ཧུན • དུར་རོ། 2023-08-14
༡
སྐར་མདའ་ཞིག་བྲེལ་འཚུབ་གྱིས་འཕུར།
ཉིན་མཚན་གཉིས་ལ་ཡང་ཡང་འཕུར།
ཆར་བ་དྲག་ཏུ་བབས་པར་བྱས།
ཉི་མ་རབ་ཏུ་ཚ་བར་བྱས།
ད་གཟོད་སྐར་མདའ་ཞིག་དགོད་པར་བྱས།
༢
ལམ་ཕྲན་གྱ་གྱུ་དེ་རུ།
ཁ་བ་ཞིག་འབབ་འགོ་ཚུགས།
དཀར་དཀར་དམར་དམར་གྱི་ཁ་བ།
འཆི་འཕོ་དང་ཉི་ནུབ་ལ་དགའ་བའི་ཁ་བ།
ཁ་བ་བབས་མཚམས་བཞག་རྗེས།
ཉབ་ཉོབ་ཏུ་གྱུར་བའི་ཉི་འོད་ཅིག་
འཕྲོ་འགོ་ཚུགས།
གྲང་ལྷག་རྒོད་པའི་རླུང་བུ་ཁམ་པ་ཞིག་
ལྡང་འགོ་ཚུགས།
འཆི་བ་དང་ཉི་ནུབ་ལ་དངོས་སུ་གདོང་
གཏུགས་བྱས།
ད་གཟོད་ཅི་ཞིག་མཐོང་བ་ལྟར་ངུ་སྙིང་བྲོད།
༣
ནམ་གུང་གི་སྐབས་སུ།
རྡོ་གཅལ་ངོས་སུ་མེ་ཏོག་བཞག
སེམས་ངོའི་ས་རྡུལ་དག་གཙང་མར་བཀྲུས།
ལྐོག་ལྐོག་སུད་སུད་ཀྱི་རྐན་སྒྲ་ཐག་ཐག་བྱས།
ནགས་ཀྱི་གྲིབ་བསིལ་འོག་ནས་ཧད་དེ་བསྡད།
ད་གཟོད་ཁང་རྩེག་མཐོན་པོའི་རུ་བ་
རེ་རེ་དྲན་པར་བྱས།
༤
རི་རབ་ཀྱི་བྲང་ངོས་སུ།
རི་མོ་དཀར་སེར་དམར་ལྗང་དཔར།
མི་རིགས་ཀྱི་ཁ་དོག་སྣ་ལྔ་ཡང་ཡང་དཔར།
བྲེལ་འཚུབ་དང་རྒྱབ་གཟུགས་སོགས་
ཡང་ཡང་བྲིས།
དྲན་པ་གསོས་རྗེས།
ཁ་ཆེམས་སུ་སྐད་གདངས་དང་ཀ་ཡིག་
ནག་པོ་ཞིག་བཞག
བྱེ་མའི་བུམ་པར་ལྗང་ཕྲན་ཞིག་རྨོས།
ད་གཟོད་རང་བྱུང་ཁམས་ཀྱི་བརྩེ་དུངས་ཚོར།
༥
མེ་འོད་ཆེམ་ཆེམ་འཕྲོ་བའི་མེ་ལོང་ངོས་སུ།
ཆུ་ཟིལ་ཕྲན་བུ་ཞིག་རྙིད་པར་གྱུར།
མེ་ལོང་ནང་གི་བདག་གཞན་དག
ད་གཟོད་སྐོམ་པས་གདུང་བར་བྱས།
༦
མཚན་གུང་དེར།
ཆང་རག་ཤེལ་དམ་གང་མཆོད།
སྒྲུང་གཏམ་ཞིག་འབྲི་འགོ་བརྩམས།
ནམ་གུང་ཡོལ་བ་ན།
ཟླ་བ་དང་མཆུ་སྒྲོས་སྦྱར།
ཁེར་བཤད་ཡང་ཡང་འཐེན།
ཞོགས་པ་དེར།
ཉི་འོད་མལ་ས་ལ་འཕྲོས།
ད་དུང་རྒྱུ་སྐར་གྱི་གཙང་པོ་དྲན།
༧
ངོ་འབག་ལྗང་ཁུ་ཞིག་གྱོན།
སྐད་ཆ་ལྗང་ཁུ་ཞིག་ལབ།
འཆི་ཁ་མར་གཏམ་རྒྱུད་ཅིག་བྲིས།
གལ་ཏེ།
འཆི་བ་མེད་ན་ཞེས་པའི་གཏམ་རྒྱུད་བྲིས།
རྔུལ་ཆུ་ཁྲོམ་ཁྲོམ་དུ་བབས།
བྲལ་དཀའ་བའི་གཏམ་རྒྱུད་མཇུག་གྲུབ།
༨
ཀུ་ཅོ་ཞིག་རི་སྒང་ནས་འཕུར།
མི་ལོ་དུ་མའི་རྗེས་སུ།
སླར་ཡང་རི་སྒང་ནས་ཀུ་ཅོ་འཕུར།
སྐྱ་ཟད་སྔོ་སྡུག་གི་རི་སྒང་ལ།
སེམས་ཀྱི་རྣག་ཁྲག་བཞུར་འགོ་བརྩམས།
༩
དབུགས་ཧལ་ཧལ་གྱིས་གཙེས་བྱུང་།
གྲིབ་མ་མག་མོག་གིས་ཟིན་བྱུང་།
གདོང་ཁེབས་ནག་ནོག་གིས་བསྟིམས་བྱུང་།
གངས་ཀྱི་ནགས་ཚལ་དེ་རུ།
ངས་ཉིན་རེ་ཐེངས་རེར།
ཧ་བཏབ་ནས་བྱིལ་བྱིལ་གཏོང་ན་འདོད།
༡༠
ངའི་རླབས་གཉེར་ལས་འོད་ཅིག་འཕྱོ།
མཚོ་མོ་ལ་སྐར་མདའ་ཡང་ཡང་ལྷུང་།
གོམ་སྒྲ་འགྲོས་མཉམ་པ་ཞིག་དཀྲོལ།
སྐྱེ་བོ་གང་རུང་གི་དུས་ཚོད་ཟད་པོ།
ལམ་གྱི་བཞི་མདོ་དེ་རུ་ནམ་ལངས།
འགྲུལ་བཞུད་ཨང་ཀི་དང་པོ་ལམ་ལ་ཆས།
ལོ་འདི་དག་ལ་རྨི་ལམ་མང་སོང་།
སྐྱོ་ཤས་ཉུང་སོང་།
ཤུགས་ཆེན་པོས་ངུ་སྙིང་བྲོད་བྱུང་།
༡༡
གལ་ཏེ་རྨི་ལམ་ནང་དུ་ལུག་ཁྱུ་འདུག་ན།
ངས་རྫི་བོ་ཁེར་འགྲོ་ཞིག་འཚོལ་ངེས་ཡིན།
ཤ་ཁྲག་གི་གཙང་པོ།
རིགས་རུས་ཀྱི་རི་བོ།
གཟུགས་མེད་ཀྱི་ནང་ཁྲོལ།
དེ་དག་གི་སླད་དུ།
ངས་རྫི་བོ་ཁེར་འགྲོ་ཞིག་འཚོལ་ངེས་ཡིན།
༡༢
བཞུར་རྒྱུན་ཆད་སོང་།
འགྲོ་མཚམས་བཞག་སོང་།
ཤེལ་ངོས་ཀྱི་ས་རྡུལ་དག།
ཧ་བཏབ་ནས་བྱིལ་བྱིལ་བྱས་ན་ཆོག་གམ།
ཁ་རོག་གེར་རྩྭ་ཐང་ལ་ལོག།
༡༣
ངས་འདུ་ཁང་ཞིག་བཀོད།
ནང་ལ་ལྷ་མོ་ཞིག་བཀོད།
དེ་རུ་ལྷ་བུ་ཞིག་བཀོད།
བུ་ཆུང་དེ་ཨ་མ་ལ་དགའ།
ཉིན་ཞིག་ཨ་མ་ལ་འཐམ།
ངག་མི་སྨྲ་བར་འདོད་པས་གཟེར།
གཞན་སྐད་སྨྲ་བར་མ་ལོབ།
རང་སྐད་ཡང་བཤད་མ་ཐུབ།
ཉིན་ཞིག་བྲག་ཐེམ་ནས་འཆི་བར་བརྩམས།
༡༤
རྒྱུ་སྐར་གྱི་སྐུད་ལམ་སྣེ་རུ།
མཚན་མོ་གྲངས་མེད་ཅིག་འདས།
མུན་པ་དང་རྨི་ལམ་གང་མང་ཞིག་འདས།
རྗེས་ཤུལ་ཟིན་ཚོད་མེད་པའི་ན་ཚོད་
མཐའ་མེད་ཅིག་འདས།
བར་སྣང་གི་སྐར་མ་འོད་ཆེན།
བུ་རབས་ནས་བུ་རབས་ལ་ཕེབས་སྐྱེལ་མེད།
ཉིན་མཚན་གྱི་སྲུབས་བར་མེ་ཁ་
གསོ་ཐབས་བྱས།
༡༥
དེབ་ཐེར་སྔོན་པོ།
དེབ་ཐེར་དཀར་པོ།
དེབ་ཐེར་དམར་པོ།
ཀློག་མྱོང་མེད་ལ།
རང་ཉིད་ཀྱི་དེབ་ཐེར་ངོས་སུ།
ཡིག་འབྲུ་དང་སྐད་ཆ་མེད།
ཕོ་བྲང་གི་རྡོ་གཅལ་དང་།
ཁྲག་གིས་བྲིས་པའི་རྡོ་རིང་མེད།
རང་ཉིད་དང་ཡོད་ཚད།
བསུབས་ཟིན་པ་འདྲ།
༡༦
སང་ལོའི་ཟླ་བ་བརྒྱད་པར།
ངས་གཉེན་དཔང་དཔར་སྲིད།
སང་ཉིན་གྱི་དུས་ཚོད་བརྒྱད་པར།
ངས་ཆུང་མ་བསུ་སྲིད།
སང་ཞོགས་ཀྱི་སྐར་ཆུང་བརྒྱད་པར།
ང་འཇིག་རྟེན་དང་གཏན་དུ་ཁ་གྱེས་སྲིད།
༡༧
ངས་སྒྲུང་གཏན་ཞིག་འབྲི་འགོ་བརྩམས།
དེ་རུ་ཕོ་རྐྱང་ཞིག་འབྲི་བར་བྱས།
མོ་རྐྱང་ཞིག་འཚོལ་འདོད་བྱུང་།
གནམ་ས་ལན་གསུམ་བསྐོར་ཀྱང་།
བུ་མོ་ཁེར་འགྲོ་ཞིག་རྙེད་མ་བྱུང་།
མཐར་སྒྲུང་གཏམ་འབྲི་མཚམས་བཞག།
༡༨
ངས་འཇིག་རྟེན་ལ་མེ་ལོང་ཆག་རོ་ཞིག་གཡར།
གཟུགས་རིས་འཆར་མི་ཐུབ་པའི་མེ་
ལོང་ཞིག་ཡིན།
ངས་དེ་ལ་མེ་ལོང་ཆག་རོ་མི་ཟེར་རང་
ཉིད་ཆག་རོ་ཟེར།
མཐར་ངས་མེ་ལོང་དེ་ཕྱིར་འཇིག་རྟེན་ལ་
གཏོད་འཆར་མེད།
༡༩
ཞོགས་པ་དེར་སྐྱ་ཐིགས་འཁྱུག།
བེམ་པོ་བཞིན་གྲག་འགུལ་གང་ཡང་མེད།
གོ་མེད་ཚོར་མེད་ངང་མཆི་མ་ཡང་ཡང་འབབ།
ནམ་མཁའ་སྔོན་པོ་ཞིག་བསང་
དུད་ཀྱིས་ཁེབས།
རླུང་བུ་བསིལ་མོ་ཞིག་གིས་གདོང་འབག་
དེ་ཉིད་འགུལ་བར་བྱས།
ད་གཟོད་ནམ་ལངས་སོང་བ་ཚོར་ཡོད་པ་
འདྲ་ལ་ཡང་མེད་པ་འདྲ།
༢༠
ནགས་ཚལ་གྱི་ཉེ་འཁོར་ན།
རི་དྭགས་ཧ་ཅང་མང་།
འདབ་ཆགས་ཀྱང་ཧ་ཅང་མང་།
བློས་བསླངས་བྱས་ཤིང་རི་མོ་བྲིས་ན།
སྨྲ་ཤེས་མཁན་གྱི་རི་དྭགས་མེད་ལ།
འདབ་ཆགས་ཀྱང་མི་འདུག།
༢༡
ཤི་ཟིན་རྗེས་སྒྲོན་མེ་ཤིན་ཏུ་གསལ།
དུར་ཁྲོད་ཀྱང་ཤིན་ཏུ་མཛེས།
རྣམ་ཤེས་ཀྱང་ཤིན་ཏུ་སྐྱིད།
དུས་ཚོད་མེད་ལ་ཤ་ཁྲག་མེད།
ཕོ་མོའི་དབྱེ་བ་ཡང་མེད།
ད་དུང་མིག་ཆུ་ཡང་མེད།
འགྲོ་ཁར་རྐང་རྗེས་ཡོད་ངེས་ཡིན།
༢༢
རྩིག་ལྡེབས་ངོས་སུ་འོད་ཅིག་འཕྲོས།
ནོར་བུ་རེད་བསམ་མཁན་ཤིན་ཏུ་མང་།
ཟླ་བ་རེད་བསམ་མཁན་ཧ་ཅང་དཀོན།
སྤྲིན་པའི་གས་བར་ནས་སླར་
ཡང་འོད་ཅིག་འཕྲོས།
ཟླ་བ་རེད་བསམ་མཁན་ཤིན་ཏུ་མང་།
ནོར་བུ་རེད་བསམ་མཁན་ཧ་ཅང་དཀོན།
ལག་མཐིལ་ནས་འོད་ཅིག་འཕྲོས།
མིང་མ་རྙེད་ལ་དོན་ཡང་མ་ངེས།
༢༣
ས་རུབ་སོང་། སྒྲོ་སྒྲོ་བོར་སོང་།
མུན་རུབ་སོང་། རུས་སྦལ་བོར་སོང་།
ཨ་མ་སྨྲེང་བཞིན་འདུག།
ང་རང་ངུ་བཞིན་ཡོད།
སྔར་བཞིན་ས་རུབ་སོང་། སྒྲོ་སྒྲོ་མ་རྙེད།
སྔར་ལས་ཀྱང་མུན་རུབ་སོང་།
རུས་སྦལ་མ་རྙེད།
གཞི་ནས་ཨ་མ་སྨྲེང་བཞིན་འདུག
རྨང་ནས་ང་རང་ངུ་བཞིན་ཡོད།
༢༤
ཚ་ལམ་ལམ་གྱི་ཉི་འོད་འཕྲོས།
གྲང་ཤུར་ཤུར་གྱི་སྟོན་རླུང་ལྡང་།
སྙན་ངག་པ་ཞིག་འཇིག་རྟེན་དང་གྱེས།
༢༥
མཚན་གུང་གི་སྐད་ཆ་བཤད་ཟིན།
མཚན་གུང་གི་རྨི་ལམ་རྨིས་ཟིན།
མཚན་གུང་གི་ཟིན་འབྲི་བྲིས་ཟིན།
མཚན་གུང་གི་ལོ་རྒྱུས་བཀླགས་ཟིན།
མཚན་གུང་གི་ང་རང་ཤི་ཟིན་པ་འདྲ།
རྩོམ་གསར། 10