་ཏ་ལའི་རིག་དངོས་སྲུང་སྐྱོང་བེད་སྤྱོད་རྣམ་གྲངས་ལ་རིམ་རྩིས་བྱས་ན་མ་དངུལ་སྒོར་ཁྲི6800ལྷག་ཙམ་དོན་འཁྱོལ་བྱུང་བ་དང་། དཔེ་རྙིང་དང་ཚད་ལྡན་ཡིག་ཆ་བམ་པོ3078དང་པོད444421ཤོག་ལྷེ1074474ཡི་ཡིག་ཚགས་བཟོས་ནས་ཐོ་འགོད་བྱས་ཡོད།  ཏ་ལའི་ལོ་མའི་དཔེ་ཆ་བམ་པོ465ཡི་ཤོག་ལྷེ29378ལེགས་སྒྲིག་བྱས་ནས་ཡིག་ཚགས་བཟོ་བ་དང་དཀར་ཆག་སྒྲིག་པའི་ལས་དོན་ལེགས་གྲུབ་བྱས། དཔེ་རྙིང་དང་ཚད་ལྡན་ཡིག་ཆ་བམ་པོ136ཤོག་ལྷེ85944གྲངས་གཞི་ཅན་ལ་བསྒྱུར་བའི་ལས་དོན་ལེགས་གྲུབ་བྱས། བོད་ཤོག་བམ་པོ23གྱི་ཤོག་ལྷེ3017ཉམས་གསོའི་ལས་དོན་ལེགས་གྲུབ་བཅས་བྱས་ཡོད།

    ཕོ་བྲང་པོ་ཏ་ལར་ཉར་བའི་དཔེ་རྙིང་གི་གྲངས་འབོར་མང་ཞིང་། བསྡོམས་རྩིས་རགས་ཙམ་བྱས་པར་གཞིགས་ན། མིག་སྔར་ཕོ་བྲང་པོ་ཏ་ལར་རྒྱ་ཡིག་དང་། བོད་ཡིག། མན་ཇུའི་ཡི་གེ།  སོག་པོའི་ཡི་གེ་སོགས་ཀྱི་ཐོག་ནས་བྲིས་པའི་དཔེ་རྙིང་རྩ་ཆེན་མང་པོ་ཡོད་ཅིང་། པོད་ཁྲི་ཕྲག་ཟིན་ཡོད། དེའི་ནང་ཏ་ལའི་ལོ་མའི་དཔེ་རྙིང་རྩ་ཆེན་བམ་པོ460ལྷག་ཙམ་གྱི་ཤོག་ལྷེ་སུམ་ཁྲི་ལ་ཉེ་བ་ཚུད་ཡོད། དེ་དག་ནི་ཆོས་ལུགས་དང་། བཟོ་སྐྲུན། སྒྱུ་རྩལ། གསོ་རིག། ལོ་རྒྱུས། སྐད་ཡིག། རྩོམ་རིག། མཚན་ཉིད་རིག་པ་སོགས་ཁྱབ་ཁོངས་ཀྱི་དཔེ་ཆ་ཡིན་པ་རེད།