གནའ་སྔ་མོར་དུད་ཚང་ཞིག་གིས་ཚེམ་བཟོ་ཞིག་གླས།འོན་ཀྱང་དུད་ཚང་དེ་ནི་གཞན་ནོར་ལ་རྐམ་ཆགས་ཆེ་ཞིང་རང་ནོར་ལ་སེར་སྣ་ཆེ་བས་ཚེམ་བཟོ་ལ་འཆའ་འཐུང་ཡག་པོ་ཞིག་སྤྲོད་ཀྱི་མེད།ཚེམ་བཟོ་ཡིས་མི་འོས་པའི་ཚུལ་དེ་ཁྱིམ་བདག་གི་ངོ་ཐོག་ལ་བཤད་ན་སྤྲང་དྲི་བྲོ་ཞིང་ངོ་གནོང་བ་ཞིག་ཀྱང་ཡིན་པས་ཟེར་མི་བདེ་བར་གྱུར། ཁོང་གིས་བཟང་ལ་བཟང་ལན་དང་ངན་ལ་ངན་ལན་ཞེས་པའི་དཔེ་ལྟར་དུད་ཚང་འདིའི་གོས་ཆས་མགྱོགས་ཆས་སུ་འཚེམ་པ་དང་སྤུས་ཀ་ཞན་པོ་བཟོ་པའི་ངན་ལན་སློག་དགོས་ཞེས་སྙམ་སྟེ་གོས་སྲུབས་ཐ་རེ་ཐོ་རེ་བཞག་ནས་ཐབས་ཆག་ཅིག་འཚེམས།ཁྱིམ་བདག་གིས་ཀྱང་གནས་ཚུལ་དེ་རིག་དུས་སེམས་ནང་ཧ་ཅང་མི་དགའ་བ་བྱུང་།ཡིན་ཡང་ཐད་ཀར་གཤེ་ན་གཤེ་མི་ནུས་པར་སེམས་ལ་རྡོ་ལེབ་ཚ་པོའིཐོག་གི་གྲོག་མ་བཞིན་སྡོད་མི་ཚུགས་པར་གྱུར།ཉིན་ཞིག་ཁྱིམ་བདག་དེས་ཁང་སྟེང་ནས་མར་བབས་འོང་བ་དང་བསྟུན་ཏེ་ཚེམ་བཟོར་ཕ་གིའི་རི་ལ་རྟ་ཞིག་རྒྱུག་ཐལ།རྟ་དེ་དང་ཐོག་གོམ་འགྲོས་ཞིབ་ཅིང་བང་རྒྱུག་གི་ཉམས་ཀྱང་ཤིན་ཏུ་མཛེས།དེ་ནས་ཡུན་རིང་མ་སོང་བར་གོམ་རླབས་ཇེ་ཆེ་ནས་ཇེ་ཆེར་དང་གོམ་འགྲོས་ཇེ་མགྱོགས་སུ་ཐལ་བས་ངས་བལྟས་ན་དེ་རྟ་རྒྱུད་ཡག་པོ་ཞིག་མིན་པར་སྙམ་ཟེར།ཤུགས་ལ་གོ་རྒྱུའི་ནི་ཁྱོད་ཀྱི་བཟོས་པའི་གོས་ཆས་དེའི་ཚེམས་སྲུབས་ཀྱང་རྟའི་གོམ་འགྲོས་ལྟར་ཇེ་ཆེ་དང་ཇེ་མགྱོགས་སུ་ཐལ་བས་ཁྱོད་ཀྱང་ཚེམ་བཟོ་ཡག་པོ་ཞིག་མ་རེད་ཅེས་པ་དེ་ནི་སྤྱང་གྲུང་ཅན་གྱི་ཚེམ་བཟོ་ཡིས་ཝ་ལེར་གོ་དེ་ནས་ཚེམ་བཟོས་དུད་ཚང་ཁྱོད་ཚང་སེར་སྣ་ཆེ་བས་ང་རང་དུད་ཚང་ཡ་རབས་ཅིག་ཏུ་འགྲོ་བསམ་པ་ཡིན་ཞེས་པའི་ལན་འདེབས་ཆེད་ཁྱིམ་བདག་གི་གཏམ་དང་བསྟུན་ནས།རེད་ཡ།དེར་ངས་བལྟས་ན་གོམ་རླབས་ཇེ་ཆེ་དང་གོམ་འགྲོས་ཇེ་མགྱོགས་སུ་སོང་བ་དེ་ནི་རྟ་མི་ཡག་པ་ནི་ག་ལ་ཡིན།རྟ་དེ་རྩྭ་ཆུ་འབེལ་ས་ཞིག་ལ་འགྲོ་བསམ་རྒྱུ་ནི་དོམ་དམ་རེད་ཅེས་ལན་བཏབ་པས་ཁྱིམ་བདག་དེ་ལ་གཏམ་ལན་མེད་པར་གླེན་ལྐུགས་ལྟར་གྱུར། །