སྔར་མཚན་སྙན་ཕྱོགས་བཞིར་གྲགས་པའི་རྒྱལ་པོ་ཞིག་ཡོད།རྒྱལ་པོ་དེ་རང་འདོད་ཆེས་ཚ་བས་དུས་རྟག་པར་གལ་ཏེ་རང་ཉིད་ཀྱི་སྐུ་གཟུགས་རི་མོ་ཐོག་ཏུ་བཀོད་ན།མི་ཚེ་མི་རབས་སུ་གཞན་དག་གིས་རང་ཉིད་བརྗེད་མི་ཐུབ་ཅིང་བསུབ་ཀྱང་མི་ཐུབ་པ་ཞིག་མ་རེད་དམ་ཞེས་འདིང་རྒྱག་བཞིན་སྡོད།འོན་ཀྱང་རྒྱལ་པོ་དེ་ནི་མིག་ཡ་ཞར་གོག་དང་རྐང་ཡ་ཞ་ཀྱོག་ཡིན་པས།རི་མོ་བ་སུ་ཞིག་ཡིན་རུང་ཁོའི་སྐུ་གཟུགས་ཇི་མ་ཇི་བཞིན་ཤོག་གུ་ཐོག་ཏུ་འགོད་མ་ཕོད།དེ་དུས་རྒྱལ་པོ་རང་བཙན་དབང་གིས་གི་སྒོ་ནས་རི་མོ་བ་སྐད་གྲགས་ཡོད་མཁན་ཞིག་འཛིན་བཟུང་བྱས་ནས་རང་ཉིད་ཀྱི་སྐུ་གཟུགས་བཀོད་དུ་བཅུགརི་མོ་བ་དེ་ནི་རྒྱལ་པོའི་དབང་བཙན་ལ་འཇིགས་ནས་མིག་ཡ་ཞར་གོག་དང་རྐང་ཡ་ཞ་ཀྱོག་དེ་ཇི་བཞིན་བྲི་མ་ཕོད་པར་རི་མོའི་ཐོག་ཏུ་ཕོ་གསར་ལྷ་ཕྲུག་འདྲ་ཞིག་བྲིས། རྒྱལ་པོས་ང་འདི་འདྲ་མཛེས་ཉམས་ལྡན་པ་ཞིག་ཨེ་རེད།འདི་ཤུགས་ཀྱིས་རང་ཉིད་ལ་ཟུར་ཟ་དང་འཕྱ་སྨོན་མ་རེད་དམ་ཞེས་སྙམ་ནས་རི་མོ་བ་རྫུན་མར་ཁྲིམས་བཅད་དེ་བསད་དོ། །
  དེའི་སང་ཉིན། རྒྱལ་པོས་སླར་ཡང་རི་མོ་བ་མཁས་པ་གཉིས་འཛིན་བཟུང་བྱས་ཏེ་རང་གཟུགས་བྲི་བཅུག   རི་མོ་བ་གཉིས་དེས་སྔོན་དཔེ་བླངས་ནས་རྒྱལ་པོའི་གཟུགས་ཇི་བཞིན་ཤོག་གུ་ཐོག་ཏུ་བཀོད།རྒྱལ་པོ་ཨུ་ཚུགས་ཅན་དེ་རིག་དུས་ཁོང་ཁྲོ་ཚད་མེད་ལངས་ནས་རྒྱུ་མཚན་ཅུང་ཙམ་མེད་པར་རི་མོ་བ་གཉིས་དེའང་དམར་གསོད་བཏང་།།དེའི་རྗེས་སུ་རྒྱལ་པོས་ཡང་རི་མོ་བ་གྲགས་ཅན་ཞིག་བཙན་བཟུང་བྱས་ནས་དེ་ལ་བྲི་བར་བཅུག རི་མོ་བ་འདིས་སྔར་གྱི་རི་མོ་བ་གསུམ་པོའི་སྔོན་དཔེ་བླངས་ནས་རྒྱལ་པོའི་སྐུ་གཟུགས་མཛེས་ཉམས་ལྡན་པ་བྲི་མ་ཕོད་ལ་མིག་ཡ་ཞར་གོག་དང་ཡ་ཞ་ཀྱོག་ཀྱང་བྲི་མ་ཕོད།ཁོས་བློ་གྲོས་ཀྱིས་སྔར་མེད་གསར་སྤྲོས་ཀྱི་སྒོ་ནས་རྒྱལ་པོ་དེ་རྔོན་ལ་ཕེབས་པའི་མཛེས་རིས་ཤིག་བྲིས་པ་སྟེ།ནགས་རི་ཚང་ཚིང་ཞིག་གི་གསེབ་ཏུ་རྒྱལ་པོས་གསེར་མདངས་བཀྲ་བའི་གོ་ཁྲབ་གོན་ཞིང་རྐང་བ་ཞ་ཀྱོག་དེ་རྡོ་ཕུང་གི་ཐོག་ཏུ་བརྫིས།མིག་ཡ་ཞ་ར་དེ་བཙུམས་ནས་གནམ་ལ་ལྡིང་བའི་ཐང་དཀར་རྒོད་ཐོག་ལ་ཉག་ཕྲན་འཕེན་གྲབས་བྱ་བ་ཞིག་བྲིས།རྒྱལ་པོས་དཔའ་སྟོབས་ལྡན་ཞིང་གཟུགས་ལུས་ཚང་མ་སྐྱོན་མེད་གཡང་འཁོར་བའི་རང་གཟུགས་ཤིག་ཤོག་གུ་ཐོག་ཏུ་མངོན་སུམ་འཁྲུངས་པ་བཞིན་དེ་མཐོང་མ་ཐག་ཡིད་སེམས་རབ་ཏུ་མགུ་ནས་དགའ་སྤྲོ་ཆེན་པོའི་ངང་རི་མོ་བ་འདི་དོན་ལ་གནས་པའི་མཛེས་རིག་པའི་མཁས་པ་རེད་ཅེས་བསྟོད་བསྔགས་ཡང་ཡང་བྱས་སོ། །