རང་མཉམ་དགེ་རྒན་དག་ལ་བགྲོ་བ།

གཅན་གླག་མིག།        2022-12-28

རྨོངས་པའི་མུན་ཆེན་གསལ་མཛད་འཇམ་པའི་དབྱངས། །

འགྲོ་དྲུག་བརྩེ་བས་སྐྱོང་མཛད་སྤྱན་རས་གཟིགས། །

ལེགས་བཤད་བདུད་རྩིས་སིམ་མཛད་དགེ་བའི་བཤེས། །

སྒོ་གསུམ་དགེ་ལ་སྦྱོར་བར་གུས་པས་འདུད། །

མེས་པོའི་སྲོལ་བཟང་བསྣམས་ནས་སློབ་གྲྭ་རུ་ཆས་ཤིང་། །

རང་གི་འགན་འཁྲི་བསམས་ནས་སློབ་ཁང་དུ་འབྱོར་ཚེ། །

དུག་གསུམ་ཡོངས་སྤངས་བློ་ཁ་སློབ་མ་ལ་ཕྱོགས་ཏེ། །

སྒོ་གསུམ་མ་ལུས་སློབ་མའི་ཆེད་དུ་ནི་བསྔོའོ། །

ཡངས་ཡངས་ཡུམ་ཆེན་གོ་ལའི་རྒྱ་ཁྱོན་ནི་ཡངས་པ། །

མངས་མངས་གང་ཟག་སོ་སོའི་འཇུག་སྒོ་ནི་མངས་པ། །

མཚར་མཚར་ཐོན་མི་ཨ་ནུའི་མཁྱེན་དཔྱོད་ནི་མཚར་པ།

ལེགས་ལེགས་ཡབ་མེས་གོང་མའི་མཛད་རྗེས་ནི་ལེགས་པ། །

མཛེས་མཛེས་གནས་བཅུའི་ཡལ་འདབ་རྒྱས་པའི་ལྡིང་ཁང་མཛེས། །

མཆོག་མཆོག་ཤེས་རིག་གཏེར་ཆེན་མངའ་བའི་བཤེས་གཉེན་མཆོག །

བཟང་བཟང་ཐོས་བསམ་རྒྱ་མཚོར་ཞུགས་པའི་སློབ་མ་བཟང་། །

སྐྱིད་སྐྱིད་དཔེ་ཀློག་གདངས་དབྱངས་སྙན་པའི་སློབ་ར་སྐྱིད། །

ཕ་ས་ཁབ་ཏུ་སྒོམས་ལ་བདག་སྐྱོང་ལེགས་པོ་བྱོས། །

མི་རིགས་སྙིང་དུ་ཆོངས་ལ་སྲི་ཞུ་གང་ལེགས་སྒྲུབས། །

སློབ་གྲྭ་གཞིས་སུ་སོམས་ལ་གད་བདར་ལས་ལ་འབུངས། །

དགེ་གྲོགས་ཕུ་ནུར་དགོངས་ལ་མཐུན་སྒྲིལ་ལག་རྡང་སྦྲེལ། །

སློབ་མ་བུ་ཡན་ཡིན་ན་བརྩེ་བས་རྗེས་སུ་ཟུངས། །

དཔེ་ཀློག་ཟས་ཡན་ཡིན་ན་རྟག་ཏུ་ཆད་མེད་སྟེན། །

ཁྱིམ་བདག་གྲོགས་ཡན་ཡིན་ན་ཕྱི་ཐག་ལྷོད་མེད་གྱིས། །

ཁྲིད་ཐབས་བླ་ཡན་ཡིན་ན་འདོར་བར་མི་བྱེད་གཅེས། །

ཕ་སྐད་སྲོག་དང་རྒྱལ་ཡིག་གོས་ཡིན་ཞིང་། །

ཕྱི་ཡིག་རྒྱན་དང་ཚན་རིག་གཉེན་ཡིན་པས། །

བེམ་པོར་རྒྱན་གོས་སྤུད་ཀྱང་ལེགས་མིན་ལ། །

རྒྱན་གོས་ཚན་རིག་དབེན་ཚེ་སྲོག་ཀྱང་ངོ་། །

འཇིག་རྟེན་ཞི་མཐུན་མཐུན་སྤྱད་སློབ་གསོའི་སོན་བཏབ་ན། །

སྤྱི་ཚོགས་འཆམ་མཐུན་མཐུན་སྤྱད་སློབ་གསོའི་མྱུག་འབུས་ཤིང་། །

ཁྱིམ་ཚང་འགྲིག་མཐུན་མཐུན་སྤྱད་སློབ་གསོའི་འབྲས་སྨིན་ཏེ། །

མི་རྣམས་མཛའ་མཐུན་མཐུན་སྤྱད་སློབ་གསོའི་ལོ་ལེགས་འབྱུང་། །

ཨ་པོ་ང་ཡིན་བདེན་ན་ཐོས་བསམ་གཡུལ་ལས་རྣམ་རྒྱལ་བདེན། །

དབྱུག་པ་མདུང་ཡིན་བདེན་ན་དུག་གསུམ་རུ་དཔུང་རྩ་གཏོར་བདེན། །

ཕ་བཟང་བུ་ཡིན་བདེན་ན་དགྲ་གྲོགས་གོ་འཛོལ་མི་འབྱུང་བདེན། །

གཡག་བཟང་ཀོ་ཡིན་བདེན་ན་སྡིག་རྒན་དགའ་རབ་མིན་དེ་བདེན། །

མི་ཤེས་ཤེས་ལྟར་དགྱེས་ནས་གཞུང་བཤད་མཚང་། །

མི་མཁོ་མཁོ་ལྟར་འཛུམ་ནས་སྤྲོས་བཤད་མཚང་། །

མི་འབྱོར་འབྱོར་ལྟར་སྨྲས་ཏེ་མཁས་བཤད་མཚང་། །

མི་འཆུམས་འཆུམས་ལྟར་འཁྲུལ་ཏེ་ཉོག་བཤད་མཚང་། །

དགེ་རྒན་དགེ་རྒན་ཟེར་བ་གང་ཞེ་ན། །

རྒྱབ་རྟེན་ལུང་གི་རི་བོ་བརྟན་ཤིག་གེར། །

སྒྲུབ་བྱེད་རིགས་པའི་ཆུ་བོ་ལྷོད་གྱིག་གེར། །

དམ་བཅའ་རྡོ་རྗེའི་མདུད་པ་རྒྱ་དམ་སེ། །

སྡིག་རྒན་སྡིག་རྒན་ཟེར་པ་གང་ཞེ་ན། །

མ་དག་ཀུན་སློང་ཐང་མ་བཞིན་དུ་བཀྲ། །

ཕྱོགས་ལྷུང་འཐེན་འཁྱེར་སྐྱིན་ཐང་བཞིན་དུ་འཇོ། །

ལྟར་སྣང་རིགས་པ་མེ་ཏོག་བཞིན་དུ་བཞད། །

དམག་མིས་སྐུ་སྲོག་འབེན་དུ་བཙུགས་ཏེ་རྒྱལ་ཁབ་བསྲུངས། །

སྨན་པས་ལྟོ་གོས་གྱོང་ལ་བསྐུར་ནས་བདེ་ཐང་བསྐྲུན། །

ཕ་མས་དཀའ་བ་ཁྱད་དུ་བསད་དེ་བུས་ཕྲུག་གཉོར། །

རྒན་གྱིས་ངལ་བ་དང་དུ་བླངས་ཏེ་སློབ་མ་བསྐྱངས། །

རྒོད་རྒོད་ཕྱོགས་ཞེན་རླུང་བུ་རྒོད་ཀྱང་ཀྲོང་ངེར་ལངས། །

འཁྲིགས་འཁྲིགས་གཅམ་གསག་ཡོ་ལང་འཁྲིགས་ཀྱང་སྟག་ལྟར་འགྱིང་། །

འཐིབས་འཐིབས་གཡོ་སྒྱུའི་སྨུག་ནག་འཐིབས་ཀྱང་འོད་ལྟར་འཕྲོ། །

མཐུག་མཐུག་སྒེར་སེམས་རྔམ་ཁ་མཐུག་ཀྱང་གཞན་དོན་རྩོམ། །

ཆོམ་རྐུན་གྲོགས་སུ་མ་བསྟེན་བསྟེན་ན་ཡོད་ཚད་བོར། །

འཇའ་ལ་བློ་གཏད་མ་འཚོལ་བཙལ་ན་སྙིང་པོས་དབེན། །

ནད་ལ་དཔྱད་ཁ་མ་ལོག་ལོག་ན་ཚེ་སྲོག་འཆོར། །

སྨིག་རྒྱུ་ཆུ་རུ་མ་སྒོམ་བསྒོམས་ཀྱང་སྐོམ་མི་སོད། །

སློབ་གྲྭ་བདུད་ཀྱི་བཙོན་རར་རྟག་བསྒོམས་ཤིང་། །

དཔེ་ཁྲིད་དུག་གི་འདམ་རྫབ་ལགས་བསམས་ཚེ། །

དམྱལ་བའི་ཟངས་ཀར་དངོས་སུ་འབྱོར་ངེས་པས། །

དེ་དུས་གཤིན་རྗེའི་གདོས་ཐག་གཅོད་ཐབས་བྲལ། །

སློབ་མར་གོམ་ཁ་ཕྱོགས་ཤིང་ཐུགས་ཀྱིས་ལེགས་འཚོས་ན། །

དེས་ཀྱང་མིག་གིས་བལྟས་ཤིང་སེམས་ཀྱིས་རབ་བརྟག་སྟེ། །

བློ་ཁ་དཔེ་ཀློག་སྐྱོར་སྦྱོང་ཕྱོགས་སུ་ངང་གིས་འཁོར། །

དཔེར་ན་བྱེའུས་བདག་པོར་ཕྱིར་མིག་འཕེན་པ་བཞིན། །

ཡོན་ཏན་ལེགས་ཀྱང་གཞན་ཕན་བློ་ཡིས་མ་ཟིན་ན། །

སློབ་མར་ཕན་པར་འགྱུར་བའི་རེ་བ་ཡོངས་བྲལ་ཏེ། །

དཔེར་ན་སྨན་གྱི་རྒྱལ་པོ་སྦྲུལ་གྱིས་བསྐོར་འདྲ་བས། །

གཞན་གྱི་སྙུན་ནད་གདིང་ནས་འཇོམས་རེ་བྱིས་པའི་བློ། །

ཝ་སྐྱེས་རྒྱལ་པོར་བསྐོས་ཀྱང་བརྒྱལ་དུས་ཤེས་འགྱུར་ཞིང་། །

ཁྱི་རྒན་སེང་གེར་རློམ་ཡང་འཐབ་དུས་རྟོགས་འགྱུར་ལ། །

བོང་བུ་གཟིག་ལ་བརྫུས་མཐར་གཞན་གྱིས་བསད་གྱུར་པས། །

ཐོས་བསམ་སྒོམ་གསུམ་དགེ་རྒན་དམ་པའི་རྒྱགས་སུ་གཅེས། །

ལ་ལའི་ཙན་དན་ལ་ལར་གོ་གཡོག་དང་། །

ལ་ལའི་གོས་ཆེན་ལ་ལར་ཐབ་ཕྱིས་དང་། །

ལ་ལའི་བདུད་རྩི་ལ་ལར་དུག་ཏུ་མངོན། །

ལ་ལའི་ཚེར་མས་ལ་ལའི་བཀྲེས་སེལ་འདྲ། །

རྒྱུ་སྐར་བཀྲ་ཡང་ཟླ་བར་འགྲན་མི་བཟོད། །

སྡོང་པོ་མང་ཡང་ཙན་དན་ཏོག་ཏུ་སྣང་། །

གང་ཟག་མོད་ཀྱང་མཁས་པ་རྒྱན་དུ་མཛེས། །

དངོས་པོ་མང་ཡང་དཔེ་ཆ་ནོམ་དུ་མངོན། །

ཐོས་བསམ་སྒོམ་གསུམ་གྱི་ལ་ཆེན་ལ་ཆུང་མ་བརྒྱུད་པར། །

འཆད་རྩོད་རྩོམ་གསུམ་གྱི་བདེ་མོའི་ཐང་ལ་ཇི་ལྟར་འབྱོར། །

བདེན་བཟང་མཛེས་གསུམ་གྱི་དཔའ་མཛངས་མི་ལྡན་པར། །

མཁས་བཙུན་བཟང་གསུམ་གྱི་གསེར་ཁྲིར་བཞུགས་ཀྱང་ཁྲེལ། །

དགེ་རྒན་ཤེལ་སྐྱོགས་བཟང་པོས་ལེགས་བཤད་རོ་བཅུད་ཕུན་ཚོགས་སྩོལ། །

སྡིག་རྒན་སྙིགས་གཞོང་ངན་པར་ལ་ལུང་ཉ་ཉོག་མང་སྤུངས་པ། །

ན་མཉམ་དགེ་རྒན་རྣམས་ལ་ནོངས་པའི་ཚོགས་ཤིག་ལྡན་གྱུར་ཚེ། །

མཁྱེན་ལྡན་མཁས་པའི་ཚོགས་ཀྱིས་མི་ཁྲེལ་མཐོལ་ལོ་བཤགས། །

  • ལེ་ཚན་སྔོན་མ།:ཆེས་མཐའ་མཇུག་གི་ཁྱེར་རྐྱང་།
  • ལེ་ཚན་རྗེས་མ།:གནས་སྐབས་མེད།