ཧབ་སྐྱ་བེ་རིའི་ཚལ་ལ་གྲོ་མ་བརྐོ་རབས།  ཐ་ལེབ་གནའ་བར་བེ་ཆེན་རྐོ་རབས།   ཧབ་ཆེན་པ་ལེབ་ཤྭ་ཆེན་གང་རབས།  གྭ་གྭ་འཕྱི་བ་མཛོ་གིས་རྫི་རབས།   རྭ་བཟང་རྒྱ་ཤུལ་ཚལ་ལ་རི་རྒྱ་བསད་རབས།   ལ་དམར་མཚོ་ལ་མཚོ་ཆེན་ཆགས་རབས།   ཚོན་ཐང་པོ་ལ་ཐང་ཆེན་ཆགས་རབས།   ཨ་མ་འབམ་མཚོ་ཕྱུག་མོའི་ཆགས་རབས་བཤད་ན།   འབམ་ཁོག་ཕུགས་ཆེན་ཕུ་མདའ་ལ་འབུམ་འགྲོ་འབུམ་འདུག་ཡིན།     མདོ་ཤོད་ཤུལ་པ་དེ་འབའ་ཟམ་པ་ལ་རྩ་འདུག་ནས་  བྱང་ཤར་ལོ་གནམ་སྒོ་སྲུང་ཡིན།   དགྲ་ལམ་དེ་དཔུང་པས་མནན（བཞག་གདའ）།  གཉན་ལམ་དེ་མར་ཁུས་འཐེན་（བཞག་གདའ）།   སྤྱང་ལམ་དེ་དུ་ཁ་མནན་（བཞག་གདའ）།   འགྲོ་ཟེར་རན་སྒ་གདན་སྐྱ་ཅིག་ཅིག   འདུག་ཟེར་རན་དུ་གདང་སྔོ་ཅིག་ཅིག   ང་མདོ་ཤོད་ཤུལ་པའི་ཆགས་ཚུལ་དེ་འདྲ་ཞིག་རེད།  
འབའ་ཀུན་མཁྱེན་བླ་མ་བུ་སུ་དང་ཅིག་མི་འདྲ།   ཀུན་དང་ཅིག་མི་མཉམ།   མ་ཤི་ཡི་ཨ་ཤི་གོ་མི་ཡིན།   ཤི་ན་ཅིག་གར་ཐལ་རིག་མི་ཡིན།   ཕྱག་གཡས་པས་རྒྱལ་ཁྲིམས་གསེར་གྱི་གཉའ་ཤིང་བསྡམས།   རྒྱལ་ཁྲིམས་གསེར་གྱི་གཉའ་ཤིང་ལ་ལྕི་ཡང་མེད།   ལྕི་མོ་ནང་ནས་ཡང་ཞིག་འདྲེས།   ཕྱག་གཡོན་པ་ནང་དུ་ཆོས་ཁྲིམས་འཛིན།   ཆོས་ཁྲིམས་དར་གྱི་མདུད་པ་ལ་དམ་ལྷོད་མེད།   དམ་པ་ནང་ནས་ལྷོད་ཅིག་འདྲེས།   འབའ་ཀུན་མཁྱེན་བླ་མ་རྒྱ་མཚོ་ཆེན་པོ་དེ་གོང་ལ་བཙུགས་ནས་གཏམ་ཚིག་རྩ་གསུམ་གྱི་འབྲེལ་བ་བསལ་ལོ།།   （ལགས་སོ་ཀྱི་རེད་བ་ལགས）  ལགས་སོ་ཡི་གཏམ་གྱི་འགོ་མ།  ཏེ་སེ་ཀྱི་བྲག་གི་གཞི་མ།   ལྷ་བསྭོ་ཡི་ལྷ་གི་སྟོན་མོ།   ལྟད་མོ་དེ་ཐོག་ལ་ཡག  ཝ་ཞྭ་མགོ་ཐོག་ལ་མཛེས།   གཉེན་ཉེ་རིང་གི་གསེར་ཟམ་བཙུགས་རབས།   དར་དཀར་པོའི་སྤྲོད་ལེན་བྱས་ས་འདི་ཡི་ཐོག་ལ།   གཏམ་ཚིག་གསུམ་གྱི་འབྲེལ་བ་མ་བསལ་ན།   གླེན་པས་ཤ་ཟ་བ་དང་ལྐུགས་པས་ཆང་འཐུང་གི་དཔེ་རེད།   ང་ཕོར་རུ་ལ་ཁྲ་ཆང་ལ་དགའ་ཡི།   ཆང་འཐུང་འོངས་ཡི་ནི་མིན།   བུ་ཆུང་ཁ་བདེ་གཏམ་ལ་དགའ་ཡི་ནི་གཏམ་བཤད་འོངས་ཡི་མིན།   གྲི་ཆུང་ཡུ་བ་ཤ་ལ་དགའ་ཡི་ཤ་ཟ་ནི་འོངས་ཡི་མིན།   ཉེ་བ་གཉེན་རྒྱུད་དེད།   དབུ་མེད་ཆུ་རྒྱུད་དེད།   ཤུག་པས་བྲག་རྒྱུད་དེད་དེ་འོངས་རྒྱུའི་ཟོག་རྩ་ཡིན།   གཏམ་ཚིག་གསུམ་གྱི་འབྲེལ་བ་བསལ་ན།   གཏམ་ལ་རིང་གྱི་ལ་ཐུང་ལ་འབྲིང་གསུམ།   གཏམ་ལ་རིང་གི་གུར་གྱི་ཕུག་ཐུབ་ན།   བྱ་ཁྱུང་ཆེན་དཀར་མོ་དེ་གནམ་ལ་ལྡིང་འདྲ།   སྒལ་པ་དེ་གནམ་ལ་མི་ཐུག་ལེ།   གྲིབ་མ་དེ་ས་ལ་མི་འཁྱིལ་ལེ།   གཤོག་རྩེ་དེ་བྲག་ལ་མི་ཟུག་ལེ།   འཇའ་ཤར་ལེར་མ་གི་གཏམ་གྱི་ཡིན།   གཏམ་དེ་གི་ལོ་རྒྱུས་བཤད་པ་ན།   ཨ་སྔོན་མཁའ་རྒྱ་ཆེ་ནས་སྦྲང་ཆར་སིལ་མ་མར་བབས་རབས།   ས་གཞི་དར་ལས་འཇམ་ནས་ལྗང་ཆུང་སྔོན་མོ་དེ་ཡར་འཁྲུངས་རབས།   གཏམ་ལ་འབྲིང་གི་གུར་གྱི་ཕུག་བཅའ་ན།   ཤིང་ཙན་དན་སྡོང་པོ་དེ་ཆུ་ནང་ལ་ཁུར་འདྲ།   རྩ་བ་ས་ལ་མི་ཟུག་ལེ།   རྩེ་མོ་གནམ་ལ་མི་ཐུག་ལེ།   རྐེད་པ་བྲག་ལ་མི་རྒྱག་ལེ།   འཇའ་ཤར་ལེར་མ་གྱི་གཏམ་ཞིག་ཡིན།    གཏམ་དེའི་ལོ་རྒྱུས་བཤད་བཞག་ན།  མཐོ་གནམ་འཁོར་ལོ་རྩིབས་བརྒྱད་གདུགས་དང་ཕུགས་པའི་མ་འོག   དམའ་ས་གཞི་པད་མ་འདབ་བརྒྱད་གསེར་ཁྲི་སེར་པོའི་གདན་ཡར་བཏིང་།   བོད་བཀྲ་ཤིས་གཟིག་གི་ར་བ།  གཡུ་འབྲུག་ཆགས་པའི་གུར་ཁང་།   མི་མི་འཛོམས་མ་རེད་ལྷ་འཛོམས་རེད།   ལྷ་རིགས་གསུམ་གྱི་མགོན་པོ་ཚུར་འཛོམས་རེད།   གཏམ་ལ་ཐུང་གི་གུར་ཞིག་ཕུགས་ཐུབ་ན།   བྱེའུ་ཆུང་ཆུང་སྒྲོལ་མས་རྒུ་འབུ་འཐུ་འདྲ།   ཡར་མཆུ་རྡོ་ལ་མི་རྒྱག་ལེ།   མར་མཆུ་ས་ལ་མི་ཟུག་ལེ།   ཐལ་བ་ཡིས་རང་ལུས་མི་བདལ་ལེ།   འཇའ་ཤར་ལེར་མ་གྱི་གཏམ་ཞིག་ཡིན།    གཏམ་དེའི་ལོ་རྒྱུས་བཤད་བཞག་ན།   ཕ་དམ་པ་སངས་རྒྱས་འགྱིང་རབས།   མ་ལབ་ཀྱི་སྒྲོལ་མ་གཉན་རབས།  ཕོ་རང་རྒྱུད་ཀྱི་རིག་པ་གསལ་རབས།   ཁྲ་མོ་ལེབ་ལེབ་ཀྱི་སྡེ་ཆགས་རབས།  རྨིག་པ་ལིང་ལིང་གི་རྗེས་བཀྲ་རབས།  ཡར་རིའི་རི་ལ་རྐོ་རྒྱུ་ཡོད་རབས།   མར་རིའི་ཐང་ལ་བཏིང་རྒྱུ་ཡོད་རབས།  མིག་ཨ་འབྲས་ཀྱིས་འཚོ་རྒྱུ་ཡོད་རབས།   ལུས་གཟུགས་པོས་གཡོག་རྒྱུ་ཡོད་རབས།   སེམས་གག་གག་གིས་བསྐྱེད་རྒྱུ་ཡོད་རབས།  དེ་འདྲ་ཞིག་རེད་འོ་ལགས།